Мероприятия на тему Қош бол, құтты Әліппем

Сабақтың тақырыбы : Қош бол , құтты Әліппем !

Сабақтың мақсаты : 1 . Оқушыларға әліппе мен ана тілінің маңызын түсіндіру, балалардың икем - дағдыларын көрсету .

2 .Сөйлеу , ойлау дағдыларын дамыту .

3. Оқушыларды эстетикалық талғампаздыққа , білімпаздыққа баулу .

Әдіс - тәсілдер : сұрақ - жауап , көрнекілік , қызықтыру сәті , әдеби - монтаж .

Құрал - жабдықтар : шарлармен безендіру , ғажайып сандық , шырша ойыншықтары , құттықтау ашық хаты ,сиқырлы шаршылар .

Сабақтың барысы :

1. Ұйымдастыру .

Кіріспе сөз : Құрметті қонақтар ,оқушылар ! Ең алғаш мектеп табалдырығын аттағанда қолдарыңа ұстаған «Әліппенің» барлық 42 әрібімен таныстыңдар .Енді сонымен қоштасып , « Әліппемізге » үлкен рахметімізді айтайық .

Диас : Ең алғаш қолға алғанда әліппені

Қызығып қарай бердім әріптерді ,

Мен үшін сыры жұмбақ бұл кітаптың ,

Ұстазым маған кілтін алып берді .

Айназ : Үйретіп алғаш бізге Әліппені ,

Мұғалім ғылымға жол салып берді ,

Адамның ой арманы мақсаттары ,

Оқудың сәулесімен жарық көрді.

Азат : Әліппемен қош айтысып қаламыз ,

Енді қолға басқа кітап аламыз ,

Ата- ана қуанышқа ортақ бол ,

Сауатты боп шықты міне балаңыз .

Нұрсая : Бар кітапқа бас болған ,

Әліппе ғылым анасы ,

Әліппеден басталған ,

Даналықтың данасы .

Хор : Қош бол , құтты Әліппем !

Көп нәрсені үйреттің ,

Таныстырып әріппен ,

Тақылдатып сөйлеттің .

• Алфавитте неше әріп бар , солар туралы айтып берейік .

Айназ : Алфавиттің «А» тұрады басында ,

Әрқашанда «Ә » тұрады қасында ,

Байқадың ба «Б» тұрады үшінші,

Ал осының сыры неде түсінші ?

Диас ; «А » деген ол - аналар ғой ардақты .

Азат : «Ә » деген ол - әкелер ғой салмақты .

Нұрсая : « Б» деген ол - балалар ғой әдемі .

Айназ : Біздің елде үшеуі де кәделі ,

Алшақ кетпей сондықтан да расында ,

Тұрады олар алфавиттің басында .

• Енді «Әліппемізге » арнап бір ән айтып берейік .

Хор : ән «Әліппе»

Психологиялық тренинг - жаттығу «Қолдағы жазу »

Балалар бір -бірінің алақанына жазу жазады, екінші бала қай әріп екенін табады .

«Сиқырлы шаршы » - Балалар , қазір мына сиқырлы шаршылардың артында не жасырынып тұрғанын табайық .Сендерге сұрақ қоямын ,дұрыс жауап берсеңдер шаршылар ашылады .

1) Алфавитте неше әріп бар , 42 ме 45 пе ?

2) 5+5мәні 10 ба ,9 ба ?

3) Бауырымен жорғалаушы түлкі ме, әлде жылан ба ?

4) «Сегіз аяқ» өлеңінің авторы Абай ма , әлде Ыбырай ма ?

5) Бетін адам ашады , білім нұрын шашады . Жұмбақтың шешуі кітап па , дәптер ме ?

6) Тәуелсіздігіміздің 20 жылдығы тойланды ма , 30 жылыдғы ма ?

Сиқырлы шаршылар ашылып А . Байтұрсыновтың «Оқуға шақыру» өлеңі бойынша салынған сурет ашылады .

• Біз оқыған қай өлеңнің мазмұны бойынша салынған сурет , өлеңде не туралы айтылып еді ? / балалар өлең мазмұнын айтып береді /

« Ғажайып сандық »- Балалар , мына ғажайып сандықты аша алмай тұрмын ,сендер маған көмектесіңдерші,ол үшін менің айтқан нұсқауларымды орындасаңдар , сандық ашылады .

/ тор көздерді санай отырып , кілттің суретін салады /

• Ал енді осы кілтпен мына сандықты ашайық , ішінде не бар екен ?

/ Сандық ашылады ішінен «Ана тілі » кітабы шығады , балаларға таратып беремін.

• Әліппеден кейін енді осы «Ана тілі » кітабын оқимыз .Ахмет Жұбанов аталарың «Әр халықтың ана тілі білімнің кілті .Біздің жастарымыз ана тіліне жетік, білімді, мәдениетті болсын » деген екен .Бұл сөздерді сендерге арнап айтып отыр ,ана тілін оқи отырып сендер көп нәрсені үйренесіңдер , білімдерің молаяды .Ана тілін жақсы оқысаңдар , басқа сабақтарды да жақсы оқисыңдар .

• Сендер Әліппені оқыған кезде баға қойған жоқ едік , енді ана тілін оқығаннан бастап сендерге баға қойылады .Қандай баға алғыларың келеді ?

Көрініс «Бес алдым »

Азат - баласы, Диас - әкесі.

Диас : Кәкен, сабағыңнан неше алдың ?

Азат : Міне ,бес алдым .

Диас : Мынау тұрған «үш» делік ,

Ал мынауың «екілік».

«5» алдым деп бүгін сен , неге айтасың өтірік ?

Азат : Ой, папатай есепті білмеуіңді қарашы ,

«3»-ке қоссаң «2»- ні , «5» болмай ма санашы .

• Біз қандай бес аламыз ?

Ойын «Бестік құрау» Кім көп бес алады екен , қағаз қиындыларынан бес құрау .Бес алатын оңай емес екен , көп оқу керек , сонда ғана жақсы баға аласыңдар .

• Алдымызда қандай мейрам келе жатыр , ендеше жасыл шыршаны мекендейік./ шырша ойыншықтарына жазылған мақал - мәтелдерді оқи отырып безендіреді .

Қорытынды . - Алфавиттік жұмбақтарды жасыру .

Құттықтау ашық хаттарын тапсыру

Бастауыш класпен қоштасу ертеңгілігі .

Сабақтың тақырыбы : Бастауышым - балбұлағым .

Сабақтың мақсаты :

1. Бастауыш кластан жоғары класқа өтулері туралы түсінік

беру ,оқушылардың үйренген білім , білік, дағдыларын көрсету .

2. Сөйлеу , пікір айту дағдыларын дамыту .

3. Білім алуға қызығушылықтарын арттыру ,ұстаз еңбегін бағалай

білуге ,өзіне, жолдастарына , ата-аналарына жақсы тілек білдіруге баулу.

Көрнекілік : құмыра , гүлдер , мозаика , құттықтау ашық хаттары , дипломдар

Сабақтың барысы : І . Ұйымдастыру бөлімі :

- Құрметті қонақтар. « Бастауышым - балбұлағым » атты ертеңгілігімізге қош келдіңіздер ! Бүгінгі жас ұлан - кешегі сәби балдырған . 4 жыл бұрын мектеп табалдырығын аттап , әліппе үйренген балалар , білімнің бір баспалдағына шығып отыр .Тойларың құтты болсын .

Сұлтан : Қош келіпсіз , ақ жаулықты аналар !

Жүздеріңнен мейірім мен нұр тамар .

Данара : Алдарыңызда жауқазындай құлпырған ,

Біз алаңсыз балғын шақты балалар .

Ерасыл : Қош келіпсіз , өр тұлғалы әкелер !

Қыран құстай балапанын мәпелер .

Олжас : Бүгін ,міне,бастауышпен қоштасар ,

Азамат боп кешегі сәби еркелер .

ІІ. Ойын « Ассоциация » - Әліппе деген сөзді естігенде ойымызға не түседі ?

Топтастыру стартегиясы

Балалардың жауаптары : әріптер , жазу үлгісі , алғашқы ұстаз , оқулық , алғаш рет әріптерді танып , оқығанымыз ,ата- анамыздың әліппені оқытқаны т.б

Ең алғаш әліппені оқытқан ұстазымызға алғысымызды білдірейік .

Данара : Есімде ұстаздың алғаш қарсы алғаны ,

Айқара есік ашып тастағаны ,

Бір мереке думан боп осы маңда ,

Жетелеп бір сыныпқа алып барғаны .

Енді, міне сағымдай боп өте шықты ,

Төрт жыл уақыт аз ба екен , кім біліпті .

Олжас : Үйретіп бізге алғаш Әліппені ,

Ұстазым ғылымға жол салып берді .

Адамның ой арманы - міндеттері ,

Оқудың сәулесімен жарық көрді .

Сұлтан : Шәкірттердің тыңдап жауап ,сұрағын .

Жас санаға төгіп білім шуағын .

Хат танытып , жол сілтеген өмірге

Барша жанға құрметті жан мұғалім .

Ерасыл : Жүзің жылы , құшағың кең ,

Сенен түлеп ұшамын мен .

Өзің берген біліміңмен ,

Биіктерге ұшамын мен .

Мейрам : Ақылшы асыл ұстазым ,

Өзіңе мен де ұқсармын .

Жеткенше қайрат төзімім,

Биікке самғап ұшармын .

ІІІ бөлім : Жылы жүрек - жақсы тілек .

Мұғалім : Сендерге бастауыш сыныпта білім берген басқа да пән мұғалімдері бар , сендердің білім алуларыңа көмектескен ата -аналарың бар , сол жандарға алғысымызды , жақсы тілегімізді білдірейік .

Ол үшін мына гүлдерге тілегімізді жазып , құмыраға салайық .

Оқытқан пән мұғалімдеріне құттықтау ашық хаттарын тапсыру :

1/ Алғашқы ұстазымыз Әсем Бөленханқызына :

Қолыма алғаш қалам ұстатқызған,

Ұстазым Әсем апай қымбат маған ,

Сабырлы да , салмақты қалпыменен

Қажымай үйретуден бір талмаған .

Айтамыз ,апай , сізге көп -көп алғыс .

Қашанда қасыңыздан табылармыз ,

« Бастауыш бар білімнің негізі » - деп ,

Біз сізді әрқашанда сағынармыз !

2/ Орыс тілі пәнінің мұғалімі Салтанат Молдағалиқызына :

«Үш тұғырлы тіл» біздің ұранымыз ,

Салтанат апайдан көп сұрарымыз .

Оры тілі мемлекеттік тілден кейін ,

Керек болар тіліміз , құмарымыз.

Бүгінде тілді білсек қор болмаймыз .

Шүлдірлеп тұрсақ егер зор болмаймыз ,

Тілейміз Салтанаттай апайларға

Болашаққа сілтейтін жол болғайсыз .

3/ Дене шынықтыру пәнінің мұғалімі Асқар Қадылбекұлына :

Кім білмейді біздің Асқар ағайды ,

Спорт десе жоқтан ол бар жасайды .

Қашанда балалардың жанынан табылатын ,

Жұрт оны денсаулыққа жаршы атайды .

Асқар ағай ұл -қызыңыз спортшы боп ,

Түссінші алшысынан асығыңыз ,

Қашанда биіктерден қол бұлғаңыз,

Азаматқа лайық кәсібіңіз !

4/ Еңбекке баулу пәнінің мұғалімі Лаура Асхатқызына :

Күтеміз ықыласпен бар сабағын ,

Еңбектеніп алғамыз әр бағаны ,

Еңбектің мәнін терең түсіндірген ,

Осы деп бұл заманның зор талабы .

Еңбекке баулу деген сөздің басы

Өрлесін еңбекпенен өрге тасың ,

Үйреткен түйме қадап , іс тігуді

Лаура апай ұзақ болсын өмір жасың !

5/Бейнелеу өнері пәнінің мұғалімі Риза Жеңісханқызына :

Табиғат сыйлағанда сұлулығын ,

Дәл соны Риза апайдай ұғынды кім ?

Пейзаж , натюрморт , кескіндеме

Ешқайсысы таң емес маған бүгін .

Үйрендік бейнелеудің сырын сізден ,

Апайға тілеріміз көп қой бізідің ,

Қашанда арманыңыз алдамасын ,

Ызғарын сезбегейсіз өмір - күздің .

Хор : Ән « Ұстазым »

ІҮ . Тапсырма орындау : Өлең құрау

көлбеңдеп , жалғыз - жалғыз , көтеріле , заулайды , көк қояндар ,алмайды , көкқұтандар , ербеңдеп / орны ауысқан сөздерден өлең құрау және авторы кім екенін табу ./

Көкқұтандар көлбеңдеп ,

Көтеріле алмайды,

Жалғыз - жалғыз ербеңдеп

Көк қояндар заулайды. - Мұқағали Мақатаевтың «Қайран , Қарасазым-ай » өлеңінен үзінді шығады .

Ү . Поэзия минуты - Оқушылар М.Мақатаевтың өлеңдерін мәнерлеп жатқа оқиды . Данара - Арыз жазып кетейін .

Сұлтан - Автограф .

Олжас - Туады , туады әлі нағыз ақын .

ҮІ . « Әрі оқу , әрі ойын » бөлімі

-Екі топқа бөлу .

-Кім жылдам , мозаикадан ертегі сюжеттері бейнеленген суреттерді құрайды

ҮІІ . Сергіту бөлімі : Қазақ биі - орындайтын ұлдар тобы .

ҮІІІ . Оқушыларға бастауыш класты аяқтағаны туралы дипломдар табыс ету

Сұлтанға : Кішкентай өзі , ісі бар үлкен ,

Тәртібі жақсы талапты ,

Сұлтанды біз айтамыз жырымызда ,

Оқыған беске сабақты .

Данараға : Жақсы оқып үлгі көрсеткен ,

Жақсы баға алған дәйім еңбекпен ,

Данарадай өнерлі қыз бар бізде ,

Әр сабақта маңдай терін төккен .

Олжасқа : Әнді де айып , биді де билеп ,

Алдыңда өнер көрсетер ,

Олжас әркез мақтан боп жүрмек

Лайым солай жүрсе тек.

Ерасылға : Ерасыл атты ұлымыз бар .

Еңбекқор болу ойында ,

Қиындықта жол табады ,

Бәрінен ұзын бойы да .

Мейрамға : Орнын білген жақсы ұл бар ,

Мейрам соның біреуі ,

Айтылар оған жақсы тілек ,

Бәйгеден озып келеді .

ІХ. Қорытынды

Данара : Бастауышым - балбұлағым

Алдым сенен балдың дәмін

Әріп танып , білім алып

Рахметімді жаудырамын .

Сұлтан : Бастауышым - балбұлағым

Лаулап жансын шамшырағың

Өзің берген біліміңмен

Самғап ұшты тау қыраның .

Олжас : Өтті сенде - қызық шағым ,

Бастауышым - балбұлағым .

Қоштасар күн жетті міне ,

Қимастықпен қол бұлғаймын .

Ерасыл : Біз бүгін бастауышпен қоштасамыз ,

Жолына гүлмен қоса жыр шашамыз .

Білімнің бұлағымен сусындаған ,

Өнер - білім өзіңмен достасамыз .

Мейрам : Бастауышым - бастамам .

Білім жолын бастаған ,

Білім шыңы биікте ,

Беліңді бу, жас данам !

Хор : Мектеп анаң бүгінде ,

Мектеп алтын босағаң ,

Мектеп берген біліммен ,

Марқаясың жас ұлан !

Х . Құттықтау сөз ата- аналарға, мектеп басшыларына беріледі .