Статья в газету Буряад унэн об учителе бурятского языка

Тэбхэр 50 жэлэй саана, Сагаалганай үеэр үнэр hайхан Yлэгшэн нютагай Матвей Чоймболович, Дари Батожаповна Гуляевтанай гэр бүлэдэ, Люба басаган алтан дэлхэй дээрэ мүндэлөө бэлэй. Нютаг нэрэнь Дабажаб (тиб. защищённая луной) энэ үнэр баян бүлын 10 үхибүүдэй дүрбэдэхиниинь болоно. Абань Матвей Чоймболович бүхы наhаараа түрэл нютагтаа хүдөө ажахыда хүдэлөө, тракторна бригада хүтэлбэрилдэг hэн. Коммунист, ажалдаа бэрхэ, нарин hэн. Би түрэл hургуулидаа багшаар хүдэлжэ байхадаа үхибүүдтэеэ шэнэ баригдаhан (машинный двор) экскурсида Хуhалуур ошоходоо, ехэл гайхадаг hэм. Ажалшадтаа зохидоор байра бэлдэдэг таhалга соонь hаруул, сэсэгүүд олон, газаа зосоогүй сэбэр байдаг hэн. Эжынь, Дари Батожаповна баhал бэрхэ, сэбэршэ, hургуулидамнай наhанайнгаа амаралтада гаратараа үнэн сэхэ хүдэлөө.

Yхибүүн наhанhаа эхэ эсэгын hайн hургаалтай, hүбэлгэн ухаатай байhан юм. Номдоо ехэ абьяастай, ойлгожо абаhан мэдэсэеэ ухаан бодолдоо болбосоруулжа шададаг, басагахан дунда hургуулиияа, буряад гүрэнэй багшанарай институт дүүргэжэ, түрэл нютагайнгаа hургуулида багша мэргэжэлэнгэй зам эхилhэн намтартай.

Бага ябахадам «А» үзэг танюулhан, уншуулжа, бэшүүлжэ, бэлигэй нюдэ нээhэн түрүүшынь багша Светлана Будаевна Баторова зүрхэ сэдьхэлээнь оёорто үлэнхэй. Багша мэргэжэл шэлэлгэдэ ехэхэн нүлөө үзүүлhэн багшанарые Софья Дымбрыловна Жамбалова, Евдокия Сагадаевна Полусурова, Светлана Гармажаповна Цыренжаповна, Сергей Эрдынеевич Тулонов, Памажап Тундупович Очиров, Шагдуржап Александрович Хазагаев, Пама Цыренжапович (нагасань), Мария Цыренжаповна (нагадцы) Батожаповтание hайханаар дурсан ябадаг.

Любовь Матвеевна hуралсалайнгаа 29-хи жэлые энэл hургуулидаа хүдэлжэ байна. Эды олон жэлдэ нэгэл газартаа хүдэлөөд, ямар амжалтатай ябана гээшэб, ямар габьяатай болоо юм гэбэл, Нэгэдэхеэр ахалагша багша, хэдэн олон хүндэлэлэй грамота, баярай бэшэгүүд, 2004 ондо «Россин Федерациин юрэнхы эрдэм hуралсалай хүндэтэ хүдэлмэрилэгшэ» гэжэ нэрэ зэргэдэ хүртэhэн юм. Хоёрдохёор аймаг соогоо мэдээжэ, бэрхэ шабинарые хүмүүжүүлдэг методист-багша гэhэн солодо хүртэнхэй. Тэрэнэй шабинар жэл бүхэн буряад хэлэ, литературээр республикын олимпиадада хабаадажа, түрүүшын hуури эзэлдэг гэжэ бултанда мэдээжэ. Иимэ багшатай байhан гээшэмнай, жаргал гэхэ хэрэгтэй, хэшээлнүүдээ жэгтэй hониноор үнгэргэдэг.

1985 онhоо 1994 он болотор эхин hургуулиин багшаар хүдэлжэ, сагай эрилтээр буряад хэлэ бэшэгэй багша гэhэн хоёрдохи мэргэжэлээр хүдэлжэ эхилээ. Хүндэ хүшэр 2001-2008 онуудта хүмүүжүүлгын талаар директорай орлогшоор ажаллаа.

Любовь Матвеевна классай хүтэлбэригшээр 4-хи выпуск хэжэ ябана. Манай hургуулида энэ багшамнай нэгэ классые 11 жэлэй туршада абаад ябаhан. Класс соогоо журам hайнаар баридаг, олон юумэ мэдэдэг, hурагшадтаа тэдэнээ ойлгуулхадаа бэрхэ хадаа, хүндэ ямбатай ябана, дээдэ категориин багша болонхой.

Любовь Матвеевна олон бэрхэ шабинараараа омогорхон ябадаг:

лама-санаартан: Гарма Цыденов, Цыбен Намсараев, Буда Дамбинов

багшанаар: Намжилма Тубшинова (Захааминай аймагай Цакирай интернат-hургуулиин директор), Сэсэгма Гармаева (Yлэгшэнэй үхибүүдэй сэсэрлигэй хүмүүжүүлэгшэ), Дарима Ульзетуева (Баруун-Хойто зүгэй гүрэнэй ажалшадай Санкт-Петербургын академиин багша, доцент, кандидат технических наук), Бадма Гармаев, Жаргалма Дондокова, Валя Жамсаранова г.м.

Ууган буряад хэлэеэ уг дамжуулан зааха үүргэтэй буряад хэлэнэй багша, жэл бүхэн Буряадай гүрэнэй университедэй студентнэрэй практика гарахадань туhалдаг.

Гуляевтанай гэр бүлэдэ дүрбэн үхибүүдынь багшын мэргэжэлтэй: эгэшэнь- Надежда Батожаповна Корнилова Закаменск хотын 5-хи hургуулиин географиин багша, дүүнэрынь - Сергей Матвеевич Захааминай аймагай Харацайн hургуулиин багша, Долгор Матвеевна - Улан-Удэ хотын 35-хи hургуулиин буряад хэлэ бэшэгэй багша. 2013 ондо «Буряадай эрхим багша» болоhон байна.

Тэрэнэй ашаар ургажа ябаhан эдиршүүл түрэл хэлэеэ шудалжа арадайнгаа баялиг дам үргэлжэлүүлнэ.

Педагогикын эрдэмэй доктор, профессор В.Б. Махатовай ба БРИОП-ой буряад хэлэ ба литератураар методист Х.Г. Цыденовагай хүтэлбэри доро гараhан «Алтан гадаhан» гэhэн хрестоматяар Л.М. Гуляева «Мүнгэн дугынууд» гэhэн элективнэ курс зохёожо, ажалдаа нэбтэрүүлнэ.

Тэниглэн тэгшэ зантай, томоотой түбшэн Бимба Жамсаевич нүхэрынь залуугаар сагhаа урид нүгшэжэ, заахан Жаргал хүбүүнтэеэ үлөө hэн. Иимэ ехэ гашуудалда оробошье, Любовь Матвеевна бэеэ шангаар барижа, заахан хөөрхэн хүбүүнэйнгээ аха дүүнэр, эжынгээ, түрэл нютаг, түрэл hургуулингаа түлөө зүрхэ сэдьхэлээ зобожо, оролдожол ябана.

Д.А. Намсараева, Yлэгшэнэй дунда hургуулиин директор

Концовка нужна