Конспект «О, табиғат – тіршіліктің анасы»

Атырау облысы

Құрманғазы ауданы

Абай атындағы жалпы орта мектебі

Молдағалиева Гулжазира

Жұмажанқызы

Мектеп кітапханашысы

«О, табиғат - тіршіліктің анасы»

Тақырыптық кеш

Мақсаты: Оқырмандарға экологиялық тәрбие беру арқылы олардың табиғатты қорғауға деген қабілетін арттыру, табиғатты, қоршаған ортаны аялауға үйрету, табиғат пен адам арасындағы байланысты, табиғатты қорғаудың маңызды екенін түсіндіру.

1- Жүргізуші: Табиғат, жер - ана, Отан, туған жер, атамекен деген киелі сөздер құлаққа жылы естіліп, жүрекке шаттық сезім ұялататын ұлы да қасиетті ұғымдар. Адам өзі табиғат пен жер-ананың перзенті. Табиғатты қорғау әрбір адамның борышы.

2-Жүргізуші: Тіршілік тірегі - табиғат. Ол жалпы адам баласының ортақ қазынасы. Бүгінгі кешіміз табиғатқа арналады. Табиғат біздің бойымызға шабыт, көңілімізге қуат, сезімімізге сұлулық ұялатады.

1- оқушы: Табиғат - алтын күнім, асыл айым.

Шашылған жұлдыз мерует жастанады,

Ашық па, жабық па деп қас қабағың.

Табиғат - көркем жырым, асқақ әнім.

Сен ана, мен қашан да жас баламын,

Сөйлеші жерде бұлақ, көкте бұлт боп,

Тіліңді түсінуге тырысайын.

1-Жүргізуші: Табиғаттың басты байлығы - жер. Адамдар, жануарлар, өсімдіктер өз қорегін осы жерден алады. Жердің қасиетін сақтау, жер жомарттығын жойып алмау адамдардың өз қолында. «Күте білсең жер жомарт» деп халқымыз тектен - тек айтқан жоқ.

2-оқушы: О, туған жер қадіріңді кім білген

Мен қырыңнан теруші едім бүлдірген

Сенде өткізген артық екен бір күнім,

Басқа жерде той - тойлаған мың күннен

Қайда жүрсем ойлап сені жүр елім.

Сүйікті елім, момын елім, ұлы елім.

Саған ғана арқамды мен сүйедім

Саған ғана аяғымды тіредім.

3-оқушы: Бұл қара жер болған бізге көп мекен.

Кең мекенге қауіп төнді!

Білсең оны төбе шашың тік тұрар,

Бейшараның көрмегені кем де кем,

Сөне жаздап, сөне жаздап шамшырақ.

Талай рет жатыпты ау қансырап.

Сондай кезде, сондай кезде

Қай құдірет келіпті одан қал сұрап.

4-оқушы: Жердің көрген қорлығы көп жетеді,

Ол жыласа , жасқа толар етегі.

Аяғаннан алдыма алып аялап

Айдарынан сипағым кеп кетеді.

5- оқушы: Қол артқанда ғылым, білім ойлауға

Қолданайық жақсылықты жоймауға.

Жердің халі бала ойнаған шармен тең,

Жер шарымен қақымыз жоқ ойнауға.

Ән: «Туған жер»

2-Жүргізуші: Табиғат байлығының бір тобы, жер бетінің сәулеті, еліміздің дәулеті - жасыл әлем. Өсімдіктің адам өміріндегі маңызы зор. Ол әр түрлі тамақтың, шикізаттардың, құрылыс материалдарын өндірудің негізгі көзі. Халқымыз өсімдікті өмір өзегі деп аялап одан ешуақытта қамқорлығын аямаған. «Атаңнан мал қалғанша тал қалсын» деген сөз соның дәлелі.

6-оқушы: Ну орман, жасыл орман, мынау орман

Далама қорған болып тұра қалған

Барлығы баласындай бір ақ үйдің,

Барлығы таралғандай бір адамнан.

7- оқушы: Осында табиғаттың бар асылы

Көркейген көл бетімен дала сыры,

Ақ қайың жасыл желек қарағайлар

Секілді-ау көзіміздің қарашығы

Табиғат әсемдіктің төркінісің

Ән саламыз бір сенің көркің үшін

Жан-жануар бәрі де үнсіз ғана

Сенен алып тұрғандай бар тынысын.

Ән: «Ауылым»

Жүргізуші: Еліміздің табиғат байлықтарының бірі жануарлар дүниесі мен құстар әлемі. Халқымыз ежелден-ақ көптеген жануарлар мен құстарын көзінің қарашығындай аялап қамқорлығына алған. Олардың жақсылықтың жаршысы, бақыттың бастамасы, достықтың үлгісі деп дәріптеген.

Айдын көл кемеріне соғатындай

Аққу қаз қаңқылдасын жаға тынбай

Дүние бастапқыдай дәурен кешер,

Еш жерде бомба түспей, оқ атылмай.

Жарқырап сонда аспан мөлдіресе

Майда жел ептеп қана гүлді үрлесе

Бұлбұлдар тәтті әуезін төгер, бірақ.

Адамдар бәрін қайта бүлдірмесе.

Жүргізуші: Адам өмір сүру үшін табиғаттың басқа да байлықтары керек. Қазақстанда түрлі кен байлықтарының қоры мол. Олар өнеркәсіптің өркендеуіне, еліміздің дамуына қажетті шикізат қоры болып табылады.

9-оқушы: Кен айтады ел мен жұрттың өлшемін

Кенде жатыр күш қуат пен мол сенім

Кенің бар ма? Жоқ болса сен жарлысың

Кенің болса келешегің зор сенің.

Жүргізуші: Осы адам баласының тіршілік етуіне қажетті табиғаттарын ұқыпты пайдалану, қорғау және одан әрі көркейту жұмыстарын жүргізу болашақ ұрпақ біздердің міндетіміз және осы жұмыстарды жүргізу кезінде іс-әрекеттерімізді табиғат заңдарымен үйлесімді жүргізе білуіміз қажет.

Жүргізуші: Жер қорғау, ел қорғау, табиғат ананы қорғау адал парызымыз. Сондықтан да халқымыз өздерінің кейінгі ұрпақтары біздерге осы осы асыл өсиеттерін қалдыра отырып, өзі өскен табиғат анасын өз анасындай аяласа екен деп тілейді.

Туған жерді сүю парыз,

Сүю үшін білу парыз

Қасиетін ұғу парыз

Күзетінде тұру парыз деген өлең жолдарымен кешімізді аяқтаймыз.

Бәрі хормен: Табиғатты қорғау үшін бәріміз,

Текке отырмай жасымыз бен кәріміз

Таза ауа үшін терімізді төгейік

Жасыл желек, тал - қарағай егейік.

Ән: «Атамекен.