Конспект внеклассного мероприятия «Ягез әле, малайлар!»

Татарстан Республикасы

Балтач муниципаль районы

МБГБУ «Субаш урта гомуми белем мәктәбе"

Сыйныфтан тыш чара

"Ягез әле, малайлар!"

Башлангыч сыйныф укучылары өчен тәкъдим ителә.

Үткәрде:

Субаш урта мәктәбенең

югары квалификацион категорияле

башлангыч сыйныфлар укытучысы

Антонова Нәфисә Гарифулла кызы.

Ягез әле, малайлар!

Зал бәйрәмчә бизәлгән. Шарлар эленгән, плакатлар: "Егет кешегә җитмеш төрле һөнәр дә аз", "Ир егет үзе өчен туар, иле өчен үләр."

Алып баручы.

• Бүген була зур уен -

Бик тә күңелле уен.

Малайларыбыз ярыша,

Менә булыр тамаша.

Балалар, бүген безнең каршыбызда булачак егетләр, булачак ил сакчылары, гаилә терәкләре. Бүген без аларны сынап карыйк. Малайлар

2 командага бүленеп ярыша.

1 нче бәйге. Бүген егетләребез диңгезгә сәяхәткә чыгалар. Диңгезгә чыгу өчен корабль кирәк. Тиз генә кәгазьдән корабль ясыйлар.

2 нче бәйге. Диңгездә һәр корабльнең үз исеме бар. Сез дә үз кораблегезгә исем куегыз. Моның өчен бирелгән хәрефләрдән корабль исемен төзегез.

3 нче бәйге. Хәзер диңгезгә чыгабыз.Ләкин безнең баклар буш икән. Механиклар су тутырып алсын әле. (бер савыттан икенчесенә кашык белән су ташу ярышы).

4 нче бәйге. Барысы да әзер. Юлга кузгалдык.

Диңгездә безгә рифлар (су астындагы кыяташлар) очрый (куелган кеглиларны күрсәтү). Бу кеглиларны рифлар дип уйлагыз. Сезнең бурыч: үз кораблегезне бәйләнгән күзләр белән рифлар арасыннан үткәрү. Штурманнар читтән кайсы якка барасын әйтеп торалар.

5 нче бәйге. Диңгездә шторм башланды. (Алып баручы идәнгә шакмаклар чәчә.) Бер минут эчендә палубаны җыештырырга кирәк. Кем күбрәк "чүп" җыя, шул команда җиңә.(Укучыларның күзләре бәйләнгән.)

6 нчы бәйге. Безнең корабльгә хат килеп төште. (Берничә өлешкә киселгән открытканы җыеп, командалар "Булдырдыгыз!", "Бик шәп!" сүзләрен төзиләр.)

7 нче бәйге. Безнең инде ашыйсы килә башлады.Хәзер кокларның җитезлеген тикшерәбез. (Бәрәңге әрчү ярышы).

Коклар бәрәңге әрчегәнче, калган уенчылар ярыша. Беренче команда - "К" хәрефеннән, икенче команда - "Б" хәрефеннән башланган ашау исемнәрен язалар. Кем күбрәк яза?

8 нче бәйге. Ә хәзер иң игътибарлы капитан конкурсы. Капитаннар 1 минут кара-каршы басып торалар. Аннары бер-берсенә аркалары белән басалар. Чиратлап капитаннарга сораулар бирелә.

- Иптәшеңнең күлмәге нинди төстә?

- Аның күзләре нинди төстә? һ. б.

9 нчы бәйге. Ә хәзер кайсы команда зирәк икәнлеген беләбез. Табышмакларның җавабын табыгыз.

- Нинди урманда яфраклар юк?( ылыслы).

- Кеше нәрсәсез яши алмый? (исемсез)

- Әтәч кычкырган да бер малайны уяткан. 20 малайны уятырга ничә әтәч кирәк? ( бер).

- Кем алдында бар кеше дә баш киемен сала? (парикмахер)

- Песи өйгә нинди ишектән керә? (ачык)

- Ни өчен кеше артына борылып карый? (артында күзе булмаганга).

10 нчы бәйге. "Театраль" бәйге. Пантомима ярдәмендә күрсәтергә. 1 нче команда - "Җәй көне балыкта", 2 нче команда - "Теш врачында".

Командалар әзерләнгән арада тамашачылар арасында "Сак бул!" уены.

Залдан кыйммәтле әйберләр җыеп алына. Мәсәлән, заколкалар, телефон, сәгать, күзлек һ.б. 2 укучы чыга. Җыеп алынган әйберләрне аларның алдына таратып куялар.

2 укучының да күзләрен бәйлиләр. Күзләрен бәйләгәннән соң, шыпырт кына тараткан әйберләрне җыеп алалар. Залдан кычкырып торалар:"Сулга!", "Минем сәгатькә басма!" һ.б. Уен бер тапкыр гына уйнала.

Уенга жюри нәтиҗә ясый. Җиңүчеләр бүләкләнә.