Внеклассное мероприятие «Тәгәри китте йомгагым»

Тәгәри китте йомгагым...

Сәхнәнең сул почмагында Убырлы карчык өе. 3-4 агач тора. Сәхнә уртасында төп, түмгәкләр. Уң якта бер урындык.

Китап тотып бер кыз керә. Урындыкка утыра.

Музыка яңгырый "Туган җирем"

Кыз: Уф, телевизор карый-карый бәйләүдән дә туктаганмын, йоклар вакыт та җиткән. Дәресем дә бетмәде бит әле. Әй, бүген өй эше итеп "Үги кыз" әкиятен биргәннәр иде бугай! (укый). "Бер ир белән хатынның ике кызы һәм уллары булган. Бер кыз үги булганга, аны чит күргәннәр, яратмаганнар.

Беркөнне абыйсы сеңлесен урманда адаштырып калдырган. Үги кыз үзе белән йомгак җеп һәм кәрзин алган булган, ди. (исни). Кайтыр юлын эзли торгач, убырлы карчык өенә барып чыккан бу кыз.

• Тәгәри китте йомгагым, күрмәдеңме, әбекәй?- дип сораган кыз әбидән". (йокыга китә).

Чиләк-кәрзин тотып, сәхнәгә 5-6 бала чыга. Кыз да аларга иярә.

" Бүләк" җыры.

Өй янына килеп тәрәзә шакыйлар. Убырлы карчык чыга.

Кыз:Тәгәри китте йомгагым, күрмәдеңме, әбекәй?

Карчык: Тфү-тфү! Кем йөри монда эш калдырып?

1 бала: Әбекәй, без Яңа Кенәр балалар иҗаты Йортына түгәрәкләргә йөрүче балалар. Менә җиләк җыярга дип, урманга килгән идек тә адаштык.

2 бала: Безгә юлны күрсәтсәнә, әбекәй!

Карчык: Балалар иҗаты Йорты дисезме? Нинди җир соң ул, анда нәрсә белән шөгыльләнәләр? Миңа шуны күрсәтегез, аннан җиләкле дә булырсыз, авылыгызга да кайтырсыз.

3 бала: Бар һөнәребезне дә күрсәтербез, юлны гына күрсәт, әбекәй!

Карчык: (аягы белән тибеп). Перес- перес. (өйгә кереп, чуалган җепләр алып гыга). Менә ничек чуалтып бетергән җепләремне кара мәчем сезнең белән сөйләшкән арада. Ташлагыз шунда чүплеккә, бернигә ярамас бу җепләр.

4 бала: Ташламыйк, әбекәй. Без җепләрне йомгакларга чорнап биребез, сиңа. Без бит крючок белән бәйләү түгәрәгенә йөрибез.

Карчык: Алайса иң матур чорнаган кызга - бүләк бирермен. Ягез, башлагыз! (кызлар чорныйлар, әби бәя бирә).

Булдырдыгыз, кызлар.

5 бала: Әби, әле безнең башка төрле һөнәрләребез дә бар. Балалар иҗаты Йортында "Бию" түгәрәге эшләп килә. Хәзер алар сезгә матур итеп биеп күрсәтерләр.

Төрек кызлары биюе.

Карчык: Менә рәхмәт, балакайлар.

Ай-ай, бөтен сөякләрем авырта. Картайдым инде, кул-аякларым да сызлый.

1 бала: И-и, әби, хәзер төзәтәбез ул кул-аякларны. Сәламәт тәндә - сәламәт акыл дип әйтәләр бит. Шуңа күрә без төрле физик күнегүләр ясадыйбыз, хәрәкәтле уеннар уйныйбыз, спорт белән шөгыльләнәбез, сәламәтлегебезне ныгытабыз. Әйдәле,әбекәй бергәләп биеп алыйк.

Бию "Пирамида"

Карчык: Арып киттем әле, балалар.Утырып торыйм.

2 бала:Әбекәй,син утырып тор. Без сиңа матур җыр җырлап күрсәтәбез.

Җыр "Зәңгәр вагон"

Мәктәп сукмакларыннан бит башлана

Һәркемнең алдагы тормышы.

Уйлаганнарыбыз тормышка аша,

Булабыз белемле һәм башлы.

Кушымта

Әйләнә-әйләнә җир шары әйләнә,

Һәрчак аяз булсын илебез күге.

Сәламәтлек, бәхет телибез без сезгә

Шатлык белән үтсен һәркемнең көне.

Йөрибез түгәрәкләргә яратып

Көндә яңа һөнәр алабыз.

Яңа Кенәр балалар иҗаты Йортына

Сезне дә без көтеп калабыз.

кушымта

3 бала: Әбекәй, син мәктәптә укыдыңмы соң? Ничәлеләр ала идең ?

Карчык: Мин, балакаем, урман мәктәбендә гел бишлеләр генә ала идем.

3 бала: Безнәң укытучыларыбыз безгә бик күп белем һәм тәрбия бирә.Ә дәрес хәзерләргә безгә әти-әниләребез, әби-бабайларыбыз ярдәм итә.

Шаян сәхнә "Ике әби"

4 бала: Әбекәй, безнең өйгә дә кайтасы килә башлады инде, үз әбиебез янына.

Карчык: Ай, рәхмәт, балалар! Карт кешене олыладыгыз. Сезнең әбиләрегез нинди бәхетле! Ә мин бер ялгызым.

5 бала: Боекма, әбекәй. Әйдә бергәләп уйнап алабыз. Түгәрәккә басыйк.

Җырлы-биюле уен "Матур Гөлгенә"

Карчык:Уф, арыдым. Уңган, булган балалар икәнсез, минем янымда гына калсагыз икән! Ярый, әти- әниләрегез көтәдер, юл күрсәтим инде үзегезгә.

Балалар: Рәхмәт сиңа. әбекәй. Безгә кунакка кил.

Карчык: Ярар, балалар. Менә серле йомгагым юл күрсәтер (йомгакны тәгәрәтә, үзе өенә кереп китә).

Кыз (уяна, исни). Әллә йоклап алдым инде, өй эшләрен тырышып эшләгәч?Нинди кызык төш керде миңа: урман, убырлы имеш... Тукта әкиятемне укып бетерим әле. (кереп китә).