«Рәміздер салтанат құрғанда» тәрбие сағаты

Батыс Қазақстан облысы

Казталов ауданы Жұлдыз ауылы

А.Хұсайынов атындағы орта жалпы

білім беретін мектебінің

бастауыш сынып мұғалімі

Құрманова Ұлғаным Абдрахманқызының

іс-тәжірибесінен

Тақырыбы: «Рәміздер салтанат құрғанда»

Мақсаты: Оқушыларды елжандылыққа, өз Отанын сүюге, рәміздерін құрметтеуге тәрбиелеу. Сыни тұрғысынан ойлау, шығармашылық қабілеттерін дамыту. Ойларын жүйелі, дәлелді жеткізе білуге дағдыландыру. Отанды сүюге, топта жұмыс істеуге, достық сыйластыққа тәрбиелеу.

Түрі: ойын-жарыс.

Көрнекілігі: шар, мақал-мәтелдер, айналым атаулары, рәміздер суреттері.

Барысы:

Тәрбиеші: - Құрметті лагерьде демалушы ұландар! 4-маусым - Рәміздер күніне арналған «Рәміздер салтанат құрғанда» атты шарамызға қош келдіңіздер.

Қасиетті Қазақстаным мекенім,

Ақиқаттың алтын бесігі екенсің.

Елім,жерім, Отаным бақ- дәулетім,

Болашағым, өнер - білім, өркенім! , - дегендей XXI ғасырда Қазақстанда бейбітшілік, тыныштық болып, егеменді еліміз ұзағынан болсын деп тілейміз. 1992 жылы Ұлттық рәміздеріміз қабылданған болатын. Міне, содан бері рәміздеріміз 22 жыл салтанат құрып келеді.

Мына заман білімдінің заманы,

Шәкірттердің таудай биік талабы.

Дарабозды анықтайтын сайыста,

Сайыскердің сәтті болсын қадамы, - деген тілекпен, бүгінгі шараны екі топтың еліміз, рәміздеріміз туралы білім-біліктерін байқауға, сондай-ақ шығармашылықтары мен ой ұшқырлықтарын анықтау бағытында өткізгелі отырмыз.

Қарақат : Жарасқан байрақтың мәні бар,

Көк аспан, көк қыран сәні бар.

Көк байрақ ашық көк кеңісімен,

Алтын күн белгісі жеңістің.

Алтынбек: Алтын қанат көмкерген,

Шаңырақ бар, уық бар.

Әсем бейне сен көрген,

Жай бейне емес, ұғып ал!

Көгілдір түс аясы

Бейбіт дала елесі.

Шаңырақ - жұрт панасы,

Уықтар - күн сәулесі.

Айбек: Сүйсіндірген өзіңді,

Түсіне біл таңбаны.

Аңызда ұшқыр, төзімді,

Пырақ - халық арманы.

Мағыналы, сымбатты,

Бар осындай белгіміз.

Маған, саған қымбатты

Елтаңбасы ол елімнің.

ҚР Мемлекеттік әнұраны шырқалады.

Екі топ бір-бірімен сәлемдесіп, таныстырады.

Ойынның айналымдары:

1. Рәміздердің мән-мағынасын ашу. (Әр топтан бір оқушы шығып, тіл шеберліктері байқалады.)

2. Тапқыр болсаң тауып көр. (Әр топ өздері құрастырып келген сөзжұмбақтарын бір-біріне жасырады)

3. Ұшқыр ой. (викториналық сұрақтарға жауап беру)

4. Кім шапшаң? (Ту мен елтаңбаның суреттерін қиындылардан тездетіп құрастыру)

5. Әріптер сөйлейді. (Берілген әріптер көмегімен сұрақтарға жауап беру)

6. Сандар сыр шертеді. (Жұлдызшалар таңдау арқылы ішінен ашылған жылды сипаттау)

Тәрбиеші: - Отанға деген құштарлық,

Билесін адам санасын.

Білімді болсаң білікті,

Бар сыннан жолды табасың.

Оза шапсаң ілгері,

Дарабоз да боласың.

Мыңнан жүйрік кім болар?

Қазылар берер бағасын.

Қазылар алқасын таныстыру.

Ән: «Жаса, Қазақстан» Орындайтын: Ғиниятов Алғадай

1-айналым: Рәміздердің мән-мағынасын ашу. Әр топтан бір оқушы шығып, рәміздердің мән-мағынасын ашып беруі керек. Олардың тіл шеберліктері сыналады.

2-айналым: Тапқыр болсаң тауып көр. Әр топ өздері құрастырып келген сөзжұмбақтарын бір-біріне жасырады.

3-айналым: Ұшқыр ой. Жедел сұрақтарға жауап беру.

1. ҚР Ұлттық валютасы? (Теңге)

2. Қазақстан батысында қандай мемлекетпен шектеседі? (Ресей)

3. ҚР мемлекеттік туының авторы кім? (Шәкен Ниязбеков)

4. ҚР Тәуелсіздік күнін қашан атап өтеміз? (16 желтоқсан)

5. 30 тамыз қандай күн? (Конституция күні)

6. Қазақстандағы ең үлкен көл? (Каспий көлі)

7. Қазақтың ұлы ақыны Абай туған облыс? (Семей)

8. Оңтүстік Астана? (Алматы)

9. Тіл мерекесі қай күні тойланады? (22 қыркүйек)

10. Тұңғыш әліппе оқулығын жазған кім? (Ахмет Байтұрсынов)

11. Әнұранның әнін кім жазған? (Шәмші Қалдаяқов)

12. Елтаңба авторлары. (Жандарбек Мәлібеков, Шотаман Уәлиханов)

13. Бес дұшпанды ата. (өсек, өтірік, мақтаншақ, еріншек, бекер мал шашпақ)

14. Киіз үйдің төбесі. (шаңырақ)

15. Мемлекеттік тіл (қазақ тілі)

16. Бес асыл іс. (талап, еңбек, терең ой, қанағат, рақым)

17. Ресми тіл қай тіл? (Орыс тілі)

4-айналым: Кім шапшаң? Ту мен елтаңбаның суреттерін қиындылардан тездетіп құрастыру.

5-айналым: Әріптер сөйлейді. Берілген әріптер көмегімен сұрақтарға жауап беру.

1-топқа:

О

Р

А

Қ

У

Ш

Ы

Т

1. Шөп шабатын құрал. (орақ)

2. Тобылғының түсі. (торы)

3. Мал қамайтын орын. (қора)

4. Отбасы не қасы? (ошақ)

5. Үйір-үйір жылқы, мхм-мхм қой? (отар)

6. Зытудың синонимі. (қашу)

7. Мылтықтың синонимі. (қару)

2-топқа:

Қ

Ы

Д

Ы

С

А

Р

А

1. Біржанмен айтысқан қыз. (Сара)

2. Бойында ненің таныстым. (Арыс)

3. Ерік сөзінің синонимі. (Ырық)

4. Үзілген түймені не істейді? (қада)

5. Шабыт келгенде не қозады? (Арқа)

6. Не береке қонсын? (Ырыс)

7. Адамды аздыратын сусын. (арақ)

6-айналым: Сандар сыр шертеді. 7 жұлдызша беріледі. Жұлдызшалар таңдау арқылы ішінен ашылған жылды сипаттау. Әр дұрыс жауапқа 1 ұпай беріледі.

• 1986 жыл (Желтоқсан қозғалысы)

• 1992 жыл (Ұлттық рәміздер қабылданды)

• 1993 жыл (Ұлттық теңгеміз қабылданды)

• 1998 жыл (Астанамыз Астана қаласына ауысты)

• 1991 жыл 2 қазан (Тоқтар Әубәкіров ғарышқа ұшты)

• 2011 жыл (7-ші қысқы олимпиадалық Азиада ойыны Қазақстанда өтті)

• 1989 жыл (Қазақ тіліне мәртебе берілді)

Қорытынды бөлім.

Екі топтың ұпайлары есептеліп, қорытындыланады. Жеңімпаз топ марапатталады.

Шара соңы хормен «Көк тудың желбірегені» әнін айтумен аяқталады.