«Шаңғымен жүру» ашық сабақ

Ақмола облысы

Жарқайың ауданы

Өмірлік орта мектебі

Дене шынықтыру пәнінің мұғалімі

Амангелдин Ернұр Жұмаділұлы

Сабақтың тақырыбы: «Шаңғымен жүру»

Сабақтың мақсаты:Шаңғымен жүруге үйретудің алғашқы сабақтары (киіммен, шаңғы жабдықтарымен таныстыру).

Спорт жабдықтары: шаңғылар.

Сынып: 7

Берілген уақыт: 45-минут.

Сабақтың өтетін орны: арнайы спорт алаңы.

I. Кіріспе бөлім. 10-минут.

1. Балаларды белгіленген орынға қатарға тұрғызу. Кезекшінің рапорты. Сәлемдесу. Бүгінгі өтетін сабақты егжей-тегжейлі мұқият түсіндіру.

2. Саптық жаттығулар:

-Тік тұр!

-Сап түзе!

-Түзел!

-Оңға!

-Солға!

-Кері айнал!

Теориялық мәліметтер: Таза аязды ауада шаңғымен жүру оқушылардың ағзасын шынықтырады, терең тыныс алуға үйретеді. Бұлшық еттері бір қалыпты дамиды. Шаңғымен жүру негізінде оқушылардың күшін, қырағылығын, ептілігін, батылдығын және қайраттылығын жетілдіреді. Шаңғымен жүре білу, әсіресе өмірлік маңызы бар дағдыларды қалыптастыру тұрғысынан өте маңызды. Балаларды шаңғы тепкенде киетін киімдерімен таныстыру.

II. Негізгі бөлім. 30-минут.

Шаңғының ұзындығы мен таяғы әр оқушының бойына қарай өлшеніп алынады. Шаңғыны аяққа киіп ең әуелі таяқсыз қалай жүруді үйрету. Кеудені сәл еңкейтіп, сол аяқпен алға сырғаната қадам жасап, дененің салмағын сол аяққа түсіреді. Осымен бір мзетте оң қол кеуде тұста шынтақтан бүгіле, алға қарай шұғыл сермеледі. Сол қол артқа кетеді. Енді оң аяқ ілгері басылады да, сол аяқ кеуде тұста, шынтақтан бүгіле алға қарай шұғыл сермеледі, бұл мезетте оң қол артқа кетеді. Осылайша қол мен аяқтың бұл қимылдары алма кезек қайталанып отырады. Шаңғы киюді және жүруді түсіндіріп болғаннан соң, балалар шаңғысына тұрып күні бұрын салынған шаңғы соқпағымен спорт алаңын айнала саппен қозғала бастайды. Шаңғымен сырғанаған кезде аяқты алшақ қоюға болмайды. Кеудені алға үнемі еңкейтіп ұстау керек. Балалардың қалай жүріп келе жатқандығын бақылап, дұрыс жүре алмай келе жатқандарға ескерту жасау. Әсіресе қолдың дұрыс қимылдауын қадағалап отыру. Шаңғыны балалар бірінші рет тепкендіктен, ақырындап сырғанау керектігін ескерту. Жүгіруге болмайды. Осылайша спорт алаңын 2-3 рет айналып шығулары керек.

III. Қорытынды бөлім. 5-минут.

Балалар орнына келіп тұрады. Шаңғыларын шешеді де, иықтарына көтереді. Саппен жүріп келіп шаңғыны қоймаға қояды. Бір рет шаңғы сабағынан балалардың қызығушылығын және шаңғы тебуге құштарлығын байқауға болады. Шаңғы жетіспейтін жағдайда, балалар сабаққа өздерінің шаңғыларын әкелуге болады.

Үйге тапсырма: Шаңғымен сырғанауды үйрену.