Сценарий мероприятия. Альберт Узденов - поэт, прозаик, драматург, композитор, автор и исполнитель песен

Бардырыу

«Къарачайны деу къанаты»

ХЫЧАМАН айны 26 13 сагъатда.

2014 джыл

Зал ариу джыйылыб, джасалыбды. Къабыргъада Ёзделаны А. портрети, адетни юсюнден газетле тагъылыбдыла.

1. «Ичейик-ичейик», - деген джырны 1-чи куплети джырланады.

Сабийле гоппан аякъ бла чыгъадыла.

Къонакъла олтургъан заманда 2-3-чю куплетлери джырланады, сабийле ызларына келиб олтурадыла.

2. Тапсеу- 4 класс.

Бардырыучу

1 бар.: Бютеу дунияда инсанла,

Бу дуниягъа кёз ачханла.

Сизге атсынла акъ тангла,

Кюн ашхы болсун адамла!

2 бар.: Хош келигиз! Хурметли къонакъла!

1 бар.: Джыл сайын, «Ана тилим - джаным тиним», - деб сабийле бла байрым ингирле бардырабыз. Алай а, багъалы джамагъат, быллай къууанч тюбешиу биринчи кере этебиз. Джетишмеген, чийсил затыбыз болса, «Алтын этегигизге - башым къонакъ», - уллу айыб салмагъыз, деб тилекчибиз.

2 бар.: Бу сейир таулада, чокъуракъ суулада, эски джуртлада джашагъан, ётгюр ариу миллетибиз, бизни тилибизни орунсуз, иесиз къалмай, кесини кючюн, ариулугъун, затны магъанасын таб, кескин белгилеб, мингле бла джылланы бизни ата-бабаларыбызгъа сыйлы къуллукъ этиб, келген адебни, намысны, ана тилибизни тас этмей, не къыйын кюнде да атмайын ма бюгюннге дери джетгенди.

1 бар.: Сагъыш этиб, кенглешлениб, бу оюмгъа келгенбиз, къарачай тилни, адетлени уста билген, ол джорукъланы бузмай джашау тизгинде джашагъан, къарачайны атын иги бла айтдыргъан адамларыбыз миллетибизни ичинде кёбдюле.

2 бар.: Керти къарачайлы, къарачай тилге тиреу багъана салгъан, тили бай, закий, хунерли, миллетни ичинде да къарнаш миллетлени ортасында да уллу сыйы болгъан уланыбыз - Ёзденланы Мухамматны джашы Альбертча - джашыбыз барды, деб ёхтемлениб, къарачайлылача, бир миллет да айталлыкъ болмаз, эшта.

1 бар.: Алайды да, бу къууанчлы ингирибизни Джулдуз атлы уланыбызгъа - Ёзденланы Альбертге атайбыз.

3. 2 бар.: Эркинликни джолун сайлай,

Кесим этген джырны джырлай,

Къыл къобузну алыб къолгъа,

Атланырма узакъ джолгъа

Багъалы къонакъла, сизни эркинлигигиз ««Къарачайны деу къанаты» атлы байрым ингирни ачаргъа сёзню, мектебни тамадасына Тоторкъулланы Муссаны къызы Чотчаланы Алёнагъа берейик.

1 бар.: «Хансыз джомакъ болмаз, къонакъсыз той бармаз», - багъалы джамагъат, бюгюн бизде къонакълыкъ этиб, тёрюбюзню джарытханла:

2 бар.: ____________________________________________________________

__________________________________________________________________

2 бар.: Къарачай-Черкес республиканы парламентини тамадасы, «КЪАРАЧАЙ АЛАН ХАЛКЪ» джамагъат къурауну тамадасы - Хабланы Хусейни джашы Руслан.

1 бар.: Къарачай-Черкес кърал университетни ректору, профессор,психолог илмуну доктору - Тамбийланы Нюрчюкню джашы Бурхан.

2 бар.: Къарачай-Черкес республиканы мюлк къурулушну къоруусузлукъ джюрютюуюню башчысы - Ёзденланы Сафарны джашы Хусей.

1 бар.: Къарачай-Черкес республиканы Баш Сюдюню сюдюсю - Гербеклени Исхакъны джашы Ислам.

2 бар.: Къарачай-Черкес республиканы халкъ артисти, Россия Федерацияны журналистлерини члени, Россия Федерацияны джазыучуларыны члени, Къарачай драмтеатрны тамадасыны заместители Бостанланы Аубекир хаджини джашы Умар-Алий хаджини.

1 бар.: Илмуланы кандидаты, доцент, Ушинский атлы орденни кавалери, Къарачай-Черкес республиканы халкъ окъуууну махтаулу ишчиси - Алийланы Мухтарны джашы Ракай.

2 бар.: Илмуну доктору, профессор, уллу школну махтаулу ишчиси - Алийланы Къазийни къызы Тамара.

1 бар.: Къарачай-Черкес республиканы халкъ назмучусу - Мамчуланы Тариэльни къызы Дина.

2 бар.: Къарачай-малкъар джаш тёлюню ёсюмюне асыу этген «Эльбрусойд» фондну Карачаевск шахарда бёлюмюню башчысы - Къараланы Русланны джашы Азрет.

1 бар.: Къарачай-Черкес республиканы халкъ артисти - Байкъулланы Солтан.

2 бар.: ____________________________________________________________

1 бар.: Иш хапарны къояйыкъчы, тенгле, биз

Бир солуюкъ сагъыш этмей биз джукъгъа!

Къайгъыладан тазалансын эсибиз,

Алгъыш айта Джуртха, тенгнге, джуукъгъа!

2 бар.: Хурметли джамагъат, келигиз сёзню Хабланы Хусейни джашы Русланнга берейик.

__________________________________________________________________

2 бар.: Игинге джюрекден къууана,

Булутдан чыкъгъан кюнча джашнай,

Мен джырлайма санга ийнана

Тиними Меккясы - Къарачай!

1 бар.: Сыйлы джамагъат, сахнагъа, Альбертни джырларын ариу джырлаучу, Байкъулланы Солтанны чакъырабыз.

2 бар.: Бурхан, тенгим, акъыллы, бир айтайым мен,

Мен Хурзукдан саркъгъанем, Учкуландан - сен

Окъуйбуз деб, башыбыз къалды палахха…

Не аманлыкъ этгенек, Уллу Аллахха?!

1 бар.: Хурметли джамагъат, келигиз сёзню Тамбийланы Нюрчюкню джашы Бурханнга сёзню берейик.

(Аслан джыргъа хазырланады)

2 бар.: Тилибизни ариулугъун, байлыгъын, терен магъаналы болгъанын черте, татлы тилде, джюрекни тамырларындан чыкъгъан ауаз бла джазылгъан Альбертни тизгинлеринде кёб хазна, оюм кёрюнеди. 10-чу классны сохталары Альбертни «Ахыр белги», - деген джырын джюрек сезимлери бла къалай белгилеген сахна бёлекчикге къарайыкъ.

2 бар.: Сёз этмейин, тил этмейин бюгюн биз,

Кюнюбюзню бир сыйлы кюн этейик!

Бетсинеди деб уялмай бетибиз,

Хар адамны онглу джерин чертейик!

2 бар.: Хурметли джамагъат, Ёзденланы Сафарны джашы Хусейге сёзню берейик.

1 бар.: Джюрегиме сыйынмайды айтыр сёзюм,

Кёкюрегим тебинеди табмай тёзюм,

Айтырынгы джыргъа салыб айт! - дейд ангым,

Айтмасам а, чыртда атмайд мени тангым.

2 бар.: Хурметли джамагъат, сахнагъа Байкъулланы Солтанны чакъырабыз.

11. БИОГРАФИЯ.

1 бар.: Назмучу, прозаик, драматург, алим, композитор, джырлаучу, джамагъат эмда кърал къуллукъчу Ёзденланы Альберт Мухамматны джашы 1957-чи джыл, апрель айны 5-чи кюнюнде Къазах ССР-ни, Кьыбла-Къазах областыны, Арыс районуну, Задарья деген поселогунда туугъанды. Беш башлы юйдегидиле. Аны юч эгечи бла джангыз къарнашы барды. Анасы Хурзук элде гитче джашы бла джашайды. Атасы дуниядан кетгенди, джандетли болсун.

2 бар.: 1971 -чи джыл, Хурзукда орта школну 8 классын окъуб тауусханындан сора, Первомайскеде эл-мюлк техникумну, ветеринар бёлюмюне окъургъа кириб, 1975-чи джыл бошаб чыгъады.

1 бар.: 1976-чы - 78-чи джыллада Совет Аскерни тизгинлеринде къуллукъ этеди.

2 бар.: 1979-чу - 1983-чю джыллада Къарачай-Черкес кърал педагогика институтну филология факультетини орус бёлюмюнде окъугъанды. Институтну бошагъанындан сора, 2001-чи джылгъа дери Къарачай шахарны, Къарачай, Къобан районланы педагогика, культура учрежденияларында ишлегенди. 2001-чи джылдан 2011-чи джылгъа дери Къарачай-Черкес Республиканы культура министерини заместители, 2011-чи джылдан бери уа Къарачай-Черкес Республиканы Башчысыны кенгешчиси болуб ишлейди.

1 бар.: Юйдегилиди. Юй бийчеси - Ёзденланы (къыз тукъуму Джуккаладанды)

Венера Магомедни къызы 1965-чи джыл Огъары Тебердиде туугъанды. Пятигорск шахарда фармакадемияны бошагъанды. Бюгюнлюкде, Черкесск шахарда джашайды, кесини энчи предприятиесине башчылыкъ этеди.

2 бар.: Джашы - Ёзденланы Рустам 1986-чы джыл Черкесск шахарда туугъанды. Москвада Россия Право академияны юрист факультетин бошагъанды. Бюгюнлюкде Пятигорск шахарда, СКФО-ну Ич ишле Управлениясында следователь болуб ишлейди, чыны тамада лейтенантды. Юйдегилиди. Юй бийчеси Ёзденланы (къыз тукъуму Къочхарладанды) Раиса Абрек-Заурну къызы, Москвада Налог академияны экономика факультетин бошагьанды. Бюгюнлюкде, Россия Федерацияны ич ишле Министерствосуну Къарачай-Черкес бёлюмюнде ишлейди, чыны лейтенантды. Бир къызчыкълары барды. Аты Аланады.

1 бар.: Къызы - Къарабашланы (къыз тукъуму Ёзденладанды) Фатима Альбертни къызы 1987-чи джыл Черкесск шахарда туугъанды. Москвада Россия Право академияны юрист факультетин бошагьанды. Бюгюнлюкде Черкесск шахарны сюдюнде секретарь болуб ишлейди. Фатиманы баш иеси - Къарабашланы Мурат Ануарны джашы 1981-чи джыл Нарсана шахарда туугъанды. Юристлик джаны бла баш билими барды, Москвада аспирантураны бошагьанды. Бюгюнлюкде Къарачай-Черкес Республиканы финанс министерствосуну юрист бёлюмюню тамадасы болуб ишлейди. Мурат бла Фатиманы Милана бла Амир деб эки сабийлери барды.

2 бар.: Джашы - Ёзденланы Шамил Альбертни джашы 1990-чы джыл Черкесск шахарда туугъанды. 13 джылы тола, Москвада Россия Право академияны колледжини биринчи курсуна киреди да, 10-чу, 11-чи классланы эмда колледжни 1-чи курсуну программаларын да бир джылны ичинде айырмагъа бошаб чыгъады. Экинчи джыл, 14 джылы тола, Москвада Россия Право академияны юрист факультетине окъургъа киреди. Ол академияда очно окъуй тургъанлай, Москвада Академия Комплексной безопасностини экономика факультетине зоочно киреди да, эки академияны да бошаб чыгъады. Шамил эки назму китабны авторуду. 2008-чи джыл, 18 джылы тола, Шамил Россияда эм джаш адам болуб Россияны джазыучуларыны союзуна член болады. Бюгюнлюкде Шамил РСПМ-ни Санкт-Петербург бёлюмюню тамадасыны заместители болуб ишлейди. Ингилиз тилни уста билгени себебден, ишини юсю бла тыш къраллагъа барыб, керекли джумушланы баджарыб да къайтыучанды. Бусагъатда Шамил Чехиядады. Юйдегили болмагъанды. Ата сыры улуда - ана сыры къызында, деген сёзю къарачайны кертиди, бюгюн кюнде Шамил уллу джетишимлеге джетиб турады.

1 бар.: Бюгюн кюнде ата борчдан толу чыгъыб бошамагъанды, алай болса да юч туугъаны бла юч туудугъуна, керти аталыкъ эмда къарт аталыкъ эте тёрюнде джылыу бере ёсдюреди.

2 бар.: Ёзденланы Альберт назмула, джырла джазыб 1971-чи джылда башлагьанды. Аны назмулары, джырлары, хапарлары, пьесалары: «Къарачай» («Ленинни Байрагьы»), «Заман», «День Республики» («Ленинское Знамя»), «Жамбул областны газети» (къазах тилде), «Литературная Россия» деген газетледе; «Минги-Тау», «Дружба народов», «Чаян» (татар журнал), «Нюр», «Кавказия» (тюрк журнал), «Эльбрусоид», «Алан», «Беш Тау эли», «Российско-японская дружба» деген журналлада; «Сюймекликни джети джолу», «Анталогия поэзии народов Кавказа», «Къарачай поэзияны антологиясы деген китаблада эмда

башха китаблада басмаланнгандыла.

Бюгюнлюкде ол:

1 бар.: «Къачхы кечени макъамлары», Нальчик - 1989;

2 бар.: «Тузакъ», США, Махвах -1990;

1 бар.: «Къара суучукъ», Черкесск - 1991;

2 бар.: «Чолпан» - Черкесск - 1998;

1 бар.: «Мордамбаллары», Кисловодск - 1999;

2 бар.: «Запреты в нравственном воспитании молодёжи», Карачаевск - 2003;

1 бар.: «Къарачайым-Малкъарым», Москва - 2007;

2 бар.: «Полковник Батды улу», Нальчик - 2012. деген китабланы авторуду.

Кесини «Къыл къобуз бла ушакъ» деген назмуладан, джырладан къуралгъан къол джазмасын, «Акътёш» деген хапарладан, пьесаладан къуралгъан къол джазмасын, «Кесими юсюмден» деген очеркледен, статьяладан къуралгъан къол джазмасын, «Къарачай малкъар тилде аз хайырланнган сёзле» деген, 5 мингден аслам сёзден къуралгъан сёзлюкню, Дебо улу Кючюкню назмуларын джыйыб, «Хасаука» деген, «Къарачай-Малкъар Нарт эпос» деген къол джазмаланы хазыр этиб, басмагьа бериб турады.

А. Ёзден улу джазыучулукъ джанындан сора, илму иш бла кюрешеди. 2003-чю джылдан бери ол педагогика илмуланы кандидатыды, бусагъатда, заманына кёре, доктор диссертациясы бла кюрешеди.

1 бар.: Америкагьа, Турциягъа, Франциягъа, Къазагъыстаннга, Къыргъызстаннга барыб, Эресейни сыйлы сахналарында кесини санат ишлерин, миллетине сюймеклигин джюрегини ичи бла назму этиб чыгъарыб, макъам бериб джырлаб, саулай джерни юсюнде миллетлеге эштире билген джашды.

2 бар.: Уллу суратлау кючлери болгъан чыгъармалары ючюн, культурабызны айнытыргъа къошхан юлюшю ючюн, джамагъат-политика ишлеге тири къатышханы ючюн, кърал ишин айыбсыз баджаргъаны ючюн Ёзденланы Альбертге быллай сыйлы атла аталгъандыла, саугъала берилгендиле:

1 бар.: «Лауреат Всесоюзного смотра» деген медал - 1985 дж.

2 бар.: «Всесоюзный фестиваль авторской песни Саратов-86» деген фестивальны диплому - 1986 дж.

1 бар.: СССР-ни композиторларыны Союзуну диплому - 1987 дж.

2 бар.: ВЛКСМ-ны Ара Комитетини сыйлы грамотасы- 1987 дж.

1 бар.: «Лауреат 1-го Зонального фестиваля авторской песни» деген диплом - 1987 дж.

2 бар.: ВЛКСМ-ны Ара Комитетини сыйлы грамотасы- 1988 дж.

1 бар.: «Лауреат 2-го зонального фестиваля авторской песни» деген диплом - 1988 дж.

2 бар.: «Лауреат премии комсомола Карачаево-Черкесии» деген сыйлы ат - 1989 дж.

1 бар.: А. К. В. А.-ны (США) энчи саугьасы - 1990 дж.

2 бар.: «СССР-ни джазыучуларыны Союзуну члени» деген къагъыт- 1991 дж.

1 бар.: «DERNEK» - ни энчи саугъасы (Турция) - 1992 дж.

2 бар.: «Къабарты-Малкъар Республиканы культурасыны сыйлы къуллукъчусу» деген сыйлы ат - 1992 дж.

1 бар.: «Россия Федерацияны махтаулу артиста» деген сыйлы ат - 1996 дж.

2 бар.: «Къарачай-Черкес Республиканы Алийланы Умар атлы Кърал саугъасыны лауреаты» деген диплом - 1998 дж.

1 бар.: «Къарачай-Черкес Республиканы халкъ поэти» деген сыйлы ат - 1999 дж.

2 бар.: Россияны ФНКА-сыны разылыкъ къагъыты - 2003 дж.

1 бар.: «Педагогика илмуланы кандидаты» деген илму ат - 2003 дж.

2 бар.: «За личный вклад в восстановление мира и согласия на Кавказе» деген медал- 2005 дж.

1 бар.: «За мир и гуманизм на Кавказе» деген медал - 2006 дж.

2 бар.: Лауреат 1-го Межрегионального фестиваля военной песни «Наследники Победы» деген диплом- 2006 дж.

1 бар.: Россия Федерацияны ФСБ-сыны Къарачай-Черкес Республикадагьы Чек Управлениясыны тамадасыны сыйлы грамотасы - 2006 дж.

2 бар.: «Къарачай-Черкес Республиканы поэти» деген сыйлы ат - 1999 дж.

1 бар.: Къарачай-Черкес Республиканы Халкъ джыйылыууну (Парламентини) сыйлы грамотасы - 2007 дж.

2 бар.: Къарачай-Черкес Республиканы Правительствосуну сыйлы грамотасы - 2007 дж.

1 бар.: «За веру и верность» деген орден- 2007 дж.

2 бар.: «За вклад в развитие российской экономики» деген медал - 2007 дж.

1 бар.: «За восстановление мира и согласие на Кавказе» деген медал - 2007 дж.

2 бар.: «Къарачай-Черкес Республиканы халкъ артиста» деген сыйлы ат - 2007 дж.

1 бар.: «Ингуш Республиканы искусстволарыны сыйлы ишчиси» деген сыйлы ат - 2007 дж.

2 бар.: «Ёзденланы Альберт» деб, кёкде джулдузланы бирине атагьандыла - 2007 дж.;

1 бар.: «За мир и гуманизм на Кавказе» деген медал - 2008 дж.

2 бар.: «За службу на Северном Кавказе» деген медал - 2008 дж.

1 бар.: «20 лет вывода Советских войск из Афганистана» деген медал - 2009 дж.

2 бар.: «Халкъла арасы Творчество Академиягъа Член-корреспондент» этиб сайлагьандыла - 2009 дж.;

1 бар.: «Кавказны илмуларыны, культурасыны, окъуу-билимини, бизнесини джамагъат академиясына Керти академик» этиб сайлагьандыла - 2010 дж.

2 бар.: «В память 200-летия со дня вхождения Абхазии в состав Российской Империи» деген медал- 2010 дж.

1 бар.: «За заслуги» деген медал - 2010 дж.

2 бар.: «Кязим Мечиев» деген медал - 2010 дж.

1 бар.: «Алим Байсултанов» деген медал - 2010 дж.

2 бар.: «Керим Отаров» деген медал -2011 дж.

1 бар.: «Исмаил Семенов» деген медал - 2011 дж.

2 бар.: «Кавказны эм уллу музыка саугъасы «Алтын микрофон» -2012 дж.

1 бар.: «Почетный профессор Современной Гуманитарной академии» деген сыйлы ат- 2013 дж.

2 бар.: Къайсы миллетни барды быллай бир саугъасы бла кесине артыкъ сый чакъырмай, адамлыкъ, эркишилик, тенглик, къарт аталыкъ, къарнашлыкъ адетден чыкъмай, милетине сыйлы къуллукъ этиб тургъан, бирин этдим деб бирин къоймай кертиджумуш этиб джашагъан сыйлы уланы?

1 бар.: Хурметли джамагъат, сиз кёзюгюз бла кёре, къулагъагъыгъыз бла эште тургъан махтаулу саугъа къагъытла, орденле, медальля, правительственный телеграммала дунияны башында кеслерине тыйыншлы ийелерин табхандыла. Аллах разылыгъын табхан инсанланы тёрюнде болугъуз, Альберт, ызы къалын болсун.

2 бар.: Джырым учсун кёгюрчюнча, - къанат кере,

Таугъа, тюзге ана тилде салам бере,

Насыб теджей Джерде хар бир таза джаннга,

Къууанч бла чыгъыгъыз, - дей кёксюл тангнга!

2 бар.: Сыйлы джамагъат, энди сизни кёзюгюзню ачаргъа чакъырлыкъ джулдузчукъла белгили артистле тюлдюле, алай болса да бюгюн сизге Ёзденланы Альберти назмуларын окъурукъдула Къулчаланы Бийнегер. ______________________________________________________________________________________________________________________________________________________________________________________________________

2 бар.: Багъалы джамагъат, кёресиз ёсюб келген джаш тёлюде къаллай фахмулу сабийле барды, машанла сизге.

2 бар.: Бюгюнлюкде Ёзден улу Альбертни тамам бишген заманыды. Джаш джазыучуланы назмуларына, хапарларына къараб, кёлюне келгенни айта, аланы китабларын чыгъарыргъа, Россия Федерацияны джазыучуларына член этерге, болушлукъ этгенлей турады.

1 бар.: Хуначы ташны тизе билгенча, къобачы алтын керек этгенча, окъачы окъа тиге билгенча, не джанындан да Аллах толу юлюш берген уланы къарачайны, эте билген джумушларын тизе башласакъ, къарачай-малкъар орус сёзлюкню 30000 (отуз минг) сёзю азлыкъ этерикди.

2 бар.: Сыйлы джамагъат, сизни эркинлигиз бла сёзню бу асыулу, адетни, адебни, намысны мийик тоханада тутхан, къарачайны чемер уланы,

Джазгъан назмусуна макъам салыб, аны кеси джырлаб сахнагъа чыкъгъан Къарачайда биринчи джашы, Къарачайны деу къанаты ЁЗДЕНЛАНЫ АЛЬБЕРТГЕ берейик.

2 бар.:

Тёрт джанынгы тёрт тау къуршоулаб,

Назик хансча арасында ёсгенсе.

Адамынга, миллетинге, кесинге

Кёб тулпарла, кёб джигитле бергенсе.

Кёлге джетмей санга айтхан сёзлерим,

Кёзюуледе бушуу халгъа киреме.

Джашау джолум мени узакъ элтсе да,

Хурзук элим - джюрек салам иеме.

Тау башлада эримейин къарларынг,

Тюз джазынгдан къачха джетиб къаласа.

Айбатлыгъынг къууат сала джюрекге,

Хурзук элим, хаман джашнай бараса.

Учхан къушдан тюк алыучу уланынг,

Къонакъ болуб тёрюбюзге келгенди.

«Къарачайны деу къанаты», - сыйлы атны

Миллет сайлаб керти иесине бергенди.

1 бар.: Хурметли джамагъа элчилерини ауазларындан «Бёрю атар бёркюнден белгили», - деген рубликабызгъа къарайыкъ.

ВИДЕОРОЛИК.

1 бар.: Тарихибизни билмесек - адетибизни биллик тюлбюз.

2 бар.: Адетибизни билмесек - миллет джарыкълыгъы, ангысы боллукъ тюлдю.

1 бар.: Ангы болмаса - юретгенни алалмайды.

2 бар.: Юретнгенни алмаса - акъыл-балыкъ боллукъ тюлдю.

1 бар.: Акъыл тил-байлыкъ болмаса - адамлыкъ да боллукъ тюлдю.

2 бар.: Адамлыкъ болмаса - миллет да къураллыкъ тюлдю, тарихибиз эсинде къалырча.

(Аслан спектакльге хазырланады)

2 бар.: Хей, джарыкъ кюн, бир тынгыла сен меннге,

Хар адам да къууанырча эртденнге,

Къучагъынгы хаман рахат джерге кер,

Джылыуунгдан джюреклеге джылыу бер!

Хурметли джамагъат, сёзню Гербеклени Исхакъны джашы Исламгъа берейик.

2 бар.: Харам къарнашдан ашхыд халал тенг,

Биз тенглик ючюн ичейик!

Бармагъынг тюшмейд, билекни силксенг,

Харам къарнашны кечейик!

2 бар.: Ёзденланы Альберт, аллында айтханыбызча, хар неден да бирча юлюшюн алгъан инсанды. Алайды да сиз тынгылагъан тёрт тизгин, аны «Мордамбаллары» деген спектакльге джазылгъан джырданды. Сыйлы джамагъат 10-чу классны сохталарын сахнагъа чакъырайыкъ.

2 бар.: Ашхы джыр, джерге ашхы адамча,

Джашайды ёлмей ёмюрге,

Таулугъа тауча, къырдышха джазча,

Керекди джыр да джюрекге.

2 бар.: Багъалы джамагъат, сахнагъа Байкъулланы Солтанны чакъырабыз.

1 бар.: Тарихибизде бола келген затланы бирида унутулмазгъа керекди. Эртделеде джюрюген таурухланы, айтыуланы, элбергенлени, оюнланы, джырланы, ийнарланы, кюулени, тепсеулени къауумларын билиб миллетибизге къайтарыу бек магъаналы ишди.

2 бар.: Биз да бюгюн тойланы къауумларын эсибизге тюшюрюрге излейбиз. Къарачайда джюрюген тойла юч тюрлю болгъандыла: Ыстым той, Эрикген той, Джыйын той

1 бар.: Тепсеу.__________________________________

2 бар.: Не юретиб кюрешеме мен сеннге?!

Таза алим, айыб этме сен меннге.

Сенсе, сенсе, джарлы халкъгъа къыблама!

Тюненесин билген халкъны окъ, къама…

1 бар.: Алийланы Мухтарны джашы Ракайгъа сёзню берейик, хурметли джамагъат.

2 бар.: Джырла кёб тюрлю болгъандыла. Сюймеклик джыр бла ийнарны башхалыкълары барды. Намысны кючюнден джаш къыз бир-бирине сени джаратама деялмай ийнар джырлаб бирдиргендиле. Бюгюн бизни къууанчыбызны толтургъан, къарачайны керти уланы, джыргъа, тепсеуге да бирча уста, Къарачай-Черкес республиканы халкъ артисти, Россия Федерацияны журналистлерини члени, Россия Федерацияны джазыучуларыны члени, Къарачай драмтеатрны тамадасыны заместители Бостанланы Аубекир хаджини джашы Умар-Алий хаджини, джыйылгъан миллетни тилеги бла ийнар джырларгъа чакъырабыз сахнагъа.

2 бар.: Тилибиз,

Динибиз,

Джерибиз,

Ючюн, биз

Бюгюн сауутланыб,

Турмасакъ ёрге,

Тамбла тобукъланыб,

Кирликбиз кёрге!

1 бар.: Сыйлы джамагъат, сёзню къарачай тил бла джаны бир - Байчораланы Къазийни къызы Алийланы Тамара берейик.

2бар.: Мен джазама, тёге таза иннетими,

Кесим билиб, алдамайма миллетими.

Хей, джырчыма болмаса уа этген ишим,-

Мен сатлыкъма! Джашау мени ашхы тюшюм.

1 бар.: Багъалы джамагъат, сахнагъа Байкъулланы Солтанны чакъырабыз.

2 бар.: Аллах келген назмучу,

Ол - мийик сёзлеге уучу,

Не къыйыры, не уа учу

Болгъан джолда джолоучу.

2 бар.: Сыйлы джамагъат сёзню Мамчуланы Тариэльни къызы Динагъа берейик.

2 бар.: Хей, тамада, алгъыш сёз бер саугъагъа,

Тёзалмайма, кёлюм сёзден болуб токъ!

Джылы сёзню къызгъанмайыкъ саулагъа,

Ёлюб кетсек, джылы сёзден джылыу джокъ.

1 бар.: Сыйлы джамагъат, сёзню ____________________________________

___________________________________________________________

2 бар.: Къарачай - Черкес республиканы махтаулу устазы, «Элита образования» белгини иеси, школну директоруну окъуу эмда хали ёсдюрюу ишни заместители Эрикгенлени Аубекирни къызы Дотдаланы Люзагъа, бу тюбешиу ингирни тамамларгъа сёзню берейик.

2 бар.: Бюгюннгю чурумну къурагъанла эмда бардыргъанла:

1 бар.: Къарачай-Черкес республиканы халкъ артисти, Россия Федерацияны журналистлерини члени, Россия Федерацияны джазыучуларыны члени, Къарачай драмтеатрны тамадасыны заместители Бостанланы Аубекир хаджини джашы Умар-Алий хаджи.

2 бар.: школну директоруну хали ёсдюрюу ишни заместители - Къулчаланы Халитни къызы Хаджият.

1 бар.: Къарачай шахарны 6-чы мектебини къарачай тилден устазы, Россия Федерация бютеу окъуу бёлюмюню махтаулу ишчиси - Джуккаланы Хамитни къызы Гапполаны Залина.

2 бар.: Спортда уллу джетишими, дерсни айырма окъуучусу, 10 - чу классны сохтасы Алийланы Русланны уланы Аслан.

1 бар.: Буну бла тамамлайбыз, сау болугъуз!

2 бар.: Къууанч кюнлерибиз кёб болсунла!

2 бар.: Сары алтыны сомду багъасы,

Алтын - магъадан, сом - къагъыт,

Джюрек джырны уа джокъду багъасы:

Керти адамгъа джыр - байлыкъ.

1 бар.: Багъалы джамагъат, сахнагъа Байкъулланы Солтанны чакъырабыз.

2 бар.: Джырым учсун кёгюрчюнча, - къанат кере,

Таугъа, тюзге ана тилде салам бере,

Насыб теджей Джерде хар бир таза джаннга,

Къууанч бла чыгъыгъыз, - дей кёксюл тангнга!

1 бар.: Багъалы джамагъат, сахнагъа Байкъулланы Солтанны чакъырабыз.

11