Тақырыбы: «Бақытты сәт» математикалық ойыны

« Бақытты сәт» математикалық ойыны

Мақсаты:

Білімділік: Оқушылардың ойлау қабілеттерін, ой ұшқырлығын, оқуға ынтасын арттыру.

Дамытушылық: ұйымдастырушылық қабілетін дамыту.

Тәрбиелік: оқушыларды ұйымшылдыққа, нақты пәнге қызығушылыққа, жауапкершілікке, өзін-өзі тәрбиелеуге тәрбиелеу.

Көрнекілігі: нақыл сөздер,карточкалық тапсырмалар,логикалық есептер.

Түрі: топтық сайыс

Жоспары:

1.Топтың өзін таныстыруы, амандасу рәсімі;

2.Тапқырлық сайысы (логикалық есептер);

3.Біліктілік сайысы (есептер шығару);

4. «Әр қолда-өзінің ісі» Капитандар сайысы (сурет салу);

5.Ойымды жалғастыр (мақал-мәтелдер);

6.Сөзжұмбақ сайысы;

7. «Математикалық сөздік» сайысы;

Қолданылған нақыл сөздер:

«Арифметика математиканың, ал математика ғылымдардың патшасы.» (К.Гаусс)

«Ақыл ойды тәртіпке келтіретін математика» (М.В.Ломоносов)

«Математика - барлық ғылымдардың тұңғышы және оларға пайдалы да, қажет те» (Р.Бэкон)

Жүргізуші: Қош келіпсіздер, мынау ойынға, барша қауымым!

Аңсайсыздар ма, жаздың жемісін, қарбыз - қауынын?

Ол күнге жету, сірә, жолдастар ерте емес пе?

Ойын - жарыспен өткізейік біз қыстың аязын!

-Қайырлы күн қадірлі көрермендер! Баршаңызда «Бақытты сәт» ойынына қош келдіңіздер! Бүгінгі ойын топтық сайыс түрінде өтеді.Сайысқа екі топ қатысады.Олар 7 сынып оқушыларынан құралған «Үшбұрыш» және 9 сынып оқушыларынан құралған «Трапеция » топтары.

- Математика сырлары,

Қызықтырды біздерді.

Ойынға бірге қатысуға

Шақырамыз сіздерді,-дей отырып сайыскерлеріміздің білім мен өнеріне баға беретін әділқазылар алқасымен таныстырамыз.(әділқазылар алқасы таныстырылады).

Бүгінгі кештің жоспары таныстырылады

1.Топтың өзін таныстыруы, амандасу рәсімі;

2.Тапқырлық сайысы (логикалық есептер);

3.Біліктілік сайысы (есептер шығару);

4. «Әр қолда-өзінің ісі» Капитандар сайысы (сурет салу);

5.Ойымды жалғастыр (мақал-мәтелдер);

6.Сөзжұмбақ сайысы;

7. «Математикалық сөздік » сайысы;

1- сайыс. Топтардың амандасу рәсімі. Ең жоғарғы ұпай - 5 ұпай.

Жүргізуші:

Мықты болсаң- алдағыны басып оз,

Мықты болсаң- арттағыны жеткізбе!

Мықты болсаң- тайғанама көк мұзда!

Мықты болсаң-бөгеттерді бұзып оз,-деп келесі сайысымыз «Тапқырлық сайысына » кезек береміз. Әрбір дұрыс жауап -5ұ.

2-сайыс.«Үшбұрыштар»тобына.

1.Төрт қойдың неше аяғы бар?(16)

2.Ағаш үстінде 100 торғай отырды. Аңшы 10 торғайды атып алды. Торғайдың қаншасы қалды? (10)

3.Дайындауға болады, бірақ жеуге болмайды.(сабақ)

«Трапеция» тобына.

1.Қалайша жұмыртқа 3 метр ұшып жарылмауы мүмкін?(жұмыртқаны 4 м. лақтырса, онда алғашқы 3м. жарылмайды.)

2.Жерден көтеруге оңай, бірақ алысқа лақтыруға қиын.(мамық)

3.Жылдың неше айында 28 күн бар?(барлық айда)

Жүргізуші:-әділқазы алқасынан 1 және 2 сайыстың қорытындысын сұраймыз.

-Айыра біл, жақсы менен жаманды,

Айыра біл,қарындаш пен қаламды.

Айыра біл, соқпағында өмірдің,

Айыра біл тапсырмаңды алдағы- деп кезекті «Біліктілік»сайысына береміз.

3-сайыс.Бір парақ қағаз беріледі әр топ оқушылары өздері білетін формулаларды жазады,физика,математика пәндерін қамтуы керек.Оқушыларға 3мин. уақыт беріледі. Әрбір дұрыс жауап -1ұ.

• Көрермендерге жұмбақтар жасырылады.

• Атадан 10 боламыз,

Бір-бір жастан арамыз.

Қосылып кейде басымыз,

Азайып кейде қаламыз.

Бөлініп кейде арамыз,

Көбейіп те аламыз.(цифрлар)

• Бүтін, бөлшек бөліктерден

Үтір айырып тұрады,

Осы санның кім біледі

Аты қандай болады? (ондық бөлшектер)

• Түзудің бір бөлігі

Екі шеткі нүкте көрігі

Ұзындығы және бар

Айтшы сыйлық сенікі (кесінді)

• Нәрселерді санағанда

Керек ол бізге ауадай

Айтыңдаршы бұл қандай сан

Жаң-жағына қарамай? (натурал сандар)

• Санасаң сан жетпейтін нүктелерден,

Құралған фигура бар қарапайым.

Салу үшін сен оны сызғыш ізде,

Бұл не өзі, бар ма, сірә, дара пайым. (түзу)

• Дүниеде бүтін нәрсе бола бермейді

Көңілге армандаған қана бермейді.

Бүтін нәрсе бөлігін көрсететін,

Қандай сан бар, достарым, пікір демейді (жай бөлшектер)

4-сайыс. «Әр қолда-өзінің ісі» - капитандар сайысы. Топ капитандарына қағаз және екі қолына да қарындаш беріледі. Тапсырма: сол қолмен үшбұрыш, оң қолмен шеңбер салыңдар. Ең жоғарғы ұпай -5ұ.

5-сайыс. Келесі кезекте «Ойымды жалғастыр» сайысы.

(әр топ тез жауап беру керек.)

1. Жеті жұрттың тілін біл, (жеті түрлі білім біл)

2. Білекті бірді жығар,(білімді мыңды жығар)

3.Екі жақсы қас болмас,(екі жаман дос болмас)

4.Досыңды үш күн сына ма,(үш жыл сына)

5.Бір елі ауызға- (екі елі қақпақ)

6.Жүз теңгең боғанша, (жүз досың болсын)

7.Отыз тістен шыққан сөз,(отыз елге тарайды)

8.Білгенің бір тоғыз,(білмегенің тоқсан тоғыз)

9.Бір кісі қазған құдықтан,(мың кісі су ішеді)

10.Жеті рет өлшеп,(бір рет кес).

6-сайыс.-Ойланайық азырақ, уақытыңды үнемдеп,

Кім шығады кәнеки, жауабын мен білем деп - келесі сайыс кезегі «Сөзжұмбақ» (ең жоғарғы ұпай - 10ұ.)

7- сайыс. «Математикалық сөздік». Математикалық терминдер орыс тілінде айтылады,сіздер қазақша баламасын табуларыңыз керек.уақыт-2мин.

биссектриса - жарма

Вертикаль-тік

Аксиома-ақиқат

Горизонт-көкжиек

Квадрат-шпршы

Дискриминант-айқындауыш

Куб-текше

Цилиндр- айналма

Конус -шошақ

Оператор-амалгер

Көрермендерге сұрақ.

1.Адамның алғашқы көлігі не?(балалар арбасы)

2.А.Македонский заманындағы уақыттың көрсеткіші немесе өлшеуіші(тауық)

3.И.Ньютонның 1687 жылы бүкіл әлемдік тартылыс заңын ашуына себеп болған не?(алма)

4.Қалай 10 метр сатыдан секіріп жараланбауға болады?(сатының ең төменгі сатысынан секіру керек).

Сайысымыздың соңғы сәті таяп қалды

Ал,қазір әділқазылар сөз алады.

Сайысымыздың жеңімпаздарын анықтап

Мақтау қағаз,сыйлықтарын тапсырады.

(Сайысты қорытындылау,жеңімпаздарды марапаттау.)

Үлгілі орта мектебі

Тақырыбы: «Бақытты сәт»

Математикалық ойын

Дайындаған: математика пәнінің мұғалімі

Калиева К.Т

2014-2015 оқу жыл