Конспекты уроков по родной литературе Образ матери в мокшэрзянской поэзии

УПРАВЛЕНИЕ ОБРАЗОВАНИЯ АДМИНИСТРАЦИИ

СТАРОШАЙГОВСКОГО МУНИЦИПАЛЬНОГО РАЙОНА

МОУ СТАРОТЕРИЗМОРГСКАЯ СРЕДНЯЯ

ОБЩЕОБРАЗОВАТЕЛЬНАЯ ШКОЛА

Из опыта работы учителя родного языка и литературы

Черновой Нины Николаевны

СТАРОЕ ШАЙГОВО 2013

Чернова Нина Николаевна - учитель русского, родного языков и литературы

МОУ «Старотеризморгская средняя общеобразовательная школа»,

образование высшее, МГУ им. Н.П. Огарёва, 1986г.; педагогический стаж -23 года, категория - Высшая

Обладатель Президентского гранта в рамках национального проекта «Образование», 2008 г.;

Победитель 1 тура Всероссийского конкурса «За образцовое владение русским языком в профессиональной деятельности для учителей русского языка как неродного» (Белгородский госуниверситет), 2007г.;

Финалист Всероссийского конкурса «За образцовое владение русским языком для учителей русского языка как неродного» ( МГУ им. М.В. Ломоносова), 2008г.;

Участник Республиканского конкурса «Учитель года 2007»;

Диплом Всероссийского фестиваля педагогических идей «Открытый урок», 2009г.

Мокшень литератураса урок

Темась: «Тядянь обрасне мокшэрзянь поэзияса»

Цельхне: ваномс, кода мокшэрзянь поэттне эсь

творчествасост няфнесазь тядянь, авань обраснень;

кодама кяль -валонь тюст сявондихть;

тонафтомс иттнень кайгиста, мялень путозь лувомати.

Оборудованиясь: СД слайтт поэттнень портретснон мархта, картинань репродукцият тядятнень образснон мархта.

Урокть молемац

Тонафтыть валоц:

- Тядясь инь кельгома ломаненьке. Сонь вельденза уставай кельгомась родной крайти, тядянь -алянь кяльти, Родинати. Тядясь и Родинась- тя валхне фкя -фкянь эзда аф явфтовихть. И тя пяк пара: къда ломанць кельгсы эсь тядянц, то сон кармай заботендама и родинанц колга. И тячи урокста ванцаськ тядянь обраснень И. Кудашкинонь, И. Девинонь, Н. Циликинонь, поэзияснон эса.

СД слайд И . Кудашкинонь портретонц мархта.

- 1982 кизоня Иван Кудашкин нолдазе светс «Бславамака, тядяй, кис!» стихонь ветеце сборникоц. Тя од книгать лувомста саят мяльс, што поэтсь сатозе стихонь сёрмадомаса ся тёкшть, конанди мярьгихть афкуксонь поэзия.

Тя сборниксонза И. Кудашкин лакай седиса, лямбе валса морасы шачема ширеть мазышинц, кельгома тядять, Родинать, ломаттнень эряфснон и судьбаснон. Стихонзон эса лама краскада, конатнень тюссна эрект и валтт, кода валтт сонцень авторть мяленза - арьсеманза. «Бславамака, тядяй, кис!» сборниксь панжеви «Спасиба, тядят!» стихотворенияса. Аряда лувсаськ сонь.

СД сайдса появай стихотворениясь.

Спасиба, тядят!

Мастор лангса казесть

Инь питнить тейнек- эряфть и тундать,

Инь мазы валхнень, тядят, тейнек азость

Козк васенцеда лемоньконь кундасть.

Спасиба, тядят!

Мес ся стака пинкнень,

Мзярда дубордсь пушкаса войнась,

Эрь шобдаваня паксяв прашендсть китне

И стяфнесть удом вастста розь волнат.

Тинь срафнесть келес тинголанкнень гайфснон,

Хоть каркневок ни таргасть югу пикст…

Минь марятама, тядят, гордость инксонт,

Спасибатама тёжянень -крда,

Тинь васьфнесамасть парста сембе пинкнень

И озсетяда ваксозонк мргав.

Спасиба, тядят!

Максоде тинь пацят,

Бславамасть кибрясон заря ёткть:

Минь эряфть эзга мольхтяма тинь лацонт

И ломань тналса кочксетяма ётть.

Кизефкст:

- Кода поэтсь няфнесыне тядятнень образснон эсь стихотворениясонза?

(- Поэтсь седиень токай валса лувити панчсесыне тядятнень образснон, азондсыне синь эряфонь аф тёждя киснон- янцнон. Сюконяй сембонь минь лемстонк «стака пинкнень, мзярда дубордсь пушкаса войнась, эрь шобдаваня стяфнезь удом вастста розь волнать, срафнезь келес тинголанкнень гайфснон».

- Кода няфнесы эсь потмаёженц авторсь тядятень образснон няфтемста?

( - И. Кудашкин маряй гордость тядятнень оцю тевснон, седиень лямбоснон инкса)

- Кона строчкатнень эса няеви поколениятнень ёткса соткссь?

(- Минь эряфть эзга мольхтяма тинь лацонт

И ломань тналса кочксетяма ётть.

Тя строчкатнень вельде авторсь няфнесы поколениятнень ёткса сотксть, оттнень лемста надияфни вяре кандомс тядятнень лемснон, эряфть эзга вятемс - мольфтемс синь эрявикс тевснон.)

Тонафтысь:

- И. Кудашкинонь ули нинге фкя стихотворенияц тядять колга «Бславамака, тядяй, кис». Сон моли бъта полатксокс васенце стихотворенияти. Аряда лувсаськ сонь.

Бславамака, тядяй, кис,

Од кис эсь орта лангсонк,

Макст мархтон розень танцти кши

И катка ули канкссон

Нюрямонь кольцянезе монь-

Аф весть сон морсель инксот,

И станяк саслемань онц

Кунардонь шабакс пингстон…

Катк паронь канды идькс улян

Эсь крайнязти, ков шачень,

Кинь мазы пархциень нулац

И зарянза кумацень,

Да валдот вальманзовок шикс,

Сурац и Мокшец седяфт…

Бславамака, тядяй, кис,

Бславамака, тядяй!

Кизефкс:

- Кодама мяльхть -арьсемат кепси поэтсь тя стихотворенияса?

( - И. Кудашкин тя стихотворенияса эняльди тядянцты, штоба бъславалезе эряфонь оцю кис, азолезень эсь валонзон. Тяса авторсь панчсесы тядянцты эсь кельгомань потмаёженц. Сон, сявомок мяльс народнай традициятнень, кемоста верондай тядянь бъславамати, сяс надиязь корхтай: «Катк паронь канды идькс улян, эсь крайнязти, ков шачень…»)

Тонафтысь:

- Мезень колга ба И.Кудашкин афоль тяште, сембе стихонзон эса маряви оцю кельгома шачема масторти, тядяти, ломаттненди.

Сяда тов аряда ванцаськ И.М. Девинонь поэзияса авань обраснень

СД слайдса появай И.М. Девинонь портретоц

Тонафнись азонды:

- И.М. Девин нинге атнай шабаняль, мъзярда кулось тядяц. Ашса - нужаса люпштаф аватнень эзда кие -бъди няфтсь нюрямняса ащи Ильгянь лангс и пъшкядсь: «Путость соньге тядянц ваксс, катк фкя пингть калмавихть кафцьконь нужасна. Кулезень ня валхнень смузю и уноконь кельги Данила атяц, уркстозе корхтайть и поладозе: «Къда Шкайсь нолдазе белай светти, шарьхкотьк, вастовок тейнза аноклась шинять ала». И видекс, И.М. Девин арась народнай поэтокс, сон вестеньге ашезень юксне мяльхнень тядянц -шачфтыенц колга.

Лувови стихотворениясь «Спасиба, тядяй»

Шить стяманц мархта ушеды тонь тевце:

Крьвястят тол и пянакуд уштат.

И васенцекс тон марясак эсь лемцень,

Мзярда кудса нинге аш кушт - кашт.

Тон содасак ся вайгяльть сембонь ёткста

И мярьгат: «Удок тага цють, идняй…»

Мес мяляфтсак, вай, конашкава одста

Пяк стака стямс од ононь апак няйхть.

Мзнайхть иднятне, кие кода машты,

И пара мялезт: тазат синь, шумбрат.

А частонь стрелкась эряскодозь шашты,

Сон, мярьгат, няемс лучензон шить рад.

Тон андсайть синь, симдьсайть и щасайть, тядя,

И кинди ков: детсаду, школав архт.

А конашкава кулемс эрь илядня

Синь кальдерманякс вайгяльнаснасна пархт!

И сизефце тонь ётай тевда меле,

Ульцява молят вяри кепотьф прят,

Спасиба, што тон мезьдовок аф пелезь

Минь масторсонок павазть тиендят.

Спасиба, тядя, лямбе кядцень инкса,

Минь эсонк мес сон симди, анды, щай…

Спасиба, тядя, эряфонкса -шинкса,

Спасиба, тядя, мес тон тядят най!

Кизефксне:

- Кода няфтеви тя стихса тядять образоц?

(-Монь койсон, тядясь - тя ару лихтибряня, коста шабась сявондьсы ушетксонц и кочкай вий, эрьгя, ёньши. Тядясь - тя минь аралаеньке, минь надияманьке, минь кельгоманьке)

- Кона строчкатнень эса поэтсь азонды оцю сюкпря тядяти и кода синь тинь шарьхкодьсасть?

(- Спасиба, тядя, лямбе кядцень инкса,

Минь эсонк мес сон симди, анды, щай…

И.М. Девин тя строчкатнень эса ару валса морасы кельгома тядять. Сонь лямбе кядензон, конатне сонь щазь -карязь, ваннезь нюрямняса и нолдазь оцю эряфс. Въдь тядясь иляды тядякс най.)

- Шабат, кие тяштезень валхнень и музыкать «Сембодонга мазыняй» мороти?

(- Валхне С.В. Кинякинонь, музыкась Н.В. Кошелевать)

Кулхцондови морось «Сембодонга мазыняй»

Тядянязе, панчфкязе,

Сельмаванянь панчсизе,

Ляпе вастонь ацаняй,

Валда ононь пацяняй.

Припевсь:

Тядяй, тядяй, тядяняй,

Маланязон сак.

Моронязень ладяйне

Лемозот исяк.

Ладяйне и мораса,

Мяльняцень аф коласа.

Тядянязе, шнайнязе,

Лямбоняста щайнязе,

Симдиняй и андыняй,

Тячиняй и вандыняй.

Припевсь:

Тядянязе, фкянязе,

Золотань сиянязе,

Виде валонь азыняй,

Сембодонга мазыняй!

СД слайд Н. Циликинонь портретонц мархта.

Тонафтысь:

- Н. Циликинонь лиссь сборникоц «Седись таколфты седить». Лувомок стихонзон, эсост маряви ваймонь - арьсемань кърхкалма, кялень ару таньф. И фкясь эздост «Тядя».

Морафтови стихотворениясь:

Сёксесь олькси кельме сельмоведьса,

Штадот шуфттне, тялоти лядсь вакс…

Эрь шиня кудъётконь тефнень петьсайть,

Шава кудсот озат вальмять ваксс.

Ниле стена ёткса лядоть ськамот,

Пялевес най кодат и кштирдят;

Лафтутнень лангс лаподсть ризфу сталмот,-

Сюнедост кафксть вишкста сиредят.

Аф кунара идьта кудце пяшксель

(Содаф эстейть, кода серьснон кассть),

Сась ся пингсь, и фкя-фкянь мельге эшксстот

Нармонькс лямбе пизостот лийкстасть.

Масторть келес срадондсть янцна- кисна,

Конацка ни меки изь мрда.

Тяни синцень шачихть - касыхть идьсна,

Кажнайсь пиза эстейнза прдай.

Сюре пяльди кядьбесот кштирняце,

Арьсематнень понай сюреть ёткс.

Сельминголет ащи эрь идняце,-

Сюре лаца арась ётксонт соткссь.

Тонафтысь:

- Тя стихотворениять лувомста шарьхкодеви, што поэтсь аф весть ункснезе эрь валть сталмонц, содазе эрть питненц. Сяс, пади, стихонзон морафтомста васендакиге шарфтат мяль аф валонь - кялень мазышить, а мялень видеста, кърхкаста азомать, ваймонь лямботь лангс. Н. Циликинонь стихонза сёрматфт ару кяльса.

Кизефкст:

- Шабат, кодама кялень образнай средстват тинь муде?

(- Сёксесь ольксни - олицетворения, кельме сельмоветть -эпитет, ниле стена ёткса лядоть ськамот - метафора, ризфу сталмот - эпитет и стак тов)

- Кодама пичефкс маряви стихотворенияса?

(- Тя стихса улихть ризнамань мяльёжет. Циликин мусь стама «вальмя сельмоня», конань пачк ваномста тядять эрь шинь тевонзон и арьсеманзон лангс варжакстоват ёфси лия ширде, лия сельмоса. И търкстади, тотназеви седице: ужяль арай тядясь сяшкава, што мяльце ювадемс: «Мес кадость ськамонза тядянтень, ваность: сон эряй аньцек тинь колгант арьсеманзон мархта»)

Мекольдень вал:

- Минь тячи урокста морафтоськ и тиеме анализ стихненди, конат лемтьфт тядяти. А кодама ба тинь валса корхталеде тядянтень колга?

(- Тядязе - сембодонга мазысь. Тядязе -эряфонь казись. Тядязе -пичефксонь лазысь. Тядязе -валда шинязе. Тядязе - эряфс кинязе. Тядязе - танцти кстынязе. Тядязе - сембе вийнязе. Тядязе -лямбе валонь азынязе.Тядянь валняй -мокшень кяльняй.)

Тонафтысь:

- Тя пяк пара, што кельгсасть тядянтень, но тядясь эряви и ужяльдемс, и ванфтомс. И тянди кошардсамазь поэттне эсь таколфты ваймопожфонь стихснон мархта. А синь эрявихть лувондомс. И лувоньбачк аф весть- кафксть дивандазь лоткат то тя, то тона строчкать лангс. Арьсезеват… и кода - бъди сяда ару сельмованфса варжакстат эсь перьфкат, седиёжезт примасайть арьсематнень тядять колга и сяда лац марясак эряфть таньфонц и шарьхкодьсак эряфть питненц.

Мокшень кялень урок 8-це класса

Темась: «Определениясь» (кемокстамань урок)

Цельхне: касфтомс и кърхкалгофтомс иттнень

содамошиснон определениять колга,

касфтомс кельгомать шачема ширети, кяльти,

перьфпяльти

Оборудованиясь: СД слайтт, мультимедиа проектор

Урокть молемац

Тонафтысь:

- Шабат, тона урокть минь тинь мархтонт корхтаме определениять колга. И тячи тейнек эряви лятфтамс сянь, мезе содатама тя темать коряс, и сяда лацкас кемокстамс материалть.

СД слайдса появай задания: морафтость, мусть определениятень; азость, кодама корхтама пяльксса азфт синь.

Мокша ляйсь- тя инь оцю ляйсь Мордовияса. Ётазе ветеце вайгяльбеть. Тумонь пяльть ваксса поювонь пяльське таза. Сокаф умать ланга ласьксь ломань. Эрь шить сонцень тевонза, сонцень пичефксонза. Синь (равжа варсихнень) сенчт моли прясна кърфазь кърфайхть шить каршеса.

( -Оцю ляйсь -качественнай прилагательнайса, ветеце вайгяльбеть- числительнайса, тумонь пяльть, поювонь- относительнай прилагательнайса, сокаф умать- страдательнай причастияса, эрь шить, сонцень тевонза- местоименияса, сенчт моли прясна- фразеологизмаса)

Тонафтысь:

-Шабат, тяни минь мархтонт титяма задания корхтамать касфтоманц коряс.

Арьседа валрисьмот доскаса тяштьф определительнай валзюлмотнень мархта.

Шуфтонь куцю, акша пря цёраня, зърнянь суркс, пара вайме ломань, урядаф пакся, моли ломань, стака канф.

(Шабатне лувсазь валрисьмоснон)

Тонафтысь: Определениятне ащихть цебярь средствакс кяльть мазышинц и выразительностенц няфтемаса. Кодама выразительнай средствакс молихть определениятне?

(- Определениятне сидеста эряйхть эпитеткс.)

- Лувсаськ М.И. Безбородовонь стихотворениянц «Вирь» и мусаськ определениятнень- эпитеттнень.

СД слайдса появай стихотворениясь

Кизонда, вирняй,

Пиже лопаняй,

Пси мани шиня

Шида кяшиняй.

Яксян потмоват,

Шуфттнень еткова,

А пингонь - пингонь

Ляйге, лоткова.

Кулхцондан эсот,

Кода тон увнат

Тифтень лопаня

Модати прафнят.

Мастору лопась

Либордезне прай:

«Вай, курок сексесь

Якшамть мархта сай»…

Тяфта кашторды

Прафкя лопанясь,

Алга шаштомста

Сединь токайнясь.

Седись токави

Марят пилеса,

Кода нармоттне

Морайхть келеса.

Тонафтысь:

- СД слайдть эса максф текст, тейнть эряви точкатнень вастс путомс эрявикс определеният и азомс, мезьса синь азфт.

Ялгат, конашкава …шачема- касома ширеньке! Кодама … и …вирьхть, кодама … и … ляйхть шудихть, мъзяра тяса …паксяда и лугада! А кодама …тяса перьфпяльсь, кодама …кожфсь!

Ломанть Родинац, кода и тядяц,- фкя, и сон мъзярдовок аф юкстави. Аф юкснесазь сонь и …поэтоньке, конат лама… вал казсть Родинати.

(Ялгат, конашкава мазы шачема_- касома ширеньке! Кодама оцю и мазы вирьхть, кодама кърхка и кели ляйхть шудихть, мъзяра тяса пиже паксяда и лугада! А кодама мазы тяса перьфпяльсь, кодама ару кожфсь! Аф юкснесазь сонь и минь поэтоньке, конат лама лямбе вал казсть Родинати)

Тонафтысь:

- Шабат, ваность, кодама мазыхть строчкатне родной краеньконь колга, мяляфтость синь. Тя строчкатне эряфкстыхть тейнть сочинениянь тяштемста.

-Шабат, тейнть максфоль куду задания: кочкамс валмуворкст, коса ба улельхть определеният.

(-Маштыть кядьса тевське солай.

Цебярь ялгась сембодонга питни.

Седиста сай валсь сембодонга мяль

кеподи.

Тундань кельги улят - пара вал кулят.)

Кодама короц - стама и мороц.

Цебярь азоронди кизоть аш кальдяв пингонза.

Тялонда лама лешу шида - кизонда лама кшида.)

Кизефкс:

- Мезень колга корхтайхть тя валмуворксне?

(-Мокшень валмуворксне латцефт сембе эряфть колга. Синь няфнесазь, конашкава кельгсы эсь шачема ширенц, Родинанц ломанць, сонь тевонь кельгоманц.)

Урокть кемокстамац

Кизефксне:

1. Мезти мярьгихть определения?

2. Кодама корхтамань пялькс мархта эряй сотнеф определениясь?

3. Мезти мярьгихть определяемай вал?

4. Мезьса азовихть определениятне?

Кудонь тевсь: тяштемс аф оцю сочинения родной крайть колга, сувафтомок определеният

Ила: «Монь Шачема - касома велезе»

Цельхне: - кърхкалгофтомс иттнень

содамошиснон шачема крайть,

тядянь - алянь кяльть и

литературать кельгоманцты,

ванфтоманцты и содаманцты;

мумс седиень токай яння.

Оборудованиясь: мультимедиа проектр, СД слайдса мокшень кяльть колга

писательхнень цитатасна,

мокшень нардама,

суронь пачат, поза,

лихтибрянь ведь, шабатнень

стихотворениясна,

конатнень арьсезь синць.

Илась ушеды «Монь велезе» Анна Волгаповать стихотворениянц мархта

Шачем велезе коль касы,

Пара мяльса эрян тяса.

Вакска шуди кельме ляйня,

Сон аф маця и аф тяйня.

А лугадонза, ватт, мъзяра!

Ашень няенде мон тъняра.

И ульцядонза мяк вете,

Афи пачкодят мянь пети…

Илать молемац.

1 - це лувись: Кельгома ялгат! Тячи минь пуромоме аф стак. Карматама корхтама эсь шачема - касома уженяньконь, кяльть козяшинц колга. А илать лемдеськ «Монь шачема - касома велезе!».

2- це лувись: Да, ялгат, эрь ломанть ули эсь шачема - касома уженяц, коса сон шачсь, азондозень васенце валонзон, тиезе васенце аськолксонц. Тяфтама родной уженякс тейнек арась Сире Теризморга веленьке.

3 - лувись: А тинь арьсекшнеде вестенге, мес тяфта лемтьф веленьке? Къда кие аф содасы, кулхцондость:

- Сире Теризморгась -мокшень сире веле. Васенце лятфнематне велеть колга канневихть 16 векти. Тяниень велеть вастса кассть туста шобда вирьхть. Пяк сидеста вирень керома сашендольхть ломатть велетнень эзда. Атяньке -бабаньке ульсть Атерень. Синь стане жа састь вирень керома и илядсть тяза эряма. Появась аф оцю веленя, кона ащесь вете -сисем кудста. Пяк ламос тя веленять ашель сонцень лемоц. Вов мезе азондыхть сире ломаттне:

- пяк кунара Севонць ульсь кели и кърхка. Сидеста аватне сашендсть ляи щамонь муськома, а сембе вирень керыхне ётцесть ляйть туркс, синь ётксост ульсть и руст. Фкя тяфтама рузонь алясь кармась ётама ляйть туркс и няезе веленять. Кармась юватькшнема ляйть тона ширде муськи авати: «Как называется ваше село?» Авась ашезь мархта рузкс корхтама и сяс ашезе шарьхкоде, мезе веши эздонза алясь. Авась арьсесь, што алясь ёрай ётамс тя шири и мярьгсь: «А вон, через морга» (Ляйть туркс веляфтфоль оцю моргу шуфта.) алясь арьсесь, што велеть лемоц «Черезморга». Тяни велеть лемоц азови сяда мазыста - Теризморга.

Морось «Велень койньке»

Велень койньке минь козят,

Инжихненди кенкшне панчфт,

Тейст - шовса шады поза,

Суронь пачат моркшнень лангс.

Припевсь:

Озак, озак.

Симке шову позать.

Сиват суронь пача -

Кода оду шачат.

Уфсесть вармат, шиське пицесь,

Киза анды тундань шись

Суроть видеськ - ушедсь пиземсь-

Эхи и суроньке ульсть вишкт!

Припевсь:

Пидихть пачат, пидихть пачат,

Эздост кепси танцти шиньф.

Хоть и сексесь пяндраль, начколь-

Сероньконь урядаськ минь.

Прпевсь:

(Шабатне лихтихть пачат и поза, каванясазь сембе инжихнень).

4- це лувись: Эрь велеть улихть сонцень содаф вастонза. Тяфтама вастокс минь лувсаськ мокшень нацинольнай центрать. Центрась панчфоль 1992 кизоня, а 2007 кизоня строясть нинге крестьяинонь куд, коса няфтьф сядонголень сембе утварсь. Центрать потмоса панчф этнографическяй музей, ули цех, коса тяниге аватне кодайхть мокшень котф и сёрмадыхть панархт. А марялесьте, кода мазыста морай Сире Теризморгань народнай хорсь. Аряда кулхцондсаськ вайгяльснон. (Морави «Теризморга веле» морсь)

5-це лувись: Лама велесонк пара вастта, аньцек сокорсь аф няйсы веленязень мазышинц, конац кизоть эрь пингстонза мазы эсь лацонза. Вов и тя мазышинц колга карматама тячи корхтама.

6-це лувись: Вов кода няйсы эсь веленянц мазышинц тялонда Танясь:

Тялось сас, тялось сась.

Кельме варманя уфась,

Ловса вельхтязень кинятнень,

Шуфттнендиге палят щафтсь.

Иттне тага нурдоняса

Келес курькснема сърхкасть.

7-це лувись: Да, ялгат, мазы веленьке тялонда эсь иланзон, налхксеманзон, якшамонзон и мазы моронзон мархта.

«Лаймоня» идень фольклорнай ансамблсь морасы «Пайгоня» мороть

1. Айда, ялгат, озатам

Теждя нурдоняс

Мазы мора моратам

Ичкоздень киняс.

Припевсь:

Вишкста арды айгорнясь

Морсетяма минь.

Горняй, горняй, пайгонясь

Диньголь, диньголь, динь, динь.

2. Солайхть акша ловнятне

Стирень щёкаса

Марявихть гармоньятне

Сединь токайхне.

Припевсь:

3. Поза, пачат, кельксемат,

Кайги морот ульсть.

Лишмось арды. Мельганок

Пяльди ловонь пульсь.

Припевсь:

8-це лувись: Аделави кельме тялось, а мельганза монь веленязон шятяй тундась. Марнек перьфпяльсь съргози, пеедезеви кувака удомать эзда.

Сокорова Светась азондсы эсь стихонц:

Вага кода сась тундась:

Ловнясь солась и юмась.

Вага кода сась тундась:

Марнек панчфиясь лугась.

Ирина Видясовась:

Тундась сась! Тундась сась!

Лямбе кожфкаса уфась.

Мешкясь мешкудняста лиссь,

Мазы панчфкять лангс лийкстась.

9-це лувись: Да, пяк мазы минь веленьке тунда, панжи марнек перьфпяльсь, мярьгат токафтсь кядь эзонза ёфксста волшебник.

Морави «Маень вальс» морось.

1. Панжихть марлюфне,

Вишняксне панжихть.

Ков тят варжакста - порф, акша порф.

Аньцек вальмятнень

Шобдава панчсайть

Эзк сувай пялот майсь,

Мазы морсь.

Припевсь:

Маень вальс, маень вальс.

Ваны весяла

Од стирень ванфсь.

Маень вальс, маень вальс.

Маень вальс, лямбе майсь-

Маень вальссь.

2. Ваны весяла

Од стирень ванфса:

«Учсемайть, учсемаить и мон сань»

Шиненяц.

Келес качады панчфонь,

Кудсот пульхки

Медьарувонь таньф.

Припевсь:

3. Тячи марлюфне

Вишняксне панжихть.

Ков тят варжакста - порф, акша порф!

И ни аньцек

Тон вальмятнень панчсайть,

Эзк сувай пялот майсь-

Мазы морсь.

Припевсь:

10-це лувись: Пяк пара кизонда веленясон. Рана лисьф шинясь валсы эсь валдсонза марнек шачема уженязень. Веленязень эса аф лотксихть нармонень вайгяльхне. Виреньконь эса кенерькшнихть кстыхне. Ару шуди ляйнятнень эса няевихть емла калнятнень уендемасна.

Пивкин Андрей лувсы эсь стихотворениянц:

Кельгса, кельгса кизоть мон!

Пяк ни цебярь, мазы сон!

Кизонда пяк лямбоня-

Пара якамс кяпоня.

Танцтихть кенерьф кстыхне,

Кочкайхть эсост иттне.

11-це лувись: Да, ялгат, кизонда кивок аф ащи тевфтома.

Сонць тя мазы пингсь кепсесы тянди мялентень.

Морось «Кизонь пиземсь»

1.Кизонь пиземсь, лямбе пиземсь

Эше ваймопожфса сай,

Пульса почетф нару кизень

Азоравакс нардай-штай.

Припевсь:

Пиземнясь, пиземнясь,

Кизонь лямбе пиземнясь,

Кизонь пиземсь, лямбе пиземсь,

Кизонь лямбе пиземнясь.

2.Ару ванфса ваныхть панчфне,

Лангсост расанясь люкай.

Эрь, а таньфса, эрь, а таньфса

Седи потмаксс мянь сувай.

Припевсь:

12-це лувись: Кой-кит арьсихть, бъта сексенда ломаттнень колавихть мяльсна. Аф, тянь мархта аш кода согласиндамс. Сексесь мазоптсы монь веленязень эсь лацонза. Зърнянь тюсса валсы марнек перьфпяльть. Бъта акша паляса стройнай ронга стирьхть, ащихть виде келунятне, а прязост сотсазь сексень зърнянь эсь руцяснон, наряжайхть бъта инжиень учема.

(Шабатнень сексеть колга стихотворенияснон азондомасна).

Макаров Саша:

Вага кизонясь юмась,

Сёксесь вармать мархта сась.

Тюжя лопанясь лийкстась,

Лиезь кядезон сон прась.

Лопанять мон куду кандса-

Кельгозь тядянязти казьса.

13-це лувись: Ялгат, веленьке пяк мазы. Вага, кода корхтай тянь колга Каргин Федясь:

Монь велезе инь мазы,

И цебярь эрь шиня,

Сон тейне шачем мастор,

Россиянь уженя.

Эсь масторозень кельгса,

Въдь ваймоста аф нельгсак,

Розьбрятне стакат тяса,

Россиянь уженяса

14це лувись: Да, ялгат, пяк пара, што велесонк ванфтови мокшень кяльс, коеньке -обуцяньке. Кулхцондость Леня Ямашкинать стихонц «Кялезень колга»

Шачема -касома кялезе!

Кельктянза марнек велезе,

Валхне тёждяста моравихть,

Вельдест кальдяфне колавихть.

Шачема - касома кялезе!

Кеподи фалу мялезе:

Васьце валть мокшекс азыне,

Нинге шабакс тейть казине.

Шачема - касома кялезе!

Ванондан лангозт пелезне,

Прясон коль шаронды мялезе:

Афоль юкстав, вай, кялезе!

Шачема -касома кялезе!

Кельктянза марнек велезе.

Кода аф кельгомс тяконять,

Сембода маланять - маконять!

15-це лувись: Кельгома ялгат, эсь иланьконь минь шумордасаськ сиде мороняса

- Эрька, ялгай, шяяреньконь

Понасайнек локшекс,

И кштитяма, моратама

Минь школасонк мокшекс.

- Дайка, ялгай, морсетяма,

Кайгиста юваттяма.

Сембе инжихненди тячи

Веленяньконь шнатама.

- Дайте васта, дайте васта,

Сембе фталу пототада,

Кие ёрай лисемс кштима-

Вага тяза ётада.

- Кельгса, кельгса Мокша ляйть,-

Арунят волнанза.

Кельгса, кельгса мон гитарать,-

Весялат струнанза.

- Эрятама -ащетяма

Теризморга велеса,

Кштикшнетяма, морсетяма

Стирень- цёрань келеса.

- Кштиме - мораме минь лама,

Эряфсь моли- кевори,

Тядя кяжия- тутама,

Ваймамска вдь эряви.

Тонафтысь: Шабат, шумордавсь минь иланьке. Тячи кулеме мархтонт лама мокшень мора, стихотвореният, легендат. Тинь няесть, кодане кельгсаськ и шнасаськ эсь веленьконь

Лятфтасаськ тонафнефть

Заданият мокшень литературать коряс 6-це классонди

1.Кодама жанрань произведеният сувсихть фольклорти?

2.Мезьса явихть фка - фкада фольклорнай и литературнай ёфксне?

3.Лемдесть произведениять и сонь авторонц геройхнень коряс:

а) Мика, Микань тядяц и аляц, атя.

б) Дёбай Миколь, Маря, Палька, Лапшов.

в) Тимофей Иванович, Кеша, щятяц, Гришкась.

г) Уняша, Дурбай, Пичай.

д) Витова, Варда, Вежяля.

4.Кодама группава явондовихть ёфксне содержания коряс?

5.Кинь ня псевдонипне?

Бебан М.А., Виард В.И., Артур Моро, Н. Эркай, Илька Морыця, Маркань Федясь.

6.Кие тя поэттнень и писательхнень ёткста шачсь Старошайговскяй районца?

П.И.Левчаев, К.Г. Абрамов, И.М.Девин,Р.К.Орлова,В.И.Мишанина, И.Кишняков, Ф.Пьянзин, В.Родькин, А.К.Мартынов,В.Гадаев.

7.Кие сёрмадозе национальнай гимнать валонзон и ладясь музыка?

8.Кинь мокшэрзянь поэттнень ёткста лемнесазь «мокшень Есенинкс»?

9. Азость, кодама колма родова явови литературась?

10.Кодама кизоня и коса васенцеда кармась лисендема «Валда ян»(тяни «Мокша») мокшень журналсь.

Ответтне:

1. Ёфксне, содама ёфксне, лувомкатне, кяльяжамкатне, валмуворксне, легендатне, преданиятне и стак тов.

2. Литературнай ёфксть ули автороц, фольклорнайть аш;

Литературнай ёфксть кивок аф полафтсы авторда башка, фольклорнайсь полафневи, ётнемок фкя азондомать эзда омбоцети.

3. а) Ф.М.Чесноков «Кирьхкс Мика»;

б) П.С.Глухов «Кедровай пяштть»;

в) В.И.Ардеев «Кешань приключениянза»;

г) Д.С.Куляскин «Пичай»;

д) В.И.Радаев «Варда».

4. а) Жуватань колга;

б) эрямакоень;

в) чудань.

5. Бябин М.А., В.И.Ардеев, А.М.Осипов, Н.А.Иркаев, И.П.Кривошеев, Ф.М.Чесноков.

6. И.М.Девин, Р.К.Орлова, Ф.Пьянзин, В.Родькин, В.Гадаев.

7. Валхне - С.Кинякин, музыкась - Н.В.Кошелева.

8. М.И.Безбородов.

9. Эпос, лирика, драма.

10. Пенза ошса 1927 кизоня.

Прянь синнемка 5-це классонь мокшень литературать коряс.

Пяшкодесть прянь синнемкать и тинь лувсасть, кодама Старошайговскяй райононь школаса тонафнихть аноклаенза.

1. В.И.Виардонь «Вирень вайгяльхть» азксса главнай геройть лемоц.

2. «Кши кочам», «Стихт Нумолов Михалань колга» произведениятнень сёрмадысна.

3. К.Г.Абрамовонь поэтическяй произведенияц мокшэрзятнень кунардонь эряфснон колга.

4. «Аляка лефкс» азксть сёрмадыец

5. Ёфксне шачема и эряма коряс эряйхть народнайхть и …

6. Кафта слогонь стопа, коса ударнай васенце слогсь.

7. Басняса авторть мекольце арьсемац сянь колга, мезе ёрась няфтемс и азомс.

8. Кривошеевонь лемоц.

9. Перьфпяльть описанияц.

10. Стихса морафтомста мекольдень вал петне кулевихть фкакс или фкя лаца, мярьгихть…

11. Устнай народнай творчествати лиякс мярьгихть…

12. Я П.Григошинонь «Вирязонь унокоц» азксса пинеть лемоц.

13. «Ёжу келаське» пьесать сёрмадыец.

14.Мокшэрзянь баснянь жанрать ушедыец.

15. Ф.С.Атянинонь «Сельведь-богатырь» ёфксса главнай героинять лемоц.

16. М И.Безбородовонь стихотворениянц лемоц.

Ответтне:

1.Вася 9. Пейзаж

2. Девин 10. Рифма

3. «Сараклыч» 11.Фольклор

4. Чесноков 12. Дружок

5. Литературнай 13. Голенков

6. Хорей 14.Бебан

7. Мораль 15. Маруня

8.Илья 16. «Вирь»

Мокшень кялень урок 6-це класса

Темась: «Нарицательнай и собственнай существительнайхне»

Цельхне: знакомондамс шабатнень

нарицательнай и собственнай

существительнайхнень мархта;

кърхкалгофтомс шабатнень содамошиснон

Мордовиянь ошнень, ляйхнень,

касыкснень колга

Оборудованиясь: СД слатт, мультимедийнай проектор

Урокть молемац

1. Учительть валоц темать коряс:

- Сушествительнайхне эряйхть нарицательнайхть и собственнайхть. Нарицательнайхне тяшневихть строчнай букваса, а собственнайхне - заглавнайса. Сяда тов лувови 7 параграфсь, коса азондови максф темать коряс (учебниксь «Мокшень кяль» 6- це классонь, Т.И. Ломакина, Г.С. Иванова)

Материалть кемокстамац:

Тиеви 36 -це упражнениясь: мумс собственнай существительнайхнень и азомс, мезень лем синь азыхть.

3. - Тонафтысь:

- Васенце газетась «Чинь стямо» эрзянь кяльса лиссь Симбирскяйса 1920 кизоня. «Валда ян» мокшекс газетась лиссь 1928 кизоня Пензаса, а 1931 кизоста сявомок, сон кармась лисендема Саранскяйса и лемдезь «Колхозонь эряф. Васенце журналсь лиссь эрзякс Самараса 1929 кизоня, лемоцоль, кода и тяни, «Сятко».

4.- Тяни, шабат пяшкодьсаськ кроссвордть, кона появай СД слайдса. Тейнть эряви содамс касыксонь, Мордовиянь ошень, ляень и писателень лепт.

1. Мордовияса ош;

2. Мордовияса инь оцю лйсь;

3. Вирень касыкс, кона сёксенда пяк мазы;

4. Мордовиянь народнай поэт, кона тяштезе «Сенемас» стихотворениять;

5. Мордовиянь гимнать валонзон тяштисна;

6. Кода мярьгихть «клён» шуфтти мокшекс?

7. Кодама тишень лемса лемтьф И.М. Девинонь романоц?

8. Паксянь сёра;

9. Мокшень идень писатель

СД слайдса кроссвордсь

Ответтне:

1. Темников;

2. Мокша;

3. Пизелкс;

4. Девин;

5. Кинякин;

6. Ушторкс;

7. Нардише;

8. Люкшя;

9. Пинясов

5. Собственнай лепнень тяштемаснонды лезды и тяфтама задания: СД слайдса появайхть кизефкст, конатнень лангс эряви максомс письменнай ответт.

- Кода тонь аляцень или тядяцень лемоц?

- Коса тон эрят? (велеть лемоц)

- Кодама книгат тон лувоть?

- Кодама журналхт и газетат тинь семьянте сёрматфтсь?

- Кодама ляй шуди малавантт?

(Кизефкснень лангс эряви максомс полнай ответт)

6. Шабат, доскати повфтаф Мордовиянь кархтась, ваность и азода собственнай существительнайхть, коза ба сувальхть ошень, эрьхконь, ляень, велень лепт.

6. Материалть кемокстамац:

- Кодамот эряйхть собственнай существительнайхне?

- Мезень лаца аф фкат собственнай существительнайхне нарицательнайхнень эзда?

6. Кудонь тевсь: сёрмадода сочинения тяфтама тема лангс «Минь веленьке».

Критикась и литературоведениясь

Паваз тяштень вешендезь…

(Мяльхть- арьсемат Рая Орловать «Пизелонь каштаз» сборниконц колга)

Улихть поэтт, конатнень стихснон лувондолить и лувондолить, сяс мес эрь строчкаса кяшф пяк кърхка смузь, маряви кати - кодама потмошинь, седиень вий, мярьгат, бъта поэтсь сонць марнек эряй стихонзон эса.

Монь койсон, тяфтамот стихонза Рая Орловать.

Аф пяк кунара лиссь сонь поэтическяй сборникоц - «Пизелонь каштаз». Мялезе азомс аф лама валня тя сборникть колга.

Книгаса вейхксогемонь кафтува стихотворения. Синь темань- мялень, азома виень коряс аф фкя лацот. Но эрь стихса няеви поэтессать сонцень ёнень -ваймонь почеркоц, кяль- валонь мазышиц.

Сборниксь панжеви «Шачема велезе» стихотворениять мархта. Васенце строчкатнень эздовок няйсаськ поэтессать кельгоманц шачема уженянцты. Лямбе валхне, мярьгат, лисихть седистонза. И кулеви эздост народонь моронь вайгяль:

Шачема велезе, И стирень морняса,

Мес ащат пелезне? Илядень заряса

Павазу нармоннякс Вайгяльцень маряса.

Няемс тонь мялезе. Шачема велезе -

Тялонь кувака веть Серезе, келезе,

Коввалдонь толняса Симдизе -тряйнязе,

Акша лов орняса Тядязе, Шкайнязе,

Вирькужень райнязе.

Лама стихт Рая Орловась, кода пъцтай и сембе поэттне, тяшти идькс пингонц колга: кодама тя пингсь павазуволь. Кой - кона обрасне бъта и содафт, а ламотне кайгихть бъта васенцеда. И въдь верондат, што сахардонга танцтиста марявсь ловонь панда пряста курькснемась.

Эряйхть мялямсон тялот, Мадома ингольдень ёфксне!

Аф ня тялотнень лацот. Эрнять мяляфтса тя пингс.

Ламоль ломаньда пялонк, Эвфтсть Виряватне, Офттне,

Масторганк васттне ацафт. Кельгине Ванять - кяпоть.

Минцень шабадонк сисем, Шобдавань ловонь фальхне-

Сувсесть делянкань ваныхть. Сахаронь акша панттне,

Тядязе аньцек пицесь: Акшет кудбрява шальхне,

Модамарьсь, капстась - анокт. Ялганди келихть яттне.

А кодама седиень таколфтыхть «Тядязти» и «Кафксоце мартсь» стихонза. Тяса Рая Орловась панчсесы седиень таколдоманц тядянь кельгомать и тядянди кельгомать вельде. Лувсайть ня строчкатнень:

Сембодонга цебярь стихозе изь ладяв,

Сембодонга мала ломанезе тусь.

«Тядянязе -аванязе, - мон ювадян,-

Ваймоняце - коволсь коза васта мусь»

Исяк улень кудсонк, станяк ащи сембось,

Алязе урядцень кирьдсы коса -повсь,

Каванямазь сиресь пянакудонь лямда,

Аньцек сяка арьсян: улелеть ба тонць.

Васьфтелемасть, тядяй, нинге орта лангса,

Кизефтелеть савор: «Сизеть, шять, идняй»

Казелемасть, тядяй, ваймонь пети ванфса:

«Унокозе аля ни, ётанзе ,стирняй».

И сельминголет эвондай сембодонга кельгома ломанце -тядяце. Пара, кинь тядяц нинге шиса, а поэтессась кунара ни илядсь тядяфтома. И тянкса, маряви, кода седицень ангордасазь ня строчкатне. Аф стак сборниконц Рая Орловась лемдезе - авозлазе тядянцты - Мария Семёновна Орловати.

Мокшэрзянь поэзияса лама стихотворенияда сёксеть колга. Рая Орловать стихонзон эса няеви перьфпяльть и ломанть ёткса соткссь, маряви пичефкс, ризф, мес курок сёксеть полафтсы тялось:

Мон шачень козя сёксень менель ала,

Вирь мацихне срхкафтольхть оцю кис,

Ужяльдезь келусь ацась лопат прялон,

Шра лангса озонтфоль од сёронь кшись.

Нюрямозень люкафнезь судемф вармат,

И пеедсь вярде оцю Заря тяштсь,

Сяс рана сяньге шарьхкодема кармань,

Мес пиземсь стихонц сельмоведьса тяштсь.

Иляденьшовор вирьхне тошказь ёфксснон,

А келунятне вятнесть хоровотт,

И наряжаф Вирявась кштишендсь ётксонк

(Мон тя пингс няендян тянь колга отт).

Пингсь оцю пацяв нармонькс лиезь лии.

Мзярда меки тяза сон мрдай?

А эряви сняра нинге тиемс…

Вдь афи фатят, кода тялось сай.

Тя стихотворениясь козя потма мялень и кяль- валонь ширде. Тяса лама валда, конат кандыхть эсь эсост оцю эмоциональнай смузь: «ужяльдезь», «озонтфоль», «судемф» и лият. Синь тисазь стихотворениять нинге сяда

поэтичнайкс. И сяс сон лувови ляпоняста, ризнафтозня.

Поэтессась шарфни мяль и фольклорти. Сон шачсь велеса, сяс лац содасыне народть коензон, сяс стихонзон эсовок лама народнай образда:

Менели лиссь акша ковнясь,

Удость нумолхне вирнява,

Тейне венептсь пяште товнят

Зарять лисемста Вирявась.

Рая орловать аляц ульсь Великай Отечественнай войнаса. Маряк, сяс сон ашезе ёта войнань темать. «Азонтк, аляй» стихотворенияса сон эняльди алянцты:

…Азонтк, кода воявать войнаса?

Азонтк, мес тейть казьфоль тя медальсь?

Азонтк, тяконь кизефнень иднякса:

Стакаль «студебеккеронь» педальсь?

Тейть кемзисемголь - кундайть «баранкать».

Вете кизот арнеть толонь пачк.

Виде валхт азсь Опелень цыганкась:

«…Эряфцень кувалмос ардат шанчк…»

Азонтк, аляй, мес тон кашт аф молят?

Ёрдак сталмоть, пичефксцти сай пе.

Кда, аляй, максолезь тейнь волять,

Сембонди тейнть максолень дворецт…

Кунара ётась ся войнась, а фронтовикненди тячемс мяляфтовихть войнань киттне - яттне, тячемс вень- вень аф кадсазь удома войнаса няйфсь, а сембодонга пяк - войнань ранатне.

Тя темасовок, конань коряс тяштьфоль ламодонга лама стихотворенияда, поэмада, Рая Орловась музень сонцень, аньцек эсь валонзон.

Рая Орловать поэзияса няеви сонь касомац, сельмованфонь кърхкалгодомац, смузенц виензамац. Поэтессась кошярясы ломанть варжакстомс пильгалонза, шарфтомс фталу, няемс ся кить, конань эзга мольсть атянь атяньке, Штоба афолеськ юксне эсь юроньконь, радняньконь, шачема вастоньконь. Няеви, што тя сембось сярятьфтьсы поэтессать седиенц:

Содак родонь - плямань сюрекить,

Тядянь варжама лихть масторбеста,

Аньцек эста аф юмафтсак кить,

Павазу улят тон аньцек эста.

Сборникса сембода лама стихта кельгомать колга. Рая Орловать стихонзон эса кельгомась фалу кати - кодама ризфу:

Ульсь сембось ки лангса: и сёксе, и май,

И павазонь тяштезе тячемс аф муви,

Цють валдонянц няфтьсы и тага юмай…

Катф ава, нинге кельгома учсят,

Тон улемс павазуста нинге ёрат.

Вдь нинге улихть цебярь алят, цёрат,

Катф аватне - нят сёксень шава сатт.

Тага пизем.

Ушедонь кельгомост пизепнень.

Кода сизень.

Сизефтихть тоньфтомот кизотне.

Орловась шачсь поэтическяй крайса, коса пяк кельгсазь и морсесазь мокшень моротнень. Сяс тянемс мяляфнесыне синь гайфснон велеть эзга, моронь кельги, морама машты велеряенза, бъта кошардыхть поэтессать эса тяштемс седи ваксстонь строчкат колгаст. «Мокшень морось». Тя пяк удалаф стихса Рая Орловась лятфнесыне Теризморгань хорть, композиторть Сураев -Королёвонь моронзон, Девинонь моронди тяштьф стихонзон. Сембе ня ломаттне сонь земляконза.

Эрьда, ават, ушеттама мора,

Катк эрь седити сон тяштекс прай.

И катк шачи тядде лама сёра,

Козя ули Сенемасонь крайсь.

Сенемасокс эсь масторонц лемнезе Илья Девин.

«Пизелонь каштаз» сборникса лама нравственнай и философскяй вешфкста. Надиятама, што и сяда тов Рая Орловась кармай кеняртьфнемонк эсь мазы и козя стихонзон мархта.

Н. Чернова

Ила «И.М. Девинонь панжи лайме порань уженяц»

(Лемтьф поэтть шачема шинцты)

1-це вятись:

-поэзиясь - тя седи ваксстонь корхнема инь мала и кельгови ялгацень мархта, шачема крайть, родной масторть, перьфпяльть мархта, тя - потмонь панчсема и ваймонь козякофнема, тя эряфть кинзон ункснемасна и пингть аськолксонзон марямасна.

2-це вятись:

-тячи иласонк карматама корхтама И.М. Девинонь поэзиянц колга, коса няфневи шачема -касома краец. Сонь поэзияц - кърхка эшинь потмакс: эздонза амолятама ваймонь эшентьфти кельме и ару веднявок.

3-це вятись:

- И.М. Девин шачсь поэтическяй крайса - Сире Теризморга Велеса. Велеса, коса кемот народнай культурати, народнай обуцятненди и моротненди кельгомань традициятне. Кельгомась мороти, мокшень кяльти кърхкаста сувась тяса и Илья Девинонь ваймос.

4-це вятись:

- аряда кулхцондсаськ поэтть сембодонга келгови мокшень моронц «Алямова Просать» (морави морсь)

5-це вятись:

- И.М. Девинонь валоц мзярдовок аф пандсы пилецень, сонь тундань васенце шудерькскять лаца, кона кашторкафтома ловонь ацамть алга валом- валом карай эстейнза ки воляти, кели лаймотненди. Тя валоц ару кожф лаца эслек сувай ваймозт и эжттянза.

6-це вятись: «Сенемас»

Сенемасса сенем менельсь,

Сенемасса сенем кожфсь.

Сенемасса панжи келес

Пильксонь путозь сенем розсь.

Сенемасса сембось сенем:

Куттне, саттне, эши ведсь…

Нява - сенем паксясь венемсь,-

Аяш ушетксоц, аш пец.

Сенем сельмот, валда мзолфт,

Ков тят варжакста, кундат.

Сенемасса сенем пизепт

Валыхть сёксенда, тунда.

Сенемасса шиське сенем,

Сенем нарфса кизоньберьф.

Сенемасу тердян сембонь:

Сада тяза, тяда пель.

Сенемасс- тя сенем веле,

Сенем Север, сенем Юг…

Эряфса аф шарозь -велязь

Тонцень сенемацень мук.

1-це вятись:

- поэтсь вестеньге ашезе юксне эсь шачема - касома краенц- Сире Теризморгать, сонь кели ульцянзон, паксянзон, Севонь ляйнять, коса кизонда ётафнезе сембе шабакспингонц. Мъзярда Илья Девин сашендсь эсь велезонза инжикс, раднянзон кенкшсна пъцтай ашесть сёлгондов. Пялост сувсесть поэтть ялганза, лувиенза, кажнайть мархта корхнесь седикс -ваймокс. Сон лемнезень тя васедематнень ару лихтибрякс, конат макссесть творческяй эрьгя, од темат.

2- це вятись:

Севонь ляйнясь аф крхка, аф кели,

Малаванза паксят и лугат.

Улит тоса мокшень сире веле,

Эряенза, марнек, сазорхт -братт.

3-це вятись:

- Сире Теризморгаса пяк кельгсазь и морсесазь мокшень моротнень, синь гайфсна маряви мянь ниле вайгяльбет. Морама машты велеряенза бъта кошардозь поэтть тяштемс седи ваксстонь строчкат колгаст. И морсевсь моронзон эса мастор лангонь мазышись, перьфкат якай ломаттне.

4-це вятись:

- Аряда морасаськ И.М. Девинонь моронц «Панжи лайме порась», конанди музыкать тяштезе поэтть землячкац Н.В. Кошелевась.

Панжи, панжи лайме порась

Веле песа Эрь тунда.

Ожу, ожу, мазы мора

Порать колга ушедан.

Азондса, кинь тоса кельгонь,

Кочкань лаймарень кудрят

И аф кяшеньса, кинь мельге

Сёксенда кучан кудат.

Сенем сельме, виде ронга,

Тевса- шиса тёждя кядь.

Ётань шачема районга,-

Аяш лацонза иля…

Тяни веле песа порать

Панжеманц аф учендан.

А од цёрань мазы мора,

Сяка марян эрь тунда.

5-це вятись:

- Да, тундась, - кода корхнесь И.М. Девин, - эряфсонк сембе пара ушетксоньке, а добрайшись - сембось ся, мезьса эряй ломанць и мезсь валдоптсы сонь». Поэтть стихонза салатядязь эсь мяльвийсост, мокшень кялень арушиса.

6- це вятись: Тядянь - авань масторть кельгсян

Тядянь- авань шачем крайняй,

Сетьме зарянь уженяй,

Вельхкссот сенем менельсь гайняй

Кизонь мани Эрь шиня.

Ётай- потаень кибряса

Варьхмодема пингова

Ноляй медяруня расась

Панжи лаймова -кува.

Анцяй путерьксть эса палы

Атямъёнгонь тюсса шись.

Сельмованфцень салазь салай

Горизонту моли кись.

Сетьме шобдавась перьфпяле,

Сяфть да хоть штатол уфак,

Сереми сон - тят ужяле,-

Кядень апак курмоштак.

Киксни -хиксни лаймоть вельхксса

Цибозсь, - анай пиземня…

Тядянь -авань масторть кельгсян

Июлень мани эрь шиня.

1-це вятись:

- Илья Девин пяк кельгозе эсь родной кяленц. Сон корхнесь: «Мокшень кяльть «потяйне» тядязень лофцонц мархта, сон сувамань сяшкава, нъльня, кода мяляфтса фронтса, лия кялень ялганень ёткса удомста онцтонга корхнень мокшекс».

2-це вятись:

- Аряда азондсаськ Рая Орловать стихотворениянц «Мокшень кяль», коса пяк седиень ризфса азондови минь кяленьконь колга и коса ули надияма…:

Минь васень валоньке ульсь «авай»,

Сон мокшень ляпе кяльса азфоль.

Тя кяльста валда шись уставай,

Сон масторть мархта марса казьфоль.

Минь шачем кяленьконь юмафтоськ,

Сонь срафтоськ масторбевань ошка.

И потмаксфтома лотку прафтоськ,

Аф шарьхкодьса- мезь келусь тошкай.

Катк цебярь вастта мирса лама,

И пульхкихть рузонь валхне мяльсон,

И кеман пяк, минь пуроптама

И азсаськ видеть мокшень кяльса.

3-це вятись:

- Улихть ломать, конат корхнихть: къда саволь оду эрямс эряфозе, мезевок афолень полафта, тиелень станяк, кода ульсь. А Илья Девинонь мяленза лият: «Къда саволь тяфта тиемс, петелине сембе эльбятьксонень, конатнень ноляйне, сяда лама кадолень касыкседи». Эряфти кельгомась, ломанти паронь арьсемась творчествасонза кодаф якстерь сюреса.

4-це вятись:

Масторняй,

Тонь вельдет ломанькс арань,

Шицень ала паваззе мумень.

Тяни ёран оцю сталмот кандомс,

Да аф сиземс кисон шить и веть…

Азонтк:

Кода тяшка парцень пандомс,

Кода шумукс аф илядомс тейть?

5-це вятись:

- И.М. Девинонь творчестванц серец и келец, потмонь вийц и смузец, сембе унксонза касыхть народонь ваймоть кърхка юрстонза. Ширде саф конаксь аф стак азозе: «Тяфтама ломанть инкса, кода Девин, кельгови марнек народсь»».

6-це вятись:

Арьсемат

Пара ялгане, сазорне, брадне,

Содан тевонтень, ёнентень содан.

Тячи кельктядязь, кельктядязь ладнек,

Ашень кельгонде вестеньге кода.

Тячи ёраса кулхцондомс масторть,

Модать ёраса ляксеманц марямс.

Ёран тяшттненди- конашка васта!-

Куцемс, мялезе ёткозост арамс.

… Марса ётасаськ ётафонь ётафть,

Мархтонт эряме мирса - аф ундса.

Семботь лятфтасаськ -ётафть и потафть,-

Аньцек лемозень с.камон тясть кунце.

1-це вятись:

-Кунара ни аш шиса поэтсь, а пингсь аф ащи. Пингсь моли. И эвондась Теризморга велеть кучкаса памятник… Памятник Мордовия Республикань народнай поэтти И.М. Девинонди. Ламотне пара мяльса мяляфнесаь поэтть, сяс мес кадсь эсь мельганза кърхка и смузю наследие - книганзон, коса тяштьф и «панжи лайме порань уженяц» колга.

Тусь идькс пингозе пиже вирть пачка

Ила

Илать целенза:

- ваномс В.Н. Родькинонь поэзиянц;

- азондомс эряфонь кинц;

- няфтемс, кода творчествасонза няеви кельгомась

эряфти, ломантти, перьфпяльти.

Оборудованиясь:

СД слайтт Родькинонь портретонц мархта, слайтт природань картинань мархта, диск Родькинонь моронзон мархта.

Илать молемац :

Учительть валоц:

- В.Н. Родькин, кода поэт, Мордовияса содаф ни нильгемоньшка кизода лама. Стихонза лисендихть «Мокшень правдаса», «Мокша» журналса, марстонь сборникова, лиседсть сонцень башка сборниксонзовок. Поэзияц пачк суваф вирень жойфса, паксянь келеса, медярувонь таньфса.

Васенце тонафнись:

Вирть потмоса ляйнясь шуди - прай Мокшети,

Крайганза кужеть лангс шяй тишет кассть.

Аф крута шаматнень атяньке соксокшнезь,

Кода эсь тядяснон, кельгозь тя вастть.

Кельгома ялганя, сада сей конакокс,

Тяса тинь васьфттяда лаймарьксонь порфсь.

Няйсасть, синь сералснон, стирь лаца, понафокс

Эслек тинь седисонтт эвондай морсь.

Омбоце тонафнись:

- В Н. Родькин шачсь 1936 кизонь 14 январьста Мордовиянь сире Шайгавонь райононь Краснай посёлкаса. Велеть перьф кели паксят и сери вирьхть, конат макссихть аф поэттиге поэтонь эрьгя и вийхть. А Василий Родькин, няк, шачфоль поэтонь ваймокс. Сон шабакскиге кельгозень Пушкинонь, Лермонтовонь, Безбородовонь и Бебанонь творчестваснон, сонга варчсезень виензон рифмань кочкамаса.

Колмоце тонафнись:

Пиже щамонц ацась нарнясь,

Лямбе кожфкясь сай и сай,

Модать ливозензон нарни,

Модась лямботи шиньфтай.

Пяшксет вирьхне и ульцятне

Нармонь морда эрь шиня,

Кяпе ласкондихть иднятне.

Эх и пара ушенясь!

Нилеце тонафнись:

- Средняй школать аделамда и армияса служамда меле сърхкась тонафнема Саранскяи университетонь историческяй факультету. Ошса кармась варжакснема газетань, журналонь редакциятненди и ашезе кадонда мяльс арамс тяшникс, кода сонь районцтонза содафонза. И сембода пяк кайгсь И.М. Девинонь лемоц.

Ветеце тонафнись:

Сенемасса сенем менельсь,

Сенемасса сенем кожфсь.

Сенемасса панжи келес

Пильксонь путозь сенем розсь.

Сенемасса сембось сенем:

Куттне, саттне, эши ведсь…

Нява - сенем паксясь венемсь,-

Аяш ушетксоц, аш пец.

Васенце тонафнись:

- Сонга, Василий Нестерович, потмонь ваймоса арьсекшнесь арамс поэтонь кинять лангс. А перьфпяльдень панчфу, медяру пиже лугатне, жойняй вирьхне, горняй лихтибрятне, бъзнай мешкятне - сятка бъта кошярясть морамс синь стихса, конат, къле, катк печатлакшневихть книгаса.

Омбоце тонафнись:

Пара, калъюрнятне лопафт,

Инезиень ведьса валовсь

Менель крайсь.

Лаймось сисем тюсса палы-

Моли майсь.

Заря шовор цёфксне морайхть,

Кайгфтихть вирть…

Колмоце тонафнись:

- Университетть аделамда меле кармась работама школаса учителькс. Тонафнесь эсь велень церанят и стирнят, кит венемкшнесть содамошитненди.

А велесь эрь шобдаваня стякшнесь атёкшнень гимнаснон коряс.

Веле песа ушеткшнесть вирьбулонятне, конатнень ару кожфсна ломатненди казендсь шумбраши и эрьгя, макссесь поэзиянь кельгомс вийхть.

Нилеце тонафнись:

Стяян шобдава,

Вальмязень панчса,-

Ару кожфкя кудботму сувай.

Расась цифторды

Лаймарькснень панчфса,

Ну, а ушеса

Видексонь рай.

Венемсть вальмалдон

Топольхнень цильфсна,

Тёкшсна аськолдасть

Пулю кить туркс.

Панжи лаймарьксне

Шабразень пирьфса

Шинять каршеса

Акшелдыхть пуркс.

Ветеце вятись:

- Од учительсь, Василий Нестерович, тякобасом прашендсь и стихонь тяштемати, конатнень кучсезень «Мокша» журналти. Сяда мельде издательстваса кармамасть лисендема поэтическяй сборниконза: «Праздникть ушедомац», «Коза кяшенди шинясь», «Кельгомась сяськсь».

Поэтсь арась содави ломанькс аф аньцек сире Шайговань районца, но и сембе Мордовияса. Сонь эрь мезне тернезь Саранскяи писателень семинархненди, коса поэтонь маштомошиц коль касондсь.

Васенце тонафнись:

Тусь идькспингозе пиже вирть пачка,

Мазы лаймова шиньф лаца срадсь.

Няйсь сон пефтома кельме и начка,

Сяпи лятьфнемат седизон кадсь.

Расать шобдава ётнине карьса.

Начкондсть пракстане- хоть пувордайть.

Перьфпяльсьвельхтяфоль сянгяря шальса.

Варчсезь пильгоне лямбонянц майть.

Омбоце тонафнись:

-Тяни ни шуропстомсть Краснайть кудонза, ламосна эряйхнень эзда тушендсть боку цебярень вешендема, а Василий Родькин стак и эрясь тяса и морсезень эсь стихонзон вельде эсь шачема ширенц.

Колмоце тонафнись:

Шобда кудса вальмять алу озань,

Ламос ванонь сюра ковнять лангс.

Арьсень, вага, пачкодемс ба тоза,

Сембе стака сталмотнень юкстамс.

Аф ризнамс, мес пенсиясь аф сатни,

Штоба эрямс ломанькс ковда ковс,

Сире шизе, малазон прокс сать ни,

Аф стак прязе акшемсь васень ловкс.

Нилеце тонафнись:

- В. Родькин тяштсь и морот. И сявондсазь сятнень морамс Мордовиянь васень артисткатне. Кафксть народнайське - А.Н. Куликоваське - сявозень кафта моронзон: «Баяраване», «Эрька, баба». Сонценьге Василий Нестеровичень стирец Ирина Васильевна кефкие киза «Келу» ансамбьса. Сценаса Куликовать мархта серцек ащезьге морси мокшень морот, алянцка сёрматфонзон кайкфснесыне. А сембодонга сидеста «Баяраванять»

(нолдави дискса мороть мархта)

Щафат - каряфат

лангань каямаса,

Ётат велева-

эхяннь паваня.

Колгат ломаттне

корхтайхть, маряса:

Домнань анюнясь-

Баяраванясь…

Ветеце тонафнись:

-Ужяль, што поэтсь аш шиса, но стихонзон эса велень эряфть, кельгомать, перьфпяльдень мазышить, ётай и тяниень пингть, эряфть колга арьсемат

Васенце тонафнись:

Ёран нармонькс вирхнень вельхкска лиемс.

Ёран морамс, кода цёфкссь тунда.

Тейть, Россия. Лама цебярь тиемс,

Пандомс парцень кемонень крда.

Ёран лядомс векозон солдатокс,

Штоба перямс веры кинц войнать.

Сятнень мархта арамс кундань брадокс,

Кие кельгсы эряфть и тундать.

Шачем крайняй, катк мон нинге одан,

Инксот анок максомс прянц одксшись.

Аньцек эряфсь урост афоль сода

И моркшть лангста афоль машне кшись.

Учительть валоц:

- Шабат, вов и шумордавсь иланьке Василий Родькинонь эряфонц и творчестванц колга. Мон койсон, кулхцондомок тя илать, тинь панжеде од киняня поэзиять и перьфпялть кельгоманцты

50