Урок по крымскотатарскому языку на тему Щ, щ арифлерни язув

Мевзу:

Щ,щ арифлерни язув.Ш,ш арифлернен тенъештирюв, «Плащ», «Ящик» сезлерни талиль этюв.Эджалар,сезлер,джумлелер язув.

Макъсат:

Янъы арифни язмагъа огретмек,сезлерни талиль этмек.Сез-эджа талиль къабилиетлерини мукеммелештирмек.Гъайретнен,темиз чалышмакъны тербиелемек.

Дерснинъ донатмасы:

Язув дефтери,ресимлер,джедвеллер,арифлернинъ нумюнеси,тахта.

Дерснинъ кетишаты:

1.Тешкили дакъкъа.

2.Таянч бильгилерини актуаллештирюв

-Субет.

Окъув дерсинде насыл арифни огрендик?

О насыл сес бильдире?Характиристикасыны беринъиз

-Сезнинъ сес-эджа талили

Сезлер терс язылгъан: ЩАЛП КИЩЯ

Догъру окъунъыз.Сезлерни талиль этинъиз ве схемаларны тизинъиз

3.Дерснинъ мевзусыны ве макъсадыны еткизюв.

4.Янъы мальземлерни анълатув:

-Уфакъ щ арифнинъ язулывыны талиль этюв ве анълатув.

Уфакъ щ арифнинъ шекили уфакъ ш арифине бенъзей.Лякин о дерт элементтен ибаретдир.Онынъ теркибине даа уфачыкъ ильмек къошула.

Уфакъ щ арифни иш сатырнынъ усттеки сызыгъындан язмагъа башлаймыз.Иш сатырнынъ ашагъыдаки сызыгъынадже авукъ таячыкъ алып барамыз,онъа токъунып,сагъ тарафкъа тегереклеймиз ве иш сатырнынъ усттеки сызыгъынадже котеремиз..Къалемни кягъыттан узьмейип,невбеттеки авукъ таячыкъны язмагъа башлаймыз.Оны да иш сатырнынъ ашадаки сызыгъына еткизип.сагъ тарафкъа тегереклеймиз ве иш сатырнынъ усттеки сызыгъында язмагъа битиремиз.Мындан,къалемни узьмейип,учюнджи авуч таячыгъыны язамыз.Оны да иш сатырнынъ ашадаки сызыгъына алып барып сагъ тарафкъа тегереклеймиз.Лякин оны иш сатырнынъ ашадаки сызыгъындан азчыкъ тепедже язмагъа битиремиз.Сонъра андан ашагъа уфачыкъ ильмек япамыз.

Бойле саювнен языла: «Бир-ве-эки-ве-учь-ве-дерт-ве»

-Пармакъ гимнастикасы

Авучларны пек окъаларым,

Эр бир пармакъны бурарым.

Къатты онъа селям берип

Узатмагъа башларым

Сонъ къолларымны юварым,

Пармакъны пармакъкъа саларым,

Оларны килит киби къапатып

Сыджагъыны сакъларым.

Пармакъларны йиберсем,

Тавшан киби чапарлар.

-Мустакъиль язув:

Уфакъ щ,эки уфакъ щщ арифни берабер язув,эджалар язув.

-Бедентербие дакъкъасы

-Баш Щ арифнинъ язулывыны талиль этюв ве анълатув.

Баш Щ арифнинъ шекили уфакъ щ арифнинъ шекилинден,тек биринджи элементнен ве ольчюсинен фаркълана.Тепедеки ара сатыр сызыгъындан азчыкъ ашаджа язмагъа башлаймыз,сагъ тарафкъа тегереклеп тепедеки ара сатыр сызыгъына токъунып ашагъа узунлашкъан авукъ таячыкъ юрьсетемиз.Оны иш сатырнынъ ашадаки сызыгъында сагъ тарафкъа тегереклеп,иш сатырнынъ усттеки сызыгъынадже язамыз.Энди экинджи элементни язамыз.Оны тепедеки ара сатыр сызыгъындан язмагъа башлаймыз,сонъ биринджи элементке къошып онынъ устюнден иш сатырнынъ ашадаки сызыгъынадже алып барамыз ве анда тегереклеп,иш сатырнынъ усттеки сызыгъынадже девам этемиз.Учюнджи элементни де,экинджи элементке бенъзеп тепедеки ара сатыр сызыгъындан язмагъа башлаймыз ве ашагъа юрьсетемиз.Энди 2-нджи элементкекъошып онынъ устюнден ашагъа алып барамыз.Иш сатырнынъ ашадаки сызыгъына токъунып,сагъ тарафкъа тегереклеп,иш сатырнынъ орталарындан бу элементни язмагъа битиремиз.Мындан дертюнджи элементни-уфакъ ильмекни япамыз.

Бойле тактнен языла: «Ве-бир-ве-эки-ве-учь-ве дерт-ве»

-Мустакъиль язув:

Баш Щ арифни ,сонъ исе уфакъ щ арифнен берабер язув,сезлер язув.Дефтердеки вазифелернен чалышув.

Плащ,ящик-сезлерни тахтадан кочюрип язув.

5.Дерснинъ нетиджеси

-Бугунь насыл арифлер язмагъа огрендик?

-Онынъ акъкъында не айта билесиз?

Къырымтатар тилинден

1-нджы сыныфта ачыкъ дерс

Мевзу : Щ,щ арифлерни язув.

Башлангъыч сыныфларнынъ оджасы:

Эреджеп Сафие Аметовна