Адам өзі үшін не білуі керек ?

Сабақтың тақырыбы: Адам өзі үшін не білуі керек?

Мақсаты: Оқушыларға өздеріне деген қызығушылық туғызу. Өзін-өзі тану мен рефлексияға бағыттау.

Керекті құралдар: дәптер, қалам, қарындаш, алты түсті қағаз қиындылары.

Сабақ барысы:

Сабақты ұйымдастару кезеңі. «Көңіл күй түсі» атты жаттығу. Түрлі түсті қағаз қиындыларын бір-біреуден таңдап алып, оны осы сәттегі көңіл-күйлеріне байланыстыра отырып сипаттайды.

« Мен сенімен сұхбаттасқаныма өте қуаныштымын» атты жаттығу.

Психолог: Сіздер қазір келесі тапсырманы орындауларың керек. Бірінші тұрған адам өзінен кейінгі екінші адамға қолын созып, мен сенімен сұхбаттасқаныма өте қуаныштымын дейді, ал екінші адам өз кезегінде келесі адамға осы сөзбен қолын созады.

Осылайша «тізбектеле» барлығы бір-бірінің қолынан ұстап шеңбер құрады.

Өзіндік таңдау. «Мен кіммін?», «Мен қандаймын?» атты тақырып бойынша жұмыс. (Оқушылар аз дегенде он түрлі жауапты жазып, тілек білдірушілер дауыстап оқиды).

Психолог балалардың жауабын жеңілдету үшін тақтаға сөздер тізімі жазылған сөздерді іледі.

Сөздер тізімі: сүйкімді, әлсіз, жағымды, әділ, мақтаншақ, еңбекқор, ақылды, мықты, қу, күлкілі, шыдамды, сенімді, жағымсыз, ойшыл, жақсы, дені сау, сыпайы, ұялшақ, ұяң, сұлу, тік мінезді, нәзік, күшті, қызғаншақ, белсенді, мейірімді, шыншыл, инабатты, қамқоршы, ұрысқақ, әуесқой, білімді, тапқыр, көпшіл, мінезі тұйық т.б.

Жазбаша жұмыс. «Аяқталмаған сөйлем»

Психолог: Мына сөйлемдерді аяқтаңдар.

Менің ойымша, мен....................................

Өзгелер мені................................................

Мен келешекте...........................................

«Ыстық орындық» атты жаттығу

Психолог: Қазір сендер жайлы өз сыныптастарың не ойлайтынын білесіңдер және өздерің жайлы өз ойларыңмен салыстырыңдар.

Оқушылар кезекпен шеңбер ортасындағы орындыққа отырады, ал қалған ойыншылар « Ол қандай?» деген сұраққа жауап беру үшін жоғарыдағы сөздер тізбегінен сәйкес келетін сөздердің ішінен таңдап немесе өз ойынан айтуларына болады. Кейін оның қаншалықты «Менің ойымша мен.....» деген сөйлемді аяқтаған кездегі жазған анықтамасына сай келетінін анықтау керек.

Сабақты талдау.

Психолог: Бүгінгі сабақты бағалап көрейік. Әркім қоятын бағасын бір қолдың саусағымен санақ бойынша бір мезгілде көрсетуі керек.

Не ұнады?, жұмыс барысында қандай қиындықтар кездесті? Кімді бағалаған қиын? Өзіңді ме өзгелерді ме? Себебі не?

Үй тапсырмасы.

Психолог: Үйде келесі тапсырманы орындайсыңдар. Парақ бетіне «Мен күн сәулесінің астындамын» деген тақырыпта сурет салыңдар. Оны төмендегідей етіп жасайсыңдар. Күннің суретін салып, ортасына «Мен» деп жазыңдар. Ал, сәулелері сендердің қасиеттерің. Оң қасиетіңді қызыл, теріс қасиетіңді көк қарындашпен сызуларың керек.

Солтүстік Қазақстан облысы

Айыртау ауданы

Бірлестік орта мектебінің

педагог-психологі