Жеміс. Көкөніс

Алматы облысы

Қарасай ауданы

"Алмалыбақ ауылындағы орта мектеп-гимназия

мектепке дейінгі шағын орталықпен" КММ

Ашық сабақ

Тақырыбы: Жеміс. Көкөніс

Орындаған: бастауыш сынып мұғалімі

Батталова А.С.

Алмалыбақ 2013ж

Сабақтың тақырыбы: Жеміс. Көкөніс.

Сабақтың мақсаты:

1.Білімдік мәні: Жемістер, көкөністер және олардың пайдасы жайлы түсінік беру,жемістер, көкөністер туралы білімдерін кеңейту.

2. Тәрбиелік мәні:. Ұқыптылыққа, еңбекқорлыққа тәрбиелеу. Жемістерді, көкөністерді күтіп- баптауға үйрету.

3. Дамытушылық мәні:Танымдық қабілеттерін дамыту, дүниетанымын арттыру, сабаққа қызығушылығын ояту.

Сабақтың көрнекілігі: «Күз кереметтері» көрмесі, гербарий, суреттер т.б.

Оқыту әдісі: Әңгімелеу, сұрақ-жауап, көрнекілік, дамыту

Сабақтың барысы

І. Ұйымдастыру.1 Оқушылардың зейінін сабаққа аудару.Сабақтың ерекше екендігін түсіндіру.

ІІ. Өткен білімді бекіту.

Балалардың үйде бос уақытында өз бақшаларынан жинаған өсімдіктердің түрлерін, тұқым, дән жайлы (гербарий бойынша) әңгімелету

ІІІ. Мақсат қою: тақырыбын, мақсатын хабарлау. «Көкөніс». "Жеміс"

ІҮ. Жаңа сабаққа дайындық:

Мұғалім:

-Балалар, бүгінгі сабағымызға Күз ханшайымы қонаққа келіпті. Өзімен бірге жемістер мен көкөністерді де ертіп келіпті.

(Осы кезде сыныпқа Күз ханшайымы, жемістер, көкөністер кіріп келеді)

Алтын күз: Алтын түске боялды,

Тау мен қырқа, дала, түз.

Келдім міне, ортаңа,

Менің атым-Алтын күз!

Орамжапырақ:Мақтанғаннан не пайда?

Менсіз дәмді щи қайда?

Мені қосса самсаға,

Бәрі жейді тамсана.

Қияр: Дәмім тілді үйірген,

Мен тұздалған күйімде!

Жаңа піскен кезімде,

Жейді бәрі сүйсіне!

Шалқан:Кім білмейді шалқанды?

Талайлар маған таң қалды.

Бәріне сый боламын,

Тауып көр менен дарханды!

Сәбіз: Кім бар сәбіз шырынын,

Жастайынан ішпеген?

Мені жеген адамдар,

Кем болмайды күшке де!

Шие : Мен шиемін, шиемін,
Күннің көзін сүйемін.
Қышқыл шырын менде бар,
Төмен басты иемін.

Құлпынай: Жапырақта тасалап,
Өскен жері бақша - бақ.
Күрең қызыл шіркін -ай,
Оның аты- құлпынай.

Жүзім: Мынау - жүзім, жаным
Сөлі балдай шырын,
Тәттілігін біледі,
Ара менен шыбын.

Күз ханшайымы:

Көкөністер бәрі де,

Денсаулыққа пайдалы.

Мұны жатқа біліңдер,

Оларды жақсы көріңдер!

Мұғалім: Күз ханшайымы, жемістер мен көкөністер, сабақ барысында сіздер жайлы тағы да көп оқып біле аламыз. Төрлетіп, жайғасыңыздар!

Мұғалім:

(Үстелдің үстінде оқулықтағы суреттердей «Күз кереметтері» тақырыппен көрме қойылған. Онда пияз, картоп, орамжапырақ, қызылша, қияр, қызанақ, сәбіз, шалқан, банан, алмұрт, алма, құрма қойылған)

а) Жаңа тақырыпты үстелдің үстіндегі жемістер мен көкөністерді көрсете отырып түсіндіру,көрсету.

Көкөніс -тағамға пайдаланатын өсімдік.Тағамға олардың әр түрлі мүшелерін: жемісін, жапырағын, сабағын немесе тамырын пайдаланады.Түйнек-топырақ арасындағы сабақтың жуандаған бөлігі.Орамжапырақ-тығыз оралып өскен жапырақ. Жемтамыры-қоректік заттың жиналуынан жуандаған өсімдік тамыры.Қияр, қызанақ-жемістері гүлден пайда болады.

Көкөністің кейбір түрлерін жерге тұқым себу арқылы өсірсе, кейбірін көшет түрінде отырғызады.Көкөністерді қыс айларында да өсіріп пайдаланады.Оның қыста өсіретін жерін жылыжай деп атайды.Базарда көкөністер қысы- жазы болады.

ә) Оқушыларға тізбектей оқыту,(оқи алатын оқушыға)

Сергіту сәті.

1. «Көкөністерді құрастыр» ойыны

Ойынның шарты бойынша қиылған бөліктерді құрастырғанда жеміс пен көкөністің суреті шығуы керек. Балалар оның не екенін айтып, ол не үшін қажет екенін айту керек.

Ү. Білімді тексеру. -Қандай жемістер мен көкөністер жайлы оқып білдік?- Шикілей жеуге болатын жемістер мен көкөністерді ата.- «Жылыжай» дегеніміз не? Көкөністер қалай егіледі?

ҮІ. Жаңа білімді бекіту. -Көкөністердің қандай пайдасы бар?- Олардан аналарың не жасайды? Жемістердің қандай пайдасы бар? олардан не жасауға болады?

ҮІІ. Сабақты қорытындылау:

Мұғалім:

Балалар, бүгінгі сабаққа жақсы қатысқандарың үшін Күз ханшайымы өзінің жемістерін тарту етеді.(Себет толы алмаларды таратады)

ҮІІІ.Бағалау,үйге тапсырма.

(Мұғалім сабақ барысындағы балалардың жауаптары бойынша сабаққа қатысуына қарай білімдерін бағалайды)

Балалар, үйден осы тақырыпты тағы да қайталап, есімізге түсіріп, үйдегі үлкендердің жеміс пен көкөністерді жинау еңбегін бақылап келіңдер. Өздерің қалаған жеміс пен көкөністің суретін салыңдар.