- Преподавателю
- Другое
- План-конспект урока по белорусскому языку на тему Займеннік. Зваротны займеннік сябе
План-конспект урока по белорусскому языку на тему Займеннік. Зваротны займеннік сябе
Раздел | Другое |
Класс | 6 класс |
Тип | Конспекты |
Автор | Казакова Е.Г. |
Дата | 23.01.2016 |
Формат | docx |
Изображения | Нет |
План-канспект урока па беларускай мове ў 6 класе
Займеннік. Зваротны займеннік сябе
Мэты:
1. Дапамагчы вучням асэнсаваць асаблівасці займенніка як часціны мовы.
Вызначыць асаблівасці займенніка сябе.
2.Удасканальваць уменне вылучаць займеннікі з тэксту, вызначаць іх разрад, дакладна ужываць у вусным і пісьмовым маўленні.
3. Развіваць у навучэнцаў культуру маўлення.
4. Стварыць умовы для выхавання ў вучняў пачуцця калектывізму і ўзаемадапамогі.
Абсталяванне: зборныя табліцы, камп'ютар, слайды.
Тып урока: урок камбінаванай будовы.
Ход урока:
1. Арганізацыя, псіхалагічны настрой на працу.
Настаўнік: Вось ізноў звінеў званок,
Запрасіў нас на ўрок.
Добры дзень, я вас вітаю,
Да заняткаў запрашаю.
Наш урок хай будзе плённым,
І цікавым, і натхнёным.
Поспехаў я вам жадаю,
Калі што - я паспрыяю.
А зараз, я папрашу вас падумаць, пра якую часціну мовы ідзе гаворка ў наступнай загадцы:
Маю некалькі ў мове нагрузак патрэбных:
Замяняю назоўнік, прыметнік, лічэбнік?
- Сёння мы пазнаёмімся з новым разрадам займенніка. (слайд1) Папярэдне ўзгадаем тое, што мы ўжо ведаем пра гэту часціну мовы.
2. Задачы ўрока (вучні выбіраюць сабе задачы і зачытваюць іх):
замацаваць веды пра займеннік як часціну мовы;
вучыцца прымяняць набытыя тэарытычныя веды на ўроку пры выкананні заданняў;
умець вылучаць займеннікі ў сказах, правільна вызначаць іх разрад;
вучыцца складаць сказы і тэксты з ужываннем займенніка.
3. Паўтарэнне. Праверка дамашняга задання.
1. Што такое займеннік? 2. Якімі марфалагічнымі прыметамі валодае займеннік? 3. Яго сінтаксічная роля ў сказе? 4. Які разрад вы ўжо ведаеце? Чаму гэтыя займеннікі называюцца асабовымі? (праверка адказаў па слайдах). Праверка дамашняга практыкума
Настаўнік звяртаецца да класа з наступнымі пытаннямі:
1. Якія два асабовыя займеннікі перашкаджаюць на дарогах аўтатранспарту? (я-мы). 2. Уявіце сітуацыю: маці прыйшла з працы і ўбачыла накухонным стале стос чыстага посуду. Узрадаваўшыся, яна спытала ў дачкі: "Што гэта за талеркі і кубачкі?" Дачка адказала 5 асабовымі займеннікамі. Якімі? (яны вы-мы-ты-я). 3. За які асабовы займеннік трэба схаваць літару ц, каб атрымалася слова- назва жывёлы з пароды грызуноў? (заяц) 4. Якія яшчэ разрады вы ведаеце? Мы ўзгадаем усе разрады з дапамогай лінгвістычнай казкі, якая так і называецца − "Займеннік".
Апавядальнік. (у яго ролі выступае вучань старэйшых класаў). Задумалася аднойчы Граматыка: "Назоўнікі, прыметнікі просяцца ў адпачынак. Кім жа іх замяніць на гэты час? Што ж прыдумаць замест імені?" Яна знайшла рашэнне. "Трэба прыдумаць новую часціну мовы − займеннік. Няхай імёны ідуць у адпачынак. Займеннік будзе ўказваць на прадметы замест назоўніка, на прыметы замест прыметніка, на колькасць замест лічэбніка, але не называць іх." І Граматыка вырашыла: "Імёны змяняюцца па склонах, родах, ліках. Значыць, займеннікам я таксама дазволю змяняцца па склонах, родах, ліках. І самае галоўнае: я разнясу іх па разрадах." Пані Граматыка задумалася і пачала: "Пасадзіў дзед рэпку" (выходзяць вучні, што выконваюць ролі).
Дзед. Баба, а баба. Дзе ты забавілася?
Баба. Тут я, не турбуйся, стары.
Дзед. Паглядзі, якая рэпка вырасла. Трэба яе выцягнуць. Дзе ўнучка?
Баба. Яна ў клубе на танцах. Мы і без яе справімся.
Дзед. Ты не бачыла, дзе наш сабака падзеўся?
Баба. Ён бегаў нядаўна па двары.
Апавядальнік. Узрадавалася Граматыка: "Як добра атрымалася! Словы абазначаюць названую асобу. Я, мы, ты, вы, ён, яна, яно, яны − гэта будуць асабовыя. Што там у казцы далей? Пацягнуў дзед рэпку на сябе. Вось яшчэ адзін займеннік з'явіўся. Вяртае дзеянне да таго, хто яго ўтварыў. Так і запішам: зваротны."
Дзед. Баба, дык хто ж будзе дапамагаць мне выцягваць яе?
Баба. Што выцягваць? Якую рэпку?
Апавядальнік. Задумалася Граматыка: "Нейкія пытанні, пытанні... Гэта ўзнікаюць пытальныя займеннікі: хто? што? які? чый? каторы?
Баба. Бачу я, што яна вырасла. Яна, якую цягне ён. Я і не ведаю, колькі іх тут нарасло.
Апавядальнік. "Што ж, добра. Але займеннікі тыя самыя. Чаго здзіўляцца: усё ў свеце адносна. У пытальных сказах яны былі пытальнымі, а ў складаных будуць адноснымі. Хто, што, які, чый − працягвала разважаць Граматыка. −А калі я дзецям захачу загадаць загадку? Хтосьці, дзесьці пасадзіў штосьці? Вырасла нешта якоесьці. Ён цягне-пацягне, не можа выцягнуць. Ці змогуць адгадаць? А займеннікі такія таямнічыя. Не зразумееш, пра што гаворыцца. Адным словам, няпэўныя. Нехта, нешта, нейкі, хтосьці, штосьці, чыйсці, хто-небудзь, што-небудзь, які-небудзь. І не трэба выдумваць многа: дадаеш да адноснага займенніка прыстаўку не-, постфіксы -небудзь, -сьці і атрымліваецца новы разрад. Але да адноснага займенніка можна таксама дадаць прыстаўку ні-. Што атрымаецца? Ніхто не садзіў. Нічога не вырасла. Ох і сярдзіты разрад атрымліваецца. Усё адмаўляе. Так і назавём: адмоўныя. Ніхто, нішто, ніякі, нічый."
Баба. Дзед, гэта рэпка будзе мая.
Дзед. Не хвалюйся, яна будзе наша.
Апавядальнік." Гэтыя займеннікі абазначаюць прыналежнасць - будуць прыналежнымі.Мой,твой, наш, ваш, свой."
Баба. Гэтая рэпка ці тая? Тут іх шмат.
Апавядальнік. Граматыка ўсміхнулася: "Якім бабка пальцам паказвала? Указальным. Няхай будуць указальныя: той, гэты, такі, столькі, гэтулькі."
Дзед. Баба, калі ты ўжо памагаць мне пачнеш?
Баба. Што ты на мяне ўсё крычыш? Сам пасадзіў - сам і цягні.
Апавядальнік. Граматыка заключыла: "Словы сам, самы, увесь, усякі, кожны, як прыметнікі будуць абазначаць прыметы, адказваць на пытанне які? І называцца азначальнымі. Ну вось здаецца і ўсё. Ці не цяжка будзе дзецям запомніць усе разрады?"
Так закончыла вынаходніцтва займеннікаў Граматыка.Паспрабуем апраўдаць яе спадзяванні.
( На дошцы замацаваны займеннікі пэўнага разраду, вучні па чарзе замацоўваюць загалоўкі разрадаў).
Абмеркаванне.
- Якія вы заўважылі асаблівасці ўтварэння некаторых займеннікаў? Ці ўсе разрады тут паказаны?
(уваходзіць вучань у ролі займенніка сябе).
Сябе. Што ж гэта такое? Усе займеннікі як займеннікі, усе скланяюцца. А я ? Хто я? Я ніхто! Я Сябе! У мяне нават формы назоўнага склону няма.Сяброў паводле разраду няма. Зваротны. Звяртаюся, памажыце!
Настаўнік. Не трэба хвалявацца, паважаны займеннік Сябе. Твая праца з дзеясловам па ўтварэнні зваротнага дзеяслова ўжо вядома вучням.Так што не сярдуй: Граматыка ўсё прадугледзела.
4. Тлумачэнне новага матэрыялу.
Настаўнік. Тэма нашага ўрока - зваротны займеннік сябе. Якія асаблівасці гэтага займенніка вы заўважылі? Давайце праскланяем яго. (Выконваецца на дошцы і ў сшытках).
- Скланяем займеннік ты. Дзе падабенства? У чым розніца? Чытаем правіла на стар. 307.
- Што яшчэ мы можам сказаць пра займеннік сябе?
5. Фізкультхвілінка.
Раз, два, тры, чатыры, пяць,
Я не маю часу спаць:
Ведаю спачатку-зраблю я зарадку.
Першае заданне - гэта прысяданне…
То сагнуся я ў дугу, то на месцы пабягу.
А пасля прыгожа
Засцілаю ложак.
Чышчу зубы, мыю вушы,
Пяць хвілін стаю пад душам.
Дожджык чвошча па спіне,
Дожджык слухае мяне.
6. Замацаванне.
На слайдзе змешчаны сказы. Уставіць займеннік сябе ў патрэбнай форме, вызначыць сінтаксічную функцыю.
1. Чалавек усё ўзяў (сабе) у прыроды, усё сабраў у ( сабе), за ўсё адказвае.
2. Не хвалі сам (сябе), няхай людзі пахваляць.
3. Люблю чытаць не ўголас, а сам (сабе).
(праверка выкананага задання).
"Па сукупнасці сваіх граматычных і агульнамоўных паводзін займеннік вылучаецца ў асаблівы клас слоў-намеснікаў, якія, як "запасныя футбалісты" ці "акцёры-дублёры", выходзяць на поле ці сцэну, калі трэба "вызваліць ад гульні" знамянальныя словы", - так казаў рускі вучоны-лінгвістА.А.Рэфармацкі.
Выпраўце недакладнасці ў сказах.
1. Брат сказаў сябру прынесці сабе кнігу. 2. Сусед папрасіў сястру наліць сабе вады. 3. Настаўнік папрасіў дзяцей аднесці сшыткі да сябе.
Скласці сказы са словазлучэннямі, запісанымі на слайдзе.
1 варыянт. Прывучаю сябе, зрабіў сабе, узяў з сабой.
2 варыянт. Паклікаў да сябе, расказваў пра сябе, глядзелі перад сабой.
Настаўнік. Займеннік сябе можа ўваходзіць у склад фразеалагізмаў. Растлумачце сэнс наступных фразеалагізмаў:
Замыкацца ў сабе - пра сябе не гаварыць, сам сабе - адзін, само сабой зразумела - не выклікае сумнення, сам па сабе - самастойна, прыйсці ў сябе - супакоіцца.
6. Рэфлексія.
Настаўнік.
А зараз падвядзём вынікі работы.
- Што мы даведаліся пра займеннік сябе? Хто з вас задаволены сваёй работай? Каму сёння штосьці не ўдалося? Як вы думаеце, чаму?
- Свет займеннікаў шырокі і разнастайны. Няма ў свеце мовы без займеннікаў. Мы пастаянна імі карыстаемся,таму па ўжыванню яны займаюць 3 месца пасля назоўнікаў і дзеясловаў.Але ж назоўнікаў у мове каля 4 тысяч, дзеясловаў каля 2,5 тысячы, займеннікаў пад 60. Як вы думаеце, чаму такі маленькі разрад так шырока ўжываецца?
7. Ацэнка ведаў вучняў, выстаўленне адзнак.
8. Дамашняе заданне: параграф 60, пр. 475, 2 абзац - 2узровень;
Пр. 477 - 5 узровень або творчая праца: скласці лінгвістычную казку пра займеннік сябе.
- Развітацца з вамі хачу радкамі з верша В. Жуковіча:
У акіяне слова -ані мяжы ні донца.
Ёсць там адна аснова:
Праца і праца бясконца!
Няхай гэтыя словы стануць дэвізам у вашай вучобе. Усяго добрага!