Сценарий внеклассного мероприятия ко Дню родного языка

АНА ТИЛИМИЗ-МИЛЛЕТИМИЗНИНЪ ДЖАНЫ

Макъсат: Ана тилининъ гузеллиги ве назиклиги, къувети, зенгинлиги, тарихы акъкъында балаларнынъ бильгилерини кенишлетмек. Къырымтатар тилинде пек чокъ аджайип эсерлер яратылгъаны акъкъында бильгилерни пекитмек. Тувгъан тильге нисбетен урьмет ве севги дуйгъуларыны ашламакъ, тильни сакълап къалув истегини тербиелемек.

1 алып барыджы:

Мераба, мухтерем мусафирлер, балалар, оджалар. Бугунь биз тиль байрамында тувгъан къырымтатар тилимизнинъ аджайип дерьясына киреджекмиз. Онынъ не къадар гузель, муляйим, зенгин, татлы, къадимий олгъаныны ис этеджекмиз.

2 алып барыджы:

Гъурбетликте чокъ хорланды халкъымыз,

Азап чекти, джоюлмады тилимиз.

Аз къалды тилимиз оледжек эди,

Душманларымыз да куледжек эди.

Аллагъа шукюр, сагъ эслибашлылар,

Тилимизнинъ къоруйыджысы олдылар.

Тильдир бизим байлыгъымыз Ватанда,

Тюркий тиллер энъ дюльбердир джианда.

Бир чокъ тюрк тиллери къорантасында

Тилимиз ич ольмейджек асылында!

Къырымда севип-сайып лаф этинъиз,

Ана тильде янъгъырасынъ сесимиз!

1 сыныф талебеси:

Ана тилини бильсенъ,

Эм де гузель лаф этсенъ,

Эр кес айтыр: «Машалла!»

Не де гузель бу бала!

3 сыныф талебеси:

Чокъ тиллерни огренинъиз,

Тильде-буюк кучь,

Ана тильге урьметинъиз

Эксильмесинъ ич!

«Буюрынъыз! Сагъ олунъыз!» --

Айтамыз бизлер,

«Козьайдын! Айдын олунъыз!»

Не гузель сёзлер!

Тильдир къальбнинъ шырныкълыгъы,

Этинъ итибар,

Эр бир тильнинъ озь аэнки,

Озь шурети бар!

1 алып барыджы:

10-унджы сыныф талебелери къырымтатар оюныны косьтереджеклер. Буюрынъыз!

2 алып барыджы:

5-нджи сыныф талебелери. Софра башындаки мерасим тертиби. Буюрынъыз!

2 сыныф талебеси: « Тувгъан тиль» шиири

1 алып барыджы:

4 сыныф талебелери масалдан сценка косьтереджеклер.

Алып барыджы:

Бир заманда бар экен, бир заманда ёкъ экен. Бир аиледе баба ве онынъ ишкир къызы Айшечик, анна ве онынъ тенбель къызы Шерфечик яшай экен. Куньлерден бир кунь…

Огей ана :

Айше-ее! Хынзырнынъ къызы! Къайдасынъ шу? Бу вакъыткъа къадар баламнынъ сачларыны тарамагъансынъ.

Айшечик:

( Элинде тарагъынен чапып келе). Шимди, аннам, шимди.

Огей ана:

Сонъ, сабадан берли не яптынъ? Оджакъны якътынъмы?

Азбарны сипирдинъми?

Айшечик:

Эбет, анайым.(Шерфечикнинъ башыны тарай).

Шерфечик:

Вай! Вай! Вай! Сачларымны тарта, агъырта! (Айшечикни итеклей).

Огей ана:

Эй, сен, чолпа! Баламны агълатасынъ да! Джоюл башымдан, козюм корьмесин сени. Бар, айванларгъа ем бер! ( Шерфечикнинъ башындан сипай).

Ах, меним эки козюм, джигерим, эвлядым, шекер къызым, пек агъырттымы? Бар, джанчыгъым, къавени ич, сувумасын. (Къызлар кетелер). Бабасы-ы-ы-ы! Кель мында!

Баба:

Не олды, джаным?

Огей ана:

Сен бу чолпа къызынъны алып барып, дагъда ташламасанъ, мен къызынъны да, озюнъни де бу эвден къувып йиберирим. Анъладынъ!

2 алып барыджы:

6-нджы сыныф талебелери сизге оюн азырладылар. Буюрынъыз.

1 алып барыджы:

Ана тили-байлыгъымыз! Байлыгъымызны сакълайыкъ!

Ана тили-гъурурымыз! Гъурурымызны джоймайыкъ!

Бизни миллет оларакъ сакълайджакъ ана тилимиздир!

Буны унутмайыкъ.

2 алып барыджы:

4-нджи сыныф талебелери «Къырымда яша» йырыны йырлайджакълар

1 алып барыджы:

6-нджы сыныф талебеси « Озь тилини унутма!» шииринен.

ОЗЬ ТИЛИНИ УНУТМА!

Эвде,ёлда, орталыкъта юрем мен,

Тапалмайым Ана тильде лаф эткен!

Бу инсанлар насыл миллет, ким экен?

Озь тилине-Ана тильге не эткен?

Ят тиллерни бильмек, эбет-зенгинлик.

Окъу, яз сен бинъ бир тюрлю тиллерде.

Тапарсынъ тек ана тильде бирдемлик,

Чевре-четке айланып бакъ кимерде.

Не япсанъ-яп, озь тилини унутма!-

Бир кунь девлет тили олур Къырымда.

Деде сачкъан тереклерни къурутма!

Инълесин о дагъ-ташына, къырынъда.

1 алып барыджы:

Ана тилим-бу муаббетлик, севги йыры,

2 алып барыджы:

Ана тилим-бу той, джыйын, достлукъ, эйилик.

1 алып барыджы:

Ана тилим-йырджыларнынъ ольмез йыры.

2 алып барыджы:

Ана тилим-бу халкъ ичюн эбедийлик.

1 алып барыджы:

Бир эджасын джоймам онынъ,

2 алып барыджы:

Бир арифни унутмам.

1 алып барыджы:

Тувгъан халкъым оннен бахтлы

Урь аятнынъ къойнунда!

( Хор иштиракчилери Ватан ве тиль акъкъында йырлар айталар).