Жирhл огсн энкр эк

Җирһл өгсн эңкр эк

Нарт делкә деер күн болһн экәс төрсн болдг. Эк үрән йисн сардан гесндән тееһәд, алтн шар уурган көкүләд, өскдг болҗана. Кедү дәкҗ сөөд эк әмтәхн нөөрән таслад, үрндән көкән өгч асрсн болх? Эк үрнәннь төлә бәәдг.

Экин кесн ачиг альхн деерән мах чанҗ өгв чигн хәрүлҗ болдго болҗана.

Эк гисн цуг улсас өөрхн күн. Җил ирвәс экин кесн ачнь ода оч медгдҗәнә. Түрү - зүдү бәәсн цагт эк үрндән хотын ик зууһинь өгдг, эс гиҗ эврән идлго үрндән гиҗ тоолдг.

Экин үнр гидг юмн күчтә болдг, эн үнрлә дүңцүлдг юмн уга гидг. Эк бәәсн учрар бидн цуһар шар нар үзҗәнәвидн, көрстә һазриг көләрн ишкҗ йовнавидн.

Насн җирһлиннь туршарт күн оньдин экән санна. Экәсн үлгүр авхар күн болһн шунна.

Үкр сарин һучнд Экин сән өдр. Мини классин сурһульчнр экин тускар тоолврарн хувалцв, энүг тана оньгт тусхаҗанав.

Хамгин сән эк

Мини экин нерн Байрта. Экм цаһан чирәтә, дунд нурһта, ик сәәхн хар нүдтә,һольшг, ухата. Нанд хойр дү күүкн бәәнә. Би экдән нөкд болнав. Би эврәннь дү күүкдән болн экдән йир дуртав. Экин һар йир җөөлн, бүлән болн эвтә. Мини экм хамгин сән эк. Би экдән йир дуртав!

Монтка Эрднь 5-гч классин сурһульч.

Мини эклә әдл күн уга гиҗ би саннав. Мини эк сән, ухата, цаһан седклтә, инәмсг күн. Экин нерн Алла, багш болҗ көдлнә. Нанд эгч болн ах бәәнә. Мана өрк-бүл ни - негн бәәнә. Намаг экм эркәр өскнә. Экм цецгүдт дурта. Мини санан - өдр болһн экдән цецгәс белглх биләв. Би экдән йир дуртав!

Аманка Очир 5-гч классин сурһульч.

Эңкр экин тускар

Нарт делкә деер экәс эңкр күн уга гиҗ би саннав. Мини экин нерн Саглара. Һурвн үрән һарһсн мини экм уух хотан мартад, гемнәд одвзго гиһәд, күүкдән кү кехәр, сурһуль - эрдм дастха гиҗ мадна ард орна. Нанд эгч болн дү күүкн бәәнә. Мадн эктәһән хамдан дуулхдан дуртавидн. Мини эк цаһан седклтә, килмҗтә, сәәхн күн. Би экдән йир дуртав.

Ностан Римма 7-гч классин сурһульч.

Мини экин нерн Ирина. Экм һучн дөрвтә. Эн школын замч болҗ көдлнә. Хамдан көдлсн әмтн экм күндлнә, тевчнә. Кесн хотнь амтта, сенр. Мини эк сәәхн, һольшг, би биилхдән дурта. Энүнә кесн боорцгт, бөөргт мана өрк-бүл йир дурта. Би экдән йир дуртав!

Шальдира Амулң 7-гч классин сурһульч.

Мини эк сәәхлә

Мана бүл ни-негн бәәнә. Мини экин нерн Зоя. Экм һучн дөрвтә. Эн сәәхн, һо нурһта, цаһан чирәтә, җөөлн хәләцтә, ухата күн. Экм совхозин конторт тооч болҗ көдлнә. Әмтнлә экм ээлтә. Гертән уга болхла, би экән саннав.

Би экдән йир дуртав.

Боован Лиҗ 7-гч классин сурһульч.

Мини экин нерн Роза. Мана эк - герин чимг. Эн дөчн тавта. Нанд ах дү көвүн хойр бәәнә. Мана эк йир сәәхн, цаһан седклтә, һартан өөтә. Экмдн юм уйна. Мадн олн зүсн сәәхн махлас, күлт, беелә уйна.Мини эк көдлхш. Эн гер - малан хәләнә. Бидн энүнд нөкд болнавидн. Би экдән йир дуртав!

Һахан Чингис 6-гч классин сурһульч.

Эк - мини иньг

Мана өрк-бүлд һурвн үрн бәәнә. Бидн хоорндан ни-негн бәәнәвидн. Мана экин нерн Надежда. Экмдн багш болҗ көдлнә. Багшин көдлмш күнд, тегәд мадн экән хармнавидн. Мини эк йир сән күн, төгрг сәәхн чирәтә, цаһан седклтә, төвшүн, ухата, инәдтә күн.

Эк - мини хөв, эк - мини иньг! Би экдән йир дуртав!

Ахонькин Саша 7-гч классин сурһульч.

Мини экин нерн Байрта. Мини экм тооч болҗ көдлнә. Экм сәәхн хар нүдтә. Би бас экләрн әдл хар нүдтәв. Экм намаг таална, эн оньдин сурһулярм соньмсна, нөкд болна, чик сурһмҗ өгнә. Эн сәәхн, ахрхн хар үстә, дунд нурһта. Мини экм тевчңгү заңта. Би экдән йир дуртав!

Мухара Данил 7-гч классин сурһульч.

Күндтә мана экнр!

Эн сән өдрлә Тадниг йөрәҗәнәв!

Суусарн өнр болҗ,

Бәәсәрн байн болҗ,

Өлзәтә цаһан хаалһар йовҗ,

Ут наста, бат кишгтә,

Гем - шалтг уга,

Дән-даҗг уга,

Маңна тиньгр,

Инәдтә - наадта,

Байрта - бахта бәәтн!

Һәрән Вера Шаттын дундын школын

хальмг келнә болн литературин багш