Тәрбие сағат: Айналайын анашым

Айналайын анашым...

Мақсаты: 8-наурыз мерекесін түсіндіру, аналарды құрметтеу, сыйлау, қадірлеуге баулу.

Көрнекілігі: ана мен балалар суреттері, ұлағатты сөздер, мақал - мәтелдер, шарлар, гүлдер.

Барысы.

Мұғалім: Құрметті асыл аналар, қадірлі де аяулы әжелер және ұстаздар, құрметті қонақтар!

« Айналайын анашым...» атты ертеңгілікке хош келдіңіздер!

Хош келіпсіз, ақ жаулықты аналар,

Жүздеріңнен мейірім мен нұр тамар.

Алдарыңда жауқасыңдай құлпырған,

Алаңсыз бақытты балалар!

Қырларда қызғалдақтар дірілдеген.

Қуаныш келе берсін күлімдеген,

Біз сіздерді құттықтаймыз.

8-наурыз мерекесімен!

Сіздерге мол бақыт, ашық аспан.

Отбасының берекесін тілейміз,

Балаға жақыны сіз гой ана.

Сіздің ыстық құшағыңыз - бізге пана,

Сіздерге теңестірер еш нәрсе жоқ,

Теңесе алар бір-ақ нәрсе - Отан ғана.

« 8- наурыз - халықаралық әйелдер күні » мерекесі құтты болсын!

Аяулы аналарға ұзақ ғұмыр, бақытты өмір, отбасыларына амандық пен қуаныш тілеймін.

Құрметті аналар, балаларыңыздың құттықтау тілектерін қабыл алыңыздар!

Хор:

Аналарды сүйеміз,

Сөзін ойға түйеміз.

Әжені де ардақтап,

Әдеппен бас иеміз.

Ән: « Анашым »

Ақмоншақ:

Ана, әже, әпкелер,

Құтты болсын мереке!

Осы келген ортаға,

Тілейміз біз береке.

Айкөркем:

Көгімде күн болып,

Жұлдыздай жанасың.

Аман бол әрдайым,

Аяулы анашым!

Жалғас:

Жер бетінің ғұмыры,

Күн нұрымен арайлы.

Біздің үйдің жылуы,

Анамыздан тарайды.

Гүлзат:

Шалқып, тасын әніміз,

Жадырасын жаныңыз.

Әже сені құттықтап,

Би, билейміз бәріміз.

Би: « Вальс »

• Келесі кезекті ойынға берейік.

Ойын: « Кім көп сөз біледі?»

Ортаға 2 әже шығады. Оларға қарама - қарсы немерелері тұрады. Әжесі немересіне дейін әр қадам басқан сайын жылы сөздер айтуы керек. Мысылы: ботам, күнім...,..

Досан:

Ана - біздің күніміз,

Ана - біздің гүліміз.

Бар баланы қуантып,

Ұзақ өмір сүріңіз.

Әділет:

Ақ әжемді әрқашан,

Сыйлап жақсы көремін.

Қуантайын деп оны,

Өлең айтып беремін.

Алмас:

Әр сөзіңді жаттағам,

Жүрегімде сақтаған.

Анашым деп мақтанам,

Айналайын ақ мамам!

Малика:

Анаға жан жетпейді,

Еңбегі естен кетпейді.

Балаға тіпті анасыз,

Тамағынан ас өтпейді.

Жүргізуші:

Аялаймыз ананы,

Құрметтейміз бағамыз.

Сіздер үшін аналар,

Шырқап әнге саламыз.

Ән: « Құттықтаймын ана!»

Ғалымжан:

Анам менің панам ғой,

Содан қорған табам ғой.

Асықпа, анашым, ертең - ақ,

Отың болып жанам ғой

Алшынбек:

Анам менің, ак мамам,

Балапанын мақтаған.

Анам барда әрдайым,

Қуанамын, шаттанам.

Әсел:

Анашым, жан анам,

Балдан тәтті бал анам.

Үйге келсең мақтанам,

Құшақ жая қарсы алам.

Аийда:

Аялаған, саялаған,

Бар бақытым, берекем.

Апатайым, құттықтаймын,

Бүгін сенің мерекең.

Би: « Көңілді күн »

Думанбек:

Әжем менің әлі де,

Ұқсамайды кәріге.

Шай қайнатып береді,

Қонақтардың бәріне.

Аслан:

Әже деген көп шығар,

Әжемдей менің жоқ шығар.

Мейірімді ол кісі,

Қандай ғажап күлкісі!

Эльдар:

Жылылықтан жаралған,

Құшағы оның таң ба екен.

Менің айдай анамнан,

Асқан сұлу бар ма екен?!

Шарапат:

Ардақтап, аялап,

Мәпелеп өсірген.

Анамдай жан бар ма,

Қатемді кешірген?!

Бастай:

Мәпелейсің мені, анам,

Қолыңдағы құсыңдай.

Құлпыра өсіп демалам,

Құшағыңда қысылмай.

Алихан:

Аналар шаңырақтың сәулеті ғой,

Ана деген баршаның дәулеті ғой!

Адамды адам еткен ақ сүт беріп,

Жаңа өмірге сәбиін жетелеген.

• Келесі кезекті ойынға берейік.

Ойын: « Өз анаңды тап »

Ортаға 4 бала шығады. Олардың көзі байланады.

Өз аналарын алақанымен қолынан сипап тауып алу.

Би: « Жылқышы »

Жүргізуші:

Ана көзі күн нұрымен пара - пар,

Тұла бойға қуат болып таралар.

Өміріме шуақ шашып әрқашан,

Көп жасаңдар ақ ниетті аналар!

Құрметті қонақтар, бүгінгі « Айналайын анашым...» атты ертеңгілігіміз аяқталды. Сау болыңыздар!