Өмірді сүйе білейік!

Сабақтың мақсаты:

Жас ұрпаққа " Қазақстан - 2030" бағдарламасының басты міндеттерінің бірі - салауатты өмір салтын қалыптастыру туралы насихаттау, адам денсаулығының қымбаттылығын, өмір сүру үшін қажеттілігін, бағалы байлық екендігін түсіндіру;

оқушылардың өмірге, әсіресе адамзат ұрпағына деген аяушылық сезімін, аурудың алдын - алуды үйрету, жаман әдеттен бойларын аулақ ұстауын, оқушының санитарлық - гигиеналық талаптарға сай болуын қалыптастыру, дамыту;

болашақ қоғамның салауаттылығы әр адамға байланысты екенін, денсаулықты сатып алуға болмайтынына байланысты, спортпен айналысу, таза ауада серуендеу, еңбек етудің пайдасы туралы пікірлесу. Өмірді сүйе білуге тәрбиелеу.

Сабақтың көрнекілігі:

компьютер, слайд, кеспе қағаздар,А-4 қағаздары ,жабысқақ лента,желім,геометриялық фигуралар.

Сабақтың барысы :

Армысыздар құрметті ұстаздар мен оқушылар және осы шараға келіп отырған қонақтар!Бүгінгі сабағымыз«Өмірді сүйе білейік!»

1. Сәлемдесу «Мен өмірді сүйемін» танысу жаттығуын орындау.

Шаттық шеңберін құра отырып, әрбір қатысушы «Мен өмірді сүйемін» деп өзінің аты - жөнін мен мектебін кезектесіп айтып шығады.

2.қызығушылығын ояту

« Ыстық орындық» ойыны

- Өмір дегенді қалай түсінесің?
-Өмір адамға несімен қымбат?
-Сіздің өмірдегі мақсатыңыз қандай?
-Өмір мәнін түсінуге ұмтылу қаншалықты қажет?
-Сіз өмірді сүйесіз бе?

-Адам баласы не үшін өмір сүреді?

-Өмірдің мәні неде?

Тренинг қатысушыларына өмір жайлы өлең оқу.

Өмір жайлы сұрай берме сен менен
Өмірді мен жете зерттеп көрмегем
Өмір жайлы білгің келсе қартқа бар
Қан майданнан жалғыз ұлы келмеген.
Өмір жайлы не түсінем мен деген,
Өмір жайлы сұрай берме сен менен
Біреу жылап, біреу неге көңілді
Содан барып сұра сен өмірді
Сонда ғана түсінесің өмірді.

Өмір қас - қағым сәтте өте шығатын ағынды өзен секілді. Осы өмірдегі адамдар бір - бірінің қадірін біліп, бір - біріне қамқор, қайырымды, мейірімді болуы керек. Өмірдің, жақын адамдардың, достарымыздың, балаларымыздың құндылығын сезінуіміз керек!
Адам баласы үшін ең кымбатты - оның мәнді де сәнді өмірі. Өмірін қызықты етіп өткізу үшін өз күш-жігерін аямауы қажет. Өкінішке орай «нашақорлық», «ішімдік», «темекі» торына бейкүнә жандар ілігіп, дүние салып, аурулардың азабын тартып жатыр.
Салауатты өмір сүру дегеніміз не?
Ол - әлеуметтік тұрмысты жақсарту, бос уақытты тиімді пайдалану. денсаулықты сақтау және нығайту, сапалы тамақтану. зиянды әрекеттерден аулақ болу.
Ал зиянды әрекет дегеніміз - қазіргі таңда етек алған, адамдарды жуадай солдыратын дерттер: маскүнемдік, темекі шегу және нашақорлық. Бұлар адам баласының өзі тілеп алған айықпас дерттері.
3. Мағынаны тану.Әр топқа мәселелі жағдаяттар беріледі

«Өмірдің қиындығына тап болған жігіт»

Жас студент жігіт сабақтан келе жатып,бұрын өзімен бірге оқыған досы,әрі сыныптасын көреді.Қасындағы сыныптас досы студент жігітке бір жерге барып қыдыруды ұсынады.Студент жігітке ешқандай жаман ой келмейді. Олар жастардың жиналған жеріне келеді.Одан оның арты ойын-сауыққа айналып, сыныптасы студетті құмар ойынға итермелейді. Студент жігіт әуел баста бас тартқанымен , оны сыныптасы көндіреді.Бастамада ақшаны ұта бастайды. Соңынан қарыз болып қалғанын байқамай да қалады.Бұл ойындағы жігіттер студент жігіттің сыныптасымен байланысы бар. Олар студент бірігіп қарызға батыруды ойластырған екен. Сыныптасының ниеті қара болатын. Олар студент жігіттен қарызын беруді талап етеді. Жігіттің басы қатуда.

Топқа сұрақ: Студент жігіттің тағдыры не болмақ? Тығырықтан шығудың жолы қандай?

«Баланың жабырқаулы күйі»

Бала үнсіз өзімен-өзі ойнап отыр.Оған ешкімде көңіл бөліп жатқан жоқ.Бала күнделігін ашып оқуға кірісті.Күнделігінде ертен ата-аналар жиналысы болатыны жазылған.Бала анасына жүгіріп келіп , анасына жиналысқа қатысуын өтінді. Бірақ анасы басқа жұмыстары бар екенін айтты. Бала әкесіне де айтып көріп еді,әкесінің де қолы бос еместігі анықталды.Бала жабырқаулы күйінде орнына оралды.Бала келесі күні әкесіне барып: «Әкемен бала болып, қыдырып қайтайықшы»-деп ұсыныс жасады.Бірақ бұл ұсынысыда қабылданбады.Бала үнсіз қалды.

Топқа сұрақ: Бұл көріністен нені байқадыңыз?Балаға қалай көмек берер едіңіз?

«Мектеп бітіруші ҰБТ жағдайында»
Мектеп бітірушілер ҰБТ қатысатын. Асхат ҰБТ - дан өз ойындағыдай ұпай жинай алмады. Көңілсіз күйде үйіне оралып келе жатты. Асхаттың ойына небір ойлар келді. Ойлаған мақсаттарына балта шабылғандай күй кешті. "Ата - анам ренжитін болды ғой. Енді немен айналысамын, ақылы оқуға түсуге әке - шешемнің қаражаты жетпейді", - деп ойланып келе жатып, үйіне кеш оралғанын да байқамай қалды.

Топқа сұрақ: Осыдан кейін Асхаттың әрекеті қандай болмақ?
Сіздің жақын досыңыздың басынан осындай жағдай өтсе қалай көмек берер едің?

Шылым шегу - зиянды әдет, ағзаны улайды. Адам шылым шеккенде зиянды заттар ағзаға өтіп, өкпеге қонады. Темекі мен оның түтінінде адам ағзасына зиянды ең улы никотиннен бастап 200-дей химиялық заттар кездеседі. Бетіне әжім ерте түседі, шашы сирейді, саусағы сарғыш тартады, тісі бұзылады, терісінің қасиеті кемиді.
Алкоголь- адамды уландыратын зат. Ол әртүрлі химиялық қосылыстардан тұрады, егер оны көп мөлшерде пайдаланса, сол адам ағзасын біртіндеп уландыра бастайды. Алкоголь дәм сезу мүшелеріне, ас қорыту мүшесіне, нерв жүйесіне, миға әсер етеді. Көп мөлшерде қолданса, адам өліп кетеді.
СПИД қанның кұрамындағы иммунитетке жауап беретін түйіршіктерді өлтіреді, сол жерде көбейеді. СПИД-пен ауырған адам пневмония, менингит ауруларына шалдығады. Нашақор көп есінейді, көзінен жас ағады, терлейді, тәбеті төмендейді, денесі қалшылдап, ұйқысыздық басып, салмағын жоғалтады.

«Сен білесің бе?» айдарын ұсынамын.
1. Шылым шегуден жылына 25 млн. адам өледі.
2. Әр шылым адам өмірін 12 минутқа қысқартады.
3. Шылым шегетіндердің 80%-ы өкпе ауруымен ауырады.
4. Қазақстанда 393 мың -ВИЧ-пен ,76 мың СПИД пен ауырады.
5. СПИД-пен ауыратындардың дені жастар.
6. Шектен тыс шай мен кофе ішу де - есірткінін бір түрі.
7. Қазақстанда темекі тартатындардың саны 5 миллион.
8. Қалаларда есірткінің құрбаны болған 7-8 жастағы балалар тіркелуде.

4. Мұғалімдерге «Қолсыз және аяқсыз» мүгедек адамның биі бейнетаспасын көрсету.

5. Инклюзив терминін мұғалімдерге түсіндіру.
инклюзив - қамтитын, лат. - қамтимын - барлық балалардың түрлі қажеттіліктеріне бейімдеу тұрғысынан барлығы үшін қол жетімді болуды көздейтін жалпы білімді дамыту үдерісі, бұл білімді ерекше қажет ететін балалардың да білімге қол жеткізуін қамтамасыз етеді.
Инклюзивті білім балаларға бағытталған және барлық балалар - оқуда түрлі қажеттіліктері болатын индивидуумдар деп танитын әдістемені дамытуға ұмтылады. Инклюзивті білім оқудағы әртүрлі қажеттіліктерді қамтамасыз ету үшін икемді болатын оқыту мен оқу тәсілдерін жасауды көздейді. Инклюзивті білім енгізетін өзгерістердің нәтижесінде оқыту мен оқудың тиімділігі артса, (ерекше қажеттіліктері бар балалар ғана емес барлық балалар ұтады.

6. «Мүгедек балаларға арналған» бейнетаспасын мұғалімдерге көрсету.
Инклюзивті білім жүйесін дамыту слайд бетін көрсетіп, түсіндіру.
2015 жылға:
• мүмкіндіктері шектеулі балаларды біріктіріп оқытудың модульдік бағдарламалары;
• мүмкіндіктері шектеулі балаларды жалпы білім беретін ортада біріктіріп оқыту ережесі əзірленді;
• түрлі кемістігі бар балалар үшін бірігу нысандары анықталды;
• мүгедек балаларға қашықтықтан білім беруді ұйымдастыру қағидалары əзірленді.
2020 жылға қарай мектептерде мүгедек балалар үшін көтергіш жабдықтар, пандустар, санитарлық бөлмелерде арнайы құралдар орнату, тұтқалармен, арнайы парталармен, үстелдермен жəне басқа да арнайы компенсаторлы құралдармен жарақтандыру арқылы «кедергісіз аймақтар» құрылады.

7. «Ойланып,бірге шешейік» МҰНАРА -практикалық жұмыс

8."Қауымдастық" ойыны.
Тренингке қатысушы мұғалімдермен шаттық шеңберін құру. Оң қолдың алақанын жұмып, бас бармағын шығарып төмен қаратып, келесі мұғалімнің жазылған сол алақанына қою керек. Ал сол қолдың алақаның келесі мұғалімнің жұмылған алақанының бас бармағының астына қою керек. «1, 2, 3» рет санап, 3 деп айтқанда сол алақанды жұмып қалу керек. Осылай екі рет, екі қолды кезек ауыстыруға байланысты орындалады. Содан кейін барлық мұғалім оң қолдарын қойып, одан кейін сол қолдарын қойып, барлығы бірге жүргізуші тілегін айта отыра аспанға қолдарын көтереді.

Қорытынды : Адамға, ең бастысы осы мәселелердің шешімін табу маңызды. Бәрі де өтеді, өмір орнына келеді, бұл адамдар үшін дәлелденген. Өз өмірімізді өзіміз қадірлейік, бағалайық осы үшін атсалысып қажымай бір - бірімізден қол ұшымызды аямайық.