Жаңа талап-жаңа ұстаз тақырыбындағы мақала

Жаңа талап - жаңа ұстаз

Қазақстан Республикасының болашағы - өскелең ұрпақ. Еліміздің келешегі олардың тәрбиесіне, біліміне тікелей байланысты. Қазақстан білім берудің өзіндік ұлттық белсенді азамат тәрбиелеу моделінің үлгісін құру үстінде. Бұрыңғы дәстүрлі оқыту мен тәрбиелеудің түрлері жаңа көзқарастар тұрғысынан ерекшеленіп, талданып басқа түрлеріне алмасуда. Қазіргі оқушыға деген қатынас объект ретінде емес, оның дамушы тұлға ретінде, қоғамды өзгертуші субъект екенін мойындап, оның өз мүмкіндіктерін барынша іске асыруға жағдай жасалудың қажеттігін тудырып отыр. Қай халықтың қай ұлттың болсын толығып өсіп, өркендеуіне, рухани әрі мәдени дамуына ықпал жасайтын тірегі де, түп қазығы да мектеп. XXI ғасыр ғылым ғасыры. Сондықтан жас ұрпаққа, жас буынға жаңаша білім беру жолында түбегейлі өзгерістер жүріп жатыр. Ұлт Көшбасшысы Нұрсұлтан Назарбаев өз жолдауларында білім-ғылым саласына назар аудармаған кез болған емес. Мемлекет басшысы өз жолдауында «оқыту үдерісіне қазіргі заманға сай әдістемелер мен технологияларды енгізу қажет» - деді. Біліміне назар салмаған халықтың әлемдік ірі додаларда оза шауып, бәйге алғанын естімедік. Ғылымына сүйсінбеген жұрттың жұлдызы жарқырағанын, жүйелі іс тындырғанын әлі күнге байқамадық. Демек, Елбасының түйінді ойларының астары кең, салмағы ауыр, маңызы басым. Осы орайда, әлемнің барлық тәжірибесін тоғыстырып, Назарбаев Зияткерлік мектебі Кембридж университетімен бірге жаңа білім бағдарламасын жасап шығарды. Бұл білім бағдарламасының мақсаты жобаны шетелдің үздік университтерінен білім беру бағдарламаларын көшіру болған жоқ. Бағдарлама негізінде отандық мамандардың әлеуетін қолданып, өзіміздің білім беруімізге сай бағдарламаны жасап шығаруға тырысты және үлкен жетістікке жетті деп ойлаймын. Қазақтың кемеңгер ұстазы Ахмет Байтұрсынұлы «Елді түзетуді бала оқыту ісін түзетуден бастау керек» деген. Сондықтан ең бірінші балаға терең білім беру мақсатында мұғалімнің жаңашылдығы ерекше орын алады десем артық кетпес. Бұл бағдарлама елімізде 2011 жылдан бастап еніп, мұғалімдерді заман талабына сай дайындап, оқушыларды білімді де білікті тәрбиелей алатын, ақпараттық коммуникациялық технологиялар заманында белсенді азамат етуге ықпал жасары анық. Үш айлық курста «Сындарлы оқыту» теориясын меңгере отырып бұл технологияның маңызы мен мәнін, түйінді идеясын түсінуге тырысудамыз. Бір байқағаным, осы бағдарлама бойынша білім беріп жүрген ұстаздардың сабақтарында оқушылардың қызығушылық, белсенділіктері күннен күнге артып келе жатқандығы, яғни бұл әдіс-тәсілдердің оқушыларға өте қатты ұнағандығын білдіреді. Дәстүрлі оқытудың қазіргі заман талабына жауап бере алмай, оқушыларды жалықтырып, олардың оқуға, білімге деген қызығушылығының төмендеуіне алып келді. Әріптестерімнің қол жеткізген жетістіктеріне, жаңашылдығына қызыға отырып, өзімде осы бағдарлама бойынша біліктілігімді арттыру мақсатында үш айлық курстың үшінші яғни базалық деңгейінен өтудемін. «Мұғалімге арналған нұсқаулықтан» білім берудегі Кембридждік әдістің теориялық негізімен таныса отырып, оқытудың жаңаша әдіс-тәсілдері, жеті модульді іс-тәжірибемде қолдана отырып оның артықшылықтарына көз жеткіземін деген сенімдемін. Бағдарламаның негізгі міндеті - қазақстандық мұғалімдердің педагогикалық тәжірибелерін жетілдіру мен бағалауға көмектесу. Оқушылардың қалай оқу керектігін үйреніп, соның нәтижесінде сыни пікір-көзқарастары дамыған, ынталы, сенімді, құзырлы оқушы тәрбиелеу. Бағдарламаны оқып үйрену барысында, осы технологияны меңгерген әрбір мұғалім бағдарламаның негізгі идеясын түсіне отырып, оқушыларға беретін білім мен тәрбиені сапалы жүзеге асырады деп ойлаймын.