Къырымтатар тили ве эдебияты оджаларына усулий тевсиелер

Къырымтатар тили ве эдебияты оджаларына

усулий тевсиелер

Оджа эр даим талебелерни бильги севиесини котермек ичюн къайгъыра. Бильги севиеси юксек дереджеде олгъан сыныфларда биле балаларда бильгиге олгъан севиеси ве мерагъыны даимий суретте инкишаф этмек, окъутув кейфиетини осьтюрмек ве талебелерге озь устюнден де чалышмакъны ашламакъ керек. Бутюн тербиевий ишнинъ системасы окъувнынъ илерилевине буюк тесир эте .Буюк сыныфларда окъув илерилевине олгъан куреш зайыфлашмай, аксине даа да кучьлеше .Буюк сыныфтаки талебелер анъламакъ кереклер, бильги тек алий окъув юртларына кирмек ичюн керек дегиль. Бильги, бизим ишимизде, сонъундан чалышаджакъ ишханелеримизде керектир. Керекли дереджеде дерсте кечильген мевзуларны эписи талебелер анълай биле, тек талебелернинъ дикъкъатыны джельп этмек керек. Оджа талебелернинъ дикъкъатыны джельп этип, талапкяр олып, эр вакъыт окъув джерьяныны незарет этип-илерилевни керекли дереджеде юксельте биле. Бильги кейфиети эсасен, окъувгъа олгъан мунасебеттен, арекет этювден, мустакъилликтен табийдир. Окъувгъа, бильгиге мерагъы олмагъан талебе ич бир вакъыт яхшы окъуп оламаз. Биринджиден, оларны яхшы менимсеп олмагъан дерслерге меракъларыны ашламакъ, талебелернинъ озьлеринде озь къабилиетлерине ишанч догъурмакъ. Эв вазифелерини догъру беджерильгени, оларны даимий суретте тешкерильгени окъутувнынъ эффектини юксельте. Эв ишини мукеммель беджерип келювде де ана - бабаларымызнынъ ролю буюктир.

Къырымтатар тили ве эдебияты дерслери мектепте айрыджа муим ер тутмакъ керек. Оджа дерснинъ макъсатларыны догъру бельгилемек ве оларгъа мувафакъиетли иришмек ичюн тырышмакъ керек. Сыныфта зийрек талебе, эльбетте, айырылып тура. Эр бир дерсте, эр кунь бойле талебелернинъ дерске авеслиги эксильмесин деп, шу талебелернен айрыджа чалышмагъа оларгъа айрыджа эмиет бермеге тырышмакъ керек. Дерс вакътында, я да дерстен сонъ олсун. Къалгъан талебелер де озь дикъкъатындан къалмайлар. Бир кунь, я да бир дерсте яхшы окъумагъан,зийрек талебелернен чалышмасанъ айырыджа вазифе бермесенъ, шу дакъкъада биз талебенинъ зияде бильги алмакъ имкянындан марум этемиз. Меселя, бильгиси кунь-куньден артсын деп, дифференциаль вазифелер берип бу вазифелер, эльбетте , башкъа вазифелерге нисбеттен муреккепдже олмалы. Дерснинъ чешитлерини де денъиштирмек лязим зийрек талебелер дерстен тыш, материаллар араштыра. Оджадан эвель эдебият дерслеринде эсерлерни, эсерден алынгъан парчаларны мустакъиль тарзда талиль эте; эсерни тенкъидий нокътаий назардан талиль этювини талап эте. Бу табеле зайыфча окъулгъан талебенинъ джевабыны динълеп, талиль эте, озь фикирлерини даима терен ифаделей мустакъиль чалышмагъа тырыша. Бу дерслерде бойле талебе энъ яхшы, фааль консультант вазифесинде булуна. Зийрек талебелер даркъатма материаллар, тестлер, булмачалар азырлап келелер. Бундан гъайры оларнынъ арасында шиир язгъан талебер де ола. Мектеп газетасынынъ чыкъарылувна да фааль иштирак этелер. Бильгиге меракъларыны осьтюрюв макъсадынен эдебий акъшамлар, мунакъаша дерслер, конкурслар кечирильсе, бильги севиеси яхшы дереджеде олгъаныны биз бу талебелернинъ район олимпиадаларында I-ерни, джумхуриет олимпиадаларында да яхшы ерлерни къазангъанларындан бильмек мумкюн.

Бугуньки кунюмизде ана тилимизге огретювнинъ эсас макъсады - талебелерни къонушмагъа, фикир этмеге, сербест лаф этмеге огретмек. Шунынъ ичюн бутюн мектеплерде аудиобильдирюв незарет шекили киритильгендир. Незарет баасы энди талебенинъ насыл сес чыкъарып ве ичтен окъумагъа бильгенини ве таныш олмагъан метинни бир кереден менимсегенини анъламакътыр. Шу себептен мен 5-6 сыныфлар ичюн «Аудирлев» ве «Ичтен окъув» кулланмаларыны ишлеп чыкъардым.