Конспект классного часа на тему 2015 год - Год парков и скверов в Республике Татарстан

Тәрбия сәгате.

Тема. 2015 ел -Татарстанда парклар һәм скверлар елы.

Максат. Укучыларга парклар һәм скверларның кеше тормышы өчен әһәмиятле икәнен төшендерү.

Бурычлар. Укучыларда парк элементлары турында күзаллау формалаштыру.

Иҗади атмосфера аркылы, күмәк проект тудыру.

Экологик, әхлакый, эстетик, патриотик тәрбия бирү.

Укытучы өчен ноутбук, презентация, видеопроектор, экран.

Укучыларга кирәкле материаллар: минибакча ясау өчен муляжлар, кашпо, грунт, гөлләр.

Музыкаль рәт: музыка Л.Бетховен

Тәрбия сәгатенең барышы.

1.Оештыру өлеше.

2. Кереш сүз. Бүгенге тәрбия сәгатенең темасын ачыклау өчен мин сезне газетада басылган яңалык белән таныштырам. Аны укыганнан соң сез бүген нәрсә турында сөйләшәчәгебезне әйтерсез. Цитата : "2015 ел -Татарстанда Парклар һәм скверлар елы дип игълан ителде. Татарстан Президенты Рөстәм Миңнеханов шушы хактагы Указга кул куйган.

Парклар һәм скверлар елы территорияләрне комплекслы үстерү, төзекләндерү һәм яшелләндерү мәсьәләләренә җәмәгатьчелек игътибарын җәлеп итү максатыныннан чыгып игълан ителгән."

Укучылар: -Бүген без парклар һәм скверлар турында сөйләшәбез.

• Ә парк ул нәрсә дигән сүз? Ул нинди урын? Кем җавап бирә? (....)

Укытучы өсти: Парк ул аллеялары, чәчәклекләре, сулыклары булган зур бакча. Кагыйдә буларак, парклар дәүләт тарафыннан тәэмин ителә. Бу слайдта Казан шәһәренең (Меңъеллык паркы, Максим Горький исемендәге парк) паркларын күрәсез. Ә сквер нәрсә? Ничек уйлыйсыз? (...)

Укытучы өсти: Сквер ул шәһәр урамнары кисешкән урыннарда, мәйданчыкларда, йортлар арасында оештырылган территорияләр. Бу слайдта Казан шәһәренең скверларын (Тукай скверы, Карл Фукс скверы) күрәсез.

-Алдагы слайдтан чыгып, парк һәм скверның аермалы һәм охшашлы якларын ачыклыйк.

( Паркның мәйданы зур, ә скверларныкы 2 га дан артмый, шуңа күрә аларны урам чатларындагы кечкенә мәйданчыкларга урнаштыралар. Скверларда гадәттә бер һәйкәл яки скульптура булса, паркларда берничәне куялар. Скверларда утырып тору өчен эскәмияләр куела, паркларда фонтаннар да, балалар өчен уен мәйданчыклары да, аллеялар да күп була.)

• Парклар һәм скверлар ни өчен кирәк? Аларның әһәмияте нәрсәдә? Алар нинди функция башкара?

( Кешеләргә ял итү урыны буларак хезмәт итә, яшеллек арасында саф һава сулыйлар, физик һәм психологик яктан ял итәләр)

• Мондый ял итү урыннары кайларда кирәк? (шәһәр җирендә) Ни өчен? (...)

• Ә авыл җирендә кирәкме? (Юк, без болай да табигать кочагында яшибез.) 2 нче укучы: ә мин менә үзебезнең мәктәп территориясендә әнә шундый ял итү урыны булдырыр идем!

• Бу - бик яхшы фикер! Әйдәгез, бергәләшеп уйлашыйк! Мәктәп территориясенең кайсы җиренә, ничегрәк итеп планлаштырып була?

(Кәгазь битенә бергәләшеп каралама схема ясыйлар.Аннары шуның буенча муляжлар, гөлләр кулланып, мини бакча ясыйлар.

Проект эшенең тасвирламасы.

1 укучы.Мин бу бакчада һәрвакыт хәтфә чирәм булуын телим (Яшел үлән түши).

2 укучы. Ә мин бакча тирәли алмагачлар, башка төрле җиләк-җимеш агачлары утыртам ("Бакча" тирәли тәбәнәк гөлләр тезә, аларга "җимешләр" элә).

3укучы. Мин ул агач ботакларының беркайчан да сынмавын телим, шуңа күрә алар янына махсус баскычлар куям (Декоратив баскычлар куя).

4 укучы. Ә мин ул агачларда һәрвакыт кошлар сайравын телим (Декоратив кошлар куя).

5укучы. Алмагач күләгәсенә балалар өчен атынгыч куям, аны ап-ак челтәрдән ясыйм (Квиллингтан ясалган атынгыч макеты куя).

6 укучы. Шул атынгычка илтә торган сукмакны ап-ак ташлардан түшим (Ак кабырчыклар тезә).

1 укучы. Аның ике ягына хуш исле чәчәкләр утыртам (Кәгазьдән ясалган чәчәкләр тезә).

2 укучы. Бу бакчага мин кечкенә сулык ясар идем , һәрвакыт чиста су салып торырмын .

3 укучы. Сукмактан читтә беседка булдырам (Беседка куя).

4 укучы. Мин тагын гөлләр утыртам. (Кәгазьдән ясалган чәчәкләр тезә).

5 укучы. Бу бакчада һәркем рәхәтләнеп ял итсен!

Барысы бергә. Шифалы яңгырлар еш яусын!

Үзанализ.

Бу тәрбия сәгатенең максаты һәм бурычлары түбәндәгеләрдән гыйбарәт:.

Укучыларга парклар һәм скверларның кеше тормышы өчен әһәмиятле икәнен төшендерү.

Укучыларда парк элементлары турында күзаллау формалаштыру.

Иҗади атмосфера аркылы, күмәк проект тудыру.

Экологик, әхлакый, эстетик, патриотик тәрбия бирү.

Укытучы өчен ноутбук, презентация, видеопроектор, экран, ә укучыларга.

минибакча ясау өчен муляжлар, кашпо, грунт, гөлләр кирәк булды. Музыкаль бизәлеш өчен Л.Бетховенның әсәре кулланылды.

Әлеге тәрбия сәгатен балаларның яшь үзенчәлекләрен, теманың заманчалыгын, тормыш белән бәйләнешен исәпкә алып төзедем, традицион метод һәм алымнар белән беррәттән яңа педагогик технологияләр дә кулландым.

Минем фикеремчә, куелган барлык максатларга ирешелде. Укучыларны тәрбия сәгатендә

пассив тыңлаучы итеп түгел, ә танып белү процессында актив катнашучы, яңа идея уйлап, аны проектка әйләндерүләренә ирешү минем бурычым иде. Шушы проектны төзү барышында укучылар эстетик, экологик, патриотик кыйммәтләрне алдылар.