Тәуелсіздік күніне арналған әзірлеме

«Тәуелсіздік - тұғырым менің!» атты мерекелік

бағдарлама әзірлемесі.

Божбанова Алмагуль Балапановна

Қарағанды қаласы, №68 МИББ кешені

Директордың тәрбие ісі жөніндегі орынбасары

Өткізілетін орны: Акт залы

Акт залы меркеге сай безендірілген. Лозунгтар ілінген, презентация «Қазақстан жылнамасы» тақырыбында көрсетіледі.Музыка әуені ойынап тұрады.

Фанфара үнімен ортаға жүргізушілер шғады.

1-жүргізуші: Армысыздар құрметті ұстаздар, оқушылар осы кештің қадірлі қонақтары! Қазақстан Республикасының Тәуелсіздік күніне арналған «Тәуелсіздік - тұғырым менің!» атты мерекелік бағдарламамызды бастаймыз.

2-жүргізуші:

Тәуелсіздік-қасиетің, құнарың,

Тәуелсіздік-жарқыраған шынарың.

Тәуелсіздік-бар бақыттың бастауы,

Тәуелсіздік-ұлтың менен ұраның.

1 жүргізуші: Иә, желтоқсан оқиғасын еске алғанда әуелі, сөз жоқ, желкілдеп өсіп келе жатқан ағаларымыз бен апаларымыздың тағдырын жас ұрпақтай жапырып, өктемдік пен үстемдіктің табанының астына тастаған қайғылы да қаралы күн еріксіз еске түседі. Желтоқсан оқиғасы. Осы бір ауыз сөзден әлі күнге дейін ызғар есіп тұрғандай. Оны еске алған сайын арқамызды аяз, маңдайымызды мұз, табанымызды сыз қарығандай күй кешетініміз рас. Өйткені ол күллі әлемді дүр сілкіндірген күндер еді.

2 жүргізуші: 1986 жылдың желтоқсаны қазақ үшін қасіреттің соңы, бақыттың басы еді. Қазақ халқын дүние жүзіне танытқан бұл оқиғаның алғашқы құрбандары Қайрат Рысқұлбеков, Ләззат Асанова, Сәбира Мұхаммеджанова, Ербол Сыпатаевтарды еске алып, оларға тағзым ету парызымыз. Желтоқсан құрбандарын бір минут үнсіз еске алайық.

Бір минут үнсіз еске алады

1-жүргізуші:Айналайын алтын әнім, жас өркені халқымның,

Желтоқсанда шындық жырын жырлаймын деп шарқ ұрдың,

Желтоқсанда егеменді ел болсақ деп талпындың,

Кеудеде әлі сыз жатыр сол кездегі салқынның,

Айналайын, жас өркені халқымның.

2-жүргізуші:Өсер елдің қай сәтте де бірлік болмақ қалауы,

Лаула, лаула, желтоқсанның мұзда жанған алауы.

Өздеріңдей өр намысты, жас өркені бар елдің,

Ешқашанда еңкеюге тиіс емес жалауы.

Ән: «Көк тудың желбірегені» 10 класс оқушыларының сахналандырылған әні Қазақ биі

1-жүргізуші: Азат рухты мен шын сүйем,

Тәуелсіздік-тәу етер жалғыз кием,

Жақсы күнге жете алмай шаһит болған,

Желтоқсан құрбанына басымды ием.

Туған елдің азаматтығы мен тәуелсіздік жолында құрбан болған Қайрат Рысқұлбеков, Ләззат Асанова, Ербол Сыпатаев сияқты апа-ағаларымыздың аңсаған армандары мен үміт тілектері бұл күнде толық жүзеге асты.

Сонда да, ән-әуенмен қоса, мәңгі көкірек көзінде қалған көріністер шұбырылып өтуі қақ. Үрейлі үкімет үйі. Оны қоршай толқыған ызалы қыз-жігіттердің жігерлі келбеттері. Оларға қадалған суық көздер мен мейірімсіз пішімдер. Одан кейін темір киімдер киіп, келтек ұстағандар мен жалаңаш қолмен жастардың сарт-сұрт айқасы.

Адам жегіш иттердің арсылы, шашынан сүйреген қазақ аруы, басынан қан шапшып, ыңырсый құлаған қазақтың бозбалары…

Енді осы кезеңнен қысқаша көрінісімізді тамашалаңыздар

Көрініс. «Желтоқсан жаңғырығы» 9а класс

2-жүргізуші:Өсер елдің қай сәтте де бірлік болмақ қалауы,

Лаула, лаула, желтоқсанның мұзда жанған алауы.

Өздеріңдей өр намысты, жас өркені бар елдің,

Ешқашанда еңкеюге тиіс емес жалауы.

Ақындар жырлайды... (Диана, Алиаскар, Жангелді)

Хор: «Желтоқсан желі», «Бір бала»

1-жүргізуші: Қазақстан - Тәуелсіздік бесігі,

Басқалардың тимесінші кесірі.

Елдің көшін өрге бастап барады,

Нұрағаңмен егіз болар есімі.

2-жүргізуші: Қазақстан - Тәуелсіздік бесігі,

Бесігімде тербеледі дос үні,

Ұлттардың ұйып тұрған ұясы,

Ұмытпайық, ұлықтайық осыны!

Мемлекетіміздің береке-бірлігін, бостандығы әрі әлемдік туыстығын білдіретін, туған жердің мақтанышы болып келетін бұл мереке әрі патриоттық деп есептеледі. Бірлескен ұйымшылдық болып, бірге жаңа мақсаттарға жетуіміз, халқымыздың ырысы және гүлденіп өсуі, сыйласуы мен түсінісуі. Әрқашанда рухымыз биік болып, салт-дәстірімізді бағалап жүрсек, алда көптеген жаңа табыстарға жетеміз.

Ән: 1 кл. Савлевтай Дильназ «Желбірейді туымыз!»

Үнді биі

1-жүргізуші: Тәуелсіздік! Қасиетті де, құдіретті осы бір ұғымның тереңіне зер салып, ой жіберейік. Тәуелсіздік атты бұл тәтті сөздің тұңғиығына ата-бабаларымыздың ғасырлар бойғы асыл арманы, азаттық жолында құрбан болған талай-талай боздақтардың ұрпаққа қалған аманаты жатыр. Ұлы даланың жас перзенті-қалың қазақтың азаттық мұратындағы қасиетті күрестері, тағдыр алға тартқан талай тар жол, тайғақ кешулер жатыр. Жаңа ғасырмен бірге келген ел тәуелсіздігі - азаттық ұранын ұрпағына ұлағат еткен бабалар үрдісінің жалғасы.

Үгітбригада «Бейбітшілікке шақырамыз!» 9б класы

1-жүргізуші: Қазақстан бүгінде егеменді ел болып дүние жүзіне танылуда. Біздің отанымыз егеменді тәуелсіз Қазақстан Республикасы. Тарих бізге тәуелсіздікті тарту етті. Енді біздің парызымыз- ұлттық рәміздерді қастерлеу, тәуелсіз мемлекетімізді өркениетті елдер қатарына қосу, мәдениеттің биік шыңына көтерілу.

2-жүргізуші: Желтоксанның екпінімен келген Тәуелсіздіктің біз үшін орны қашан да бөлек. Сондықтан да «толарсақтан саз кешкен» батыр бабаларымыздың әр жылда төгілген қанының, ұлы мұраттар жолында құрбан болған асыл азаматтарымыздың асқақ армандарының, сәбиін білегімен, даласын жүрегімен тербеткен аналарымыздың аққан жасының, Жаратқаннан тілеген медетінің арқасында қол жеткізген Тәуелсіздікті біз әрқашан мақтан тұтып, қастерлей білуге тиістіміз. Біле білсек, бұл біздің азаматтық парызымыз, адамдық борышымыз.
Ән: Маржан, Дильназ, Гаухартас «Қазақ елі»

Флешмоб «Мен Қазақстанды сүйемін!» 7 кластар

2-жүргізуші:Тігілген соң Ақ Орда- шаңырағың

Тұғырыңа қонуда сан қыраның.

Отан деген оранып от құшаққа,

Кәусарыңа шөліңді қандырамын. Тәуелсіздік туын тігуге қаншалықты қажыр-қайрат керек болса, оны құлатпай сақтап қалуға соншалықты қажыр-қайрат керек. Біз, болашақ жастар Тәуелсіздік туының аспанда мәңгілік қалықтауына әрдайым өз үлесімізді қосуымыз керек.

1-жүргізуші: Тәуелсіздік - бұл бостандық, күш, молшылық және рухани байлық. Еуразия жүрегінде, өркениеттердің ұштасқан орталығында талай ұлт пен ұлыстың қызырлы мекеніне айналған ұлы Далада азат елдің азаматы атанғаннан асқан бақыт жоқ. Тәуелсіздіктің тал бесігінде тербеліп, қыран құсы қалықтаған көк аспанымыздың астында баянды да бақытты ғұмыр кешулеріңізге тілектеспіз. Бұл мереке күні Сіздерге тілейтініміз зор-денсаулық, мақсат-жолдарыңызда сәттілік, туған-жақындарыныздың жылу сезімі әрқашан Сіздерге қуаныштар сыйлай берсін!

2-жүргізуші: Мерекелеріңіз құтты болсын! Еліміз аман, жұртымыз тыныш болсын! Қазақстан жасасын! Бүгінгі мерекелік шарамызды барлығымыз хормен «Атамекен» әнімен аяқтаймыз.

Бағдарламаға қатысушылардың барлығы қолдарына жалаулар ұстап сахнаға шығады.

«Атамекен» әні орындалады.