Бәйрәм кичәсе: Хуш киләсең, Көз-сылу!

Хуш киләсең, Көз-сылу!

( Бәйрәм кичәсе)

Максат: 1. Укучыларда табигатькә сакчыл караш тәрбияләү, тирә-

юньгә игътибарлылык, күзәтүчәнлек сыйфатларын арттыру;

2. Балаларда эстетик сыйфатлар тәрбияләү;

3. Укучыларның иҗади сәләтләрен, сәнгатьле уку күнекмәләрен, сөйләм телен үстерү.

Җиһазлау: бәйрәмгә багышлап чыгарылган фантазия өстәлләре, залны бизәү өчен кирәк-яраклар, конкурслар өчен кирәк-яраклар, чәй табынына төрле-төрле яшелчәләрдән ясалгаган салатлар, милли ризыклар, музыкаль үзәк, микрофон.

Бәйрәм барышы.

Бәйрәмне башлап җибәргәнче жюри билгеләнә.

1. Бәйрәмне ачып җибәрү.

(Кызлар башкаруында зонтик биюе белән башланып китә).

1 нче алып баручы:

Каурыйларда көз көйләрен уйнап,

Агачларны сары төскә буяп,

Урман буйлап алтын көз йөри.

Көшел-көшел бодай, арыш җыеп,

Саламнардан зур эскертләр куеп,

Кара җирне уҗым белән каплап,

Кырлар буйлап уңган көз йөри.

2 нче алып баручы:

Безне җылы мәктәпләргә дәшеп,

Аяк асларына яфрак чәчеп,

Тәрәзәләрне яңгыр белән юып,

Күп кошларны җылы якка куып,

Урам буйлап наян көз йөри.

Көз турында җыр башкарыла.

1 нче укучы:

Бүген бит уңыш бәйрәме!

Мәктәптә бөтен халык.

Без күрсәткән тамашаны

Карыйлар хәйран калып.

2 нче укучы:

Әле генә килеп төштек

Көзге бал үзәгенә

Кызлар алтын күлмәк кигән

Охшап көз гүзәленә.

3 нче укучы:

Алтын көзнең кәрҗинендә

Җиләк-җимеш бик мулдан

Рәхим итеп, тизрәк

Алыгыз безнең кулдан!

4 нче укучы:

Эх, күңелле көзге бал!

Кем килмәгән, шул күрми,

Кунакларның бу бәйрәмнән

Бер дә китәсе килми.

(Шигырь сөйләгән укучылар кереп китә)

1 нче алып баручы:

- Исәнмесез, хәерле кич, хөрмәтле тамашачылар! Без бүген сезнең белән көтеп алган уңыш бәйрәменә җыелдык.

2 нче алып баручы:

- Безнең бүгенге бәйрәм гади генә түгел, безгә бүген кунакка төрле илләрдән көз-сылулар килделәр. Күрәсезме, аларның һәрберсе шундый матур, сылулар. Сезнең һәрберегезнең дә алар белән танышасы киләдер, әйдәгез, сүзне аларга бирик.

I конкурс.

Көз-сылулар үзләре белән таныштыра, һөнәрләрен күрсәтә.

(Көз-сылулар һәрбер класстан алдан сайланып куела, алар конкурсларга алдан әзерләнә)

1 нче алып баручы:

- Беләсеңме, Камил, көз-сылулар бит үзләре генә килмәгәннәр.

2 нче алып баручы:

- Кемнәр белән килгәннәр соң алар?

1 нче алып баручы:

- Алар үзләренең дусларын да алып килгәннәр һәм алар буш кул белән килмәгәннәр. Безгә үзләренең күчтәнәчләрен дә алып килгәннәр.

2 нче алып баручы:

- Бик кызыксындырдың әле син мине,Ләйсән. Тизрәк аларның күчтәнәчләрен карыйсы килә. Әйдәгез, бергәләп карыйбыз!

II конкурс. Көз-сылуларны класс белән яклау.

(һәрбер класс үзенең көз-сылуын яклап бер концерт номеры күрсәтә)

2 нче алып баручы:

- Карале, Ләйсән, бик матур, бик сөйкемле икән бит безнең көз-сылуларыбыз. Тик минем бер нәрсәне генә беләсем килә?

1 нче алып баручы: - Нәрсәне ул?

2 нче алып баручы: - Уңган микән соң алар?

1 нче алып баручы:

- Менә безнең алдагы конкурсыбыз моны күрсәтә инде, Камил. Бу конкурсыбыз көз-сылуларның үзләренең уңышларыннан әзерләнгән ризык һәм аны яклау дип атала. Әйдәгез, аларга сүз бирик.

III конкурс. Көзге уңышлардан әзерләнгән ризыкларны яклау.

1 нче алып баручы:

- Күңелләрне хушландырып, әйдәгез, бер ял итик,

Егетләр һәм кызлар башкаруында бию карап үтик!

(Егетләр Һәм кызлар башкаруында татар халык биюе)

1 нче алып баручы:

- Кызларыбыз бу яктан да сынатмады, әйе бит, Камил?

2 нче алып баручы: - Әйе шул, барысы да бик уңганнар.

1 нче алып баручы: - Ой, уф. Нигәдер бик ямансу!

2 нче алып баручы: - Нәрсә булды, Ләйсән, нигә уфылдыйсың?

1 нче алып баручы: - И-и, беләсеңме, Камил, нигәдер бик күңелсез булып китте. Көз көне матур, яфраклар төрле төсләргә кереп уйнакласа да, уңышлар үсеп кешеләрне сөендерсә дә, барыбер моңсу.

2 нче алып баручы: - Туктале, алай димә әле, Ләйсән. Телисеңме мин синең күңелеңне күтәреп җибәрәм.

1 нче алып баручы: - Ничек?

2 нче алып баручы: - Дөресрәге мин түгел, ә безнең кунакларыбыз безгә үзләре белән булган кызыклы күренешләр алып килгәннәр. Әйдәле, карап китик, алар һичшиксез синең күңелеңне күтәрерләр.

IV конкурс. "Көзге бакчада" - класслар арасында скетч конкурсы.

2 нче алып баручы:

- Карале, Ләйсән, син көз көннәрендә нәрсәләр кияргә яратасың?

1 нче алып баручы:

- Минме, мин, җылы булса, җиңелчә куртка, чалбар, кайвакытта спорт киеме, ә суык булса, калынрак куртка, башка кепка яки башлык. И, туктале, нәрсә сөйләп торам соң, алдагы мода конкурсын кара һәм барысын да аңларсың.

V конкурс. Көзге мода күрсәтү.

1 нче алып баручы:

Көзге көннәр -

Аерылышудай моңсу,

Саубуллашу уза көз аша

Тау башында томан итәкләрен

Җыялмыйча озак маташа.

• Ничек кенә кызганыч булса да, аерылышыр мизгелләр дә килеп җитте.

2 нче алып баручы:

Сезнең алдагы көннәрегез

Мактау белән үтсеннәр.

Барлык мәктәп балалары

Хезмәт сөеп үссеннәр!

1 нче алып баручы:

Узды да китте бәйрәмебез

Биеп-җырлап алдыгыз.

Күңел тулган минутларда

Сагынып искә алыгыз.

Бергә:

• Ә хәзергә хушыгыз.

(Жюри конкурсларга нәтиҗә ясый, урыннар билгеләнә, бүләкләр тапшырыла)