Доклад на семинаре Метод проектов

Проектон метод куыд хицӕн адӕймаджы тырнындзинады рӕзты ӕмӕ ахуыры техно-

логиты иу вариант. (Метод проектов как один из вариантов личностно-ориентированной технологии обучения.)

25-ӕм астӕуккаг скъолайы

ирон ӕвзаг ӕмӕ литературӕйы

методиугонды сӕрдар Музаты Заирӕйы

доклад муниципалон методикон

иугондты ахуырадон ӕмбырды.

Дзӕуджыхъӕу 2014

Проектон метод куыд хицӕн адӕймаджы тырнындзинады рӕзты ӕмӕ ахуыры технологиты иу вариант.

(Метод проектов как один из вариантов личностно-ориентированной технологии обучения.)

Фӕстаг азты нӕ бӕстӕйы ахуырады цы ивддзинӕдтӕ ӕрцыд, уыдон зынгӕ фӕзындысты скъолайы куысты алы къабазыл дӕр. Ахуыры хъуыд- даджы ахуырдзауы сӕрмагонд тырнындзинады рӕзтыл кусын ӕрцагуырдта ног методтӕ. Бахъуыдис ссарын ахӕм методтӕ, кӕцытӕ хъуамӕ

- рӕзын кӕной ахуырдзауы тырнындзинад,

- хи сӕрмагонд хатдзӕгтӕ кӕнын разӕнгардӕй, цӕмӕй ахӕм архайд суа йӕ ӕрвылбоны царды ӕмӕ ахуыры бындур,

- ӕххыс кӕной ахуырӕн фӕрӕзтӕ арынӕн, иртасӕн куыст кӕнынӕн ӕмӕ хи ӕнтыстытӕн раст аргъ кӕнын,

- зонындзинӕдтӕ цӕмӕй здӕхт уой практикон хъуыддӕгтӕм,

- ӕнгом кӕной зонындзинӕдты ӕмӕ царды бастдзинад.

Куысты ногдзинӕдтӕ алкӕй дӕр ӕркӕндзысты бӕлвырд хатдзӕгтӕм: ӕнӕмӕнг нӕ кӕй хъӕуы ахуыры алыхуызон формӕтӕ ӕмӕ методтӕ. Уыдоны ӕхсӕн нӕ куысты иууыл ахадгӕдӕр у проекты метод. Ацы методы бындур у ахуыры ӕмӕ иртасӕн куыстыты фӕстиуджытӕ цӕмӕн хъӕуынц, уый ӕмбарын ӕмӕ сӕ пайда кӕнын цавӕрдӕр зынгӕ проблемӕтӕ иуварс кӕныны хъуыддаджы. Сӕ ахадындзинад уый мидӕг ис, ӕмӕ,

- иуӕй, ахӕм куыстӕн ис фенӕн, бамбарӕн ӕмӕ йӕ бӕлвырдӕй банкъа-

рӕн, спайда дзы кӕнын царды.

- иннӕмӕй та, ахӕм куысты фӕлтӕрддзинад у стыр тых, стыр хӕзна, кӕцы кӕрӕдзийыл бӕтты теоретикон ахуыр ӕмӕ практикон цард, ома, йӕ нысан у абоны царды сӕйраг домӕнтӕ зонынмӕ сӕйраг фӕндаг.

Уӕдӕ ахуыргӕнӕджы раз дӕр ӕвӕры вазыгджын хӕс проблемӕ ӕмбарын ӕмӕ йӕ бацагурын проект скӕнынӕн. Проблемӕ, ӕнӕмӕнг, хъуамӕ ист уа нӕ цардӕй. Ахуыры ацы домӕн бынтон ногдзинад нӕу, йӕ райдайӕн баст у, ӕвӕццӕгӕн, системон ахуыр куы фӕзынд, уыимӕ. Ахуыр уыд базоныны тыххӕй, базонын та - цард фӕхуыздӕр кӕныны тыххӕй.

Проектон методмӕ абон бахастӕуыд ахӕм ногдзинад, ома, проектон метод нӕу ахуыры системӕйы иумӕйаг сӕйраг ӕмӕ ахуырты, райдайӕнӕй кӕронмӕ зонындзинӕдтӕ райсыны формулӕ, фӕлӕ проекты метод у ахуыры системӕйы компоненттӕй иу, (чи зоны сӕ сӕйрагдӕртӕй). Абон мах цы урок федтам, уый проектон методы фӕлгӕтмӕ цы хуызы хӕссӕм, уымӕ рахизыны размӕ уын уӕ зӕрдыл ӕрлӕууын кӕндзынӕн, проекты размӕ цы сӕйраг домӕнтӕ ӕвӕрд цӕуы абон, уыдоны сӕйрагдӕртӕ:

1. Хъуамӕ, ӕнӕмӕнг, ӕнӕгуырысхо бӕлвырд уа, социалон нысаниуӕг кӕмӕн ис, ахӕм проблемӕ.

2. Проект ӕххӕст кӕнынӕн хъуамӕ уа ӕмбӕрстгонд фӕтк (ома, план действия), кӕцы ӕххӕстгонд цӕуа иртасӕн куысты; информацион зӕйтӕй ӕвзарын хъӕугӕ ӕмӕ ахадгӕ хабӕрттӕ, стӕй, уыдон проектон фӕндагыл раст аразын.

3. Ӕнӕмӕнг, бӕлвырд кӕнын хъӕуы проектӕн йӕ этаптӕ, сӕ фӕстиу-

джытӕ ӕмӕ уыдоны презентаци.

4. Проектон куысты нӕй бынат шаблонтӕ ӕмӕ трафаретон хъуыды кӕнынӕн, сӕйрагдӕр у индивидуалон куыст.

5. Проекты фӕстиуджытӕ хъуамӕ ӕвзӕрын кӕной зӕрдӕйы дӕр ӕмӕ зонды дӕр, кӕй сты хъӕугӕ, рӕсугъд ӕмӕ ахадгӕ нӕ царды.

Ацы фондз домӕны проектон куыстыты куырыхонтӕ хонынц 5П. Сӕ равӕрд уырыссагау у афтӕ:

-проблема - проектирование - поиск - продукт - презентация. Иронау та, ӕвӕццӕгӕн, афтӕ:

проблемӕ - проект скӕнын - фӕрӕзтӕ ссарын - фӕстиуджытӕ равдисын - рӕгъмӕ сӕ рахӕссын, (ома, - презентаци скӕнын).

Проектон куыстытӕ амонджытӕ ма домынц, цӕмӕй проекты алы хайӕн дӕр уа йӕхи сӕрмагонд ӕххӕст формӕ, куыд куысты хицӕн хуыз, куыд хицӕн хай, афтӕ. Ахӕм архайдӕй цас сойтӕ ис смӕрзӕн, уымӕн сымахӕй алчидӕр сӕрмагонд тӕрхонгӕнӕг у, фӕлӕ алы предметӕн дӕр кӕй ис йӕхи бынат проектон куысты, уый ахадындзинад нӕ ӕрбамбырд кодта абоны литературӕйы урокмӕ.

Нӕ методикон иугонды ӕмбырды уӕлдӕр хицауадӕй лӕвӕрд хӕсмӕ куы ркастыстӕм, уӕд бындурӕн равзӕрстам Л. Толстойы амынд, ома, литературӕ дӕр амоны цард, ӕрмӕст иннӕтӕй уӕлдай уый амоны куыд хъӕуы цӕрын ӕмӕ куыд нӕ хъӕуы цӕрын, уыдӕттӕ. Нӕ абоны куыстӕн та равзӕрстам ахуырады проекты фыццаг хуыз; уырыссагау афтӕ у: Практико-ориентированный проект. - который нацелен на социальные интересы самих участников проекта или внешнего заказчика. (Иронмӕ йӕ кӕй нӕ тӕлмац кодтон, уымӕй та, хатыр). Нӕ проектон куыстӕн ссардтам проблемӕ: нӕ цард, нӕ ирондзинад абон ӕгӕр фӕлурс кӕны…, цы - ӕгъдау, цы - ӕвзаг, цы - уӕздандзинад ӕмӕ а. д.

Нӕ архайды хицӕн пунктӕн равзӕрстам Коцойты Арсены уацмыстӕ. Нӕ абоны мини проекты этапӕн та радзырд «Ӕхцайы чырын». Куыд ӕххӕстгонд ӕрцыд, уымӕн аргъгӕнӕг уӕхӕдӕг. Куыд сӕххӕст кодта куыст йӕ нысан, уый та фенӕн уыд, иуцасдӕр, ахуырдзауты цӕстыты. Уымӕн дӕр аргъгӕнджытӕ уӕхӕдӕг.

Фӕнды ма мӕ зӕгъын уый, ӕмӕ Фатимӕйы урочы ӕххӕст кодтам минипроекты ӕппӕт домӕнтӕ дӕр. Арсены сфӕлдыстадӕй нӕ размӕ цы сӕргӕндтӕ рахастой ахуыргӕнӕг ӕмӕ ахуырдзаутӕ, уыдонӕй алкӕцы дӕр у стыр проекты аккаг. Мах равзӕрстам нӕ абоны царды тынг барджын цы сси, (ома, ӕхца), уый иуцасдӕр раст фӕндагмӕ аразын. Ома, ахуыр кӕнын уацмыс ӕмӕ уый бындурыл, проекты фӕлгӕты (пространствӕйы), амонын, уырнын кӕнын, ӕвдисын цардрӕсугъдгӕнӕнтӕй иуы сусӕг ӕмӕ ӕргом цӕсгом.