Жизнь и творчество Я. Я. Кулдыркаева

Покшчи

«Я. Я. Кулдыркаевень эрямонь ды шкинемань кизэ»

• Домкалгавтомс тонавтницятнень содамочист Я. Я. Кулдыркаевень эрямонь ды шкинемань кинзэ марто.

• Теемс содавиксэкс «Ёжов Сенксь» ёвксонть содержаниянзо марто.

• Тердемс тонавтницятнень путомо лопа сёрмадеенть эрямосто муевкс марто «Я. Я. Кулдыркаевень эрямонь ды шкинемань кизэ» книгантень.

Покшчинть молемась:

- Шумбратадо, вечкевикс ялгат, мельвановикс инжеть!

Маряви, теке исяк те нупальсэнть тешкстынек минек Яков Яковлевичень сядо комсь иетнень чачома чистэнзэ саезь. Течи таго пурнавинек теке тувталонть коряс… Ине эрзянь писателенть, минек Ламбаське велень эрицянть Яков Яковлевич Кулдыркаевень чачома чизэ.

Тесэ весе пурнавозтне - тонавтницятне ды тонавтыцятне - умок карминек анокстамо те Покшчинтень… Кувать арсемадо мейле, прынек ве превс (СЛАЙД 1) - ушодомс пурнамо Яков Яковлевичень эрямонь ды шкинемань кидензэ книга. Те тевесь а шождыне… Книгантень а улемс, бути эрьвась эйстэнек а путы лопа сёрмадеенть эрямосто муевкс марто.

Зярс ванносынек, мезе минек лиссь… Ансяк кой-кона сёрмадовкстнэ мекс - бути те книгастонть ёмасть. Миненек эрявить мукшномс неть сёрмадовкстнэнь, аравтнемс таркаваст. Секскак, озадо весе видестэ, стявтынк пилиненк, сялгинк сельминенк, анокстынк прянк важодеме.

(СЛАЙД 2) Яков Яковлевич Кулдыркаев чачсь 1894 иень ожоковонь 22-це чистэ Симбирской губерниянь Ардатовской уездэнь Ламбаське (Лобаски) велесэ (минек республикань неень Атяшевской район).

(СЛАЙД 3) 1903-1906 иетнестэ тонавтнесь эсь велень начальной школасо.

(СЛАЙД 3) 1912 - це иестэ прядызе Саранской реальной училищанть.

(СЛАЙД 4) 1913 - 1915 иетнестэ важодсь табельщикекс Амурской чугункань кинть лангсо.

(СЛАЙД 5) 1915 иестэ сон саезель армияв, косо стакасто ранязель. Пичкамодо мейле, 1918-1920 иетнестэ, служась Якстере Армиясо

(СЛАЙД 6) 1920 иестэ велявтсь чачома велев. Стака контузиятнеде кувать сэредсь.

Яковонь ульнесь покш бажамозо тонавтнемс, ды (СЛАЙД 7) 1923 иестэ сон кармась тонавтнеме Московсо счетоводонь курсасо, конатнень прядомадо мейле кадовсь важодеме счетоводокс, бухгалтерэкс, ревизорокс Московсо.

Вишка пингстэ саезь Яша содась пек ламо кезэрень эрзянь ёвкст, ёвтамот ды морот, конатнень морсильть-ёвтнильть Ламбаськень эрицятне.

Яков сонськак кармась сёрмалеме морот, ёвкст, терявтнесь стихень сёрмадомояк. (СЛАЙД 9) 1910 иестэ сёрмадызе васенце моронзо, неень шкас сон эзь ванстово...

(СЛАЙД 10) Зярдо понгсь Московов, сонзэ талантонтень фатясть тосо эриця эрзянь содавикс сёрмадыцятне П.С.Глухов, Ф.М.Чесноков ды А.М.Моро. Сынст мельтнень коряс од поэтэсь кармась важодеме эпической покш произведения лангсо.

(СЛАЙД 11) 1928-це иестэ «Якстере теште» газетань ожоковонь колмо номертнэсэ лиссть «Эрьмезь ды Котова» сонзэ поэмасто саевкстнэ.

(СЛАЙД 12) «Эрьмезь» поэмась (авторось лемдизе кезэрень эрямодо ёвксокс) башка книгасо нолдазель +1935 иестэ ды сон те шкас эзизе емавто художественной питнейчинзэ. Эрзянь литературасо «Эрьмезенть» кондямо мазый, сюпав, домка сёрмадовкс арась. Сонзэ эйсэ весе вийсэ гайгезевсь эрзянь келесь, конань мазычизэ пурьгине чирькень тюссо цитни эрьва валсто. «Эрьмезенть» ловномсто маряви, теке симат вирень лисьмапрясто: а ёвтавикс танстесь копордавксонь копордавкс валови эзгат, тон яла симат ды кодаяк а пештеват!

Сисемеце классонь тейтернетнень покш мелест ётнемс тенек пелькст те произведениястонть: (СЛАЙД 13)

Ды сакшныльть яла мокшонь

Сурань чиресэ чамань шлякшномо,

Чамань шлякшномо, цецянь кочксеме.

Ульнекшнесь вейке тейтертнень ютксо

Сон мазый, мазый... авардемс мазый!

Сонзэ рунгозо килейде видель:

Сэрензэ кувалт виде килейтне

Ваныльть сиядозь.-

Сонзэ молевтте кись виделгадыль.
Чалгамодонзо тикшесь кепетиль.
Козонь сон чалгиль - таташка лисиль.

Вай, се тейтеренть, некак, Чипазось
Ванстыль эстензэ!

Сон - се тейтересь - ульнесь Пурейшань, (СЛАЙД 13)

Сонзэ лемезэ ульнесь Котова,

А се Пурейшась ульнесь мокшонь покш,

Ульнесь мокшонь покш мокшонь масторсо.

Сон инязороль, сон модань кирдиль,

Сон модань кирдиль, сон тенст Паз невтиль.

Сонзэ тейтерьзэ Сурань чиресэ

Ялганзо марто вечкиль веденть лангс

Яла ваномо. Ваныль потмаксос,

Неиль эсь прянзо, неиль, пеедиль,

Кортыль эськанзо: «мазыят, вадрят,

Аштят ёвксошка. Ансяк а лиси

Тонеть мирдине тонсеть кондямо».

Маризе сонзэ истя кортамсто

Эрзянь од цера Суранть чиресэ. (СЛАЙД 14)

Се церась ульнесь сыре Пургасонь. (СЛАЙД 14)

А се Пургасось ульнесь эрзянь покш,

Ульнесь эрзянь покш эрзянь масторсо.

Вечкилизь сонзэ весе эрзятне,

Видечинь кисэ ды валонь кисэ.

Нилилизь эрзят сонзэ валонзо,

Ватказь ал ладсо…

А тонавтыль сон киньгак кольнеме,

Эрьва кинь вечкиль тевень кис ансяк.

Сонзэ ланганзо лия масторга

Кортыльть салава, тошкильть удалга.

А сонзэ пингстэ эрзянь мода лангс

Лия масторонь нармуньгак пелиль

Чалгамс ве пильгсэ.

Сонзэ ветямсто кармакшность эрзят

Парсте эрсеме, ожас лексеме.

А цёразо мик тевень кельс маштыль,

Тевень мельс содыль, тевень потс совиль,

Эрьва мезть теиль, эрьва мезть нолдыль,

Мерильтькак Эрьмезь сонзэ эйстэнзэ.

Сон ведьгевть теи - теке ливтямкат,

Пувак каршозост - туить чарамо.

Теи венч сон теть, озак эйзэнзэ,

Пенчсэ аволдак - туят уеме.

Истямо ульнесь тякась Эрьмезесь.

Сисем иесэ теевсь кузнецекс,

Кавксо иесэ неизь колчинзэ:

Тейсь сон цянака стака кивестэ,

Верев ёртызе - кармась ливтнеме,

Нармунь юткс кадовсь.

А сонсь Эрьмезесь аштиль морошка!

Сонзэ чамазо чиденть мазыель:
Палыль, чикс палыль; эждиль ве ендо,
Тейтерь лангс варштыль - седей солавтыль.
Сон виев ульнесь ды шумбра ульнесь.

Сонзэ кундавтто лишме пульзявиль,
Лишмесь мендявиль сонзэ икелев.
Чиеме туиль - сасыль нумоло...

Сон чийме туиль - вармась кадовиль…

А укшномодо - теке кал ульнесь…

Вай, а ёвтави ды а невтеви,

Ды тыненк, эйкакшт, превс а саеви!

(СЛАЙД 15) Артур Моро «Яни Кулдуркаевнень»

Эх, косат те шкане,

Кулдыркаев Яни?

Мезть эськат арсят?

Мезе ашти превсэть,

Мезе тонь седейсэть

Ды мезес бажат?

Мон ледстнян тонь эйсэ,

Бажан улемс вейсэ,

Кортамо мартот.

Артур Моро «Яни Кулдуркаевнень» стихотворениясонть «Эрьмезень» авторонть невтизе покштояк покш эрзянь поэтэкс. Ды уш сестэ весе арсесть: минек поэзияс лиссь валдо, покш теште. Видеяк, лисекшнэсь алкуксонь теште, - ансяк сельмень сявадыцятне, раужо ойме ломантне путсть ламо вийть сонзэ мадстемга. Сынь сёрмалесть авторонть лангс эрьва кодат кенгелемат, ловизь «Эрьмезенть» националистической произведениякс. Неть сёрматнень-кенгелематнень коряс (СЛАЙД 16) 1938 иень таштамковсто МВД-нь «башка совещаниясь» Я.Я.Кулдыркаевень пекставтызе тюрьмас. Тюрьматнесэ, лагертнесэ сонзэ пек чавсть - истя кармавсть лавгамо, кенгелеме эсензэ ды сонзэ ялганзо лангс.Тень кувалма шумбрачизэ пек беряньгадсь, памятеззяк лавшомгадокшнось.

Кода мейле карминек содамо, «Эрьмезень» авторось кирдевсь Коми АССР-нь, седе мейле Новгородской, Джамбульской областень лагертнесэ. Малавиксэнзэ туртов кучнось тосто зярыя сёрмат. Ёвтнесь - эри пек беряньстэ, ярсамс а мезде, энялдсь лездамс.

Мик лагерьсэяк Я.Я.Кулдыркаев мукшнось шка сёрмадомсь. Роднянзо-малавиксэнзэ туртов сон сёрмасо кучнось литературной произведеният, энялдсь печатавтомс эрзянь изданиятнесэ. Нама, те киненьгак эзь тееве.

(СЛАЙД 17) Олякстомась пачкодсь тензэ ансяк 1958 иень ацамковсто. Комсь иень ютазь эрзянь поэтэнтенъ ёвтасть: сон, келя, лагерьсэ аштесь чумовтомо.

Зярдо Я.Я.Кулдыркаевень нолдызь лагерьстэ - лиссь истя, кадовсь ськамонзо… Яков Яковлевич сась Ламбаськев. Сонзэ нолдызе эсензэ кудос Михаил Горев атясь, кона эрясь ськамонзо.

(СЛАЙД 18) Содатано сёрмань кучомодонзо С.Николаевнень - Мордовской АССР-нь Верховной Советэнь Президиумонь се шкань прявтонтень - веледе од произведениянь сёрмадома ды чачома таркасо эрямодо мельдензэ. Теке сёрмасонть сон вешсь лезкс тензэ кудонь путомасо. Кудось тензэ эзь стявтово сэредеманзо кувалма. Алкукскак, сестэ сон сэредсь истя пек, натой превензэяк човоргалильть.

Кучнесь лия сёрматкак. Вана вейкесь эйстэдест:

(СЛАЙД 19) 1. Кулось Я. Я. Кулдыркаев 1966-це иень медьковонь 28-це чистэ.

(СЛАЙД 20) «Эрьмезде» башка Яков Кулдыркаевень лиссь поэмазо «Андямо»,эйкакштнэнень ёвксонзо «Якстере цеця»ды «Ёжов сенксь».

«Ёжов сенксь»

Налксицятне: Сенксь (Михалкина Люба), Овто (Инчин Миша), Верьгиз (Андрей Вергизов), Карго (Валя Емельянова). Авторонь валтнэнь ловны Настя Зорькина.

Стакачитнень лангс апак вано, конат прасть минек Яков Яковлевичень эрямонзо лангс, сонзэ сёрмадовксонзо шождынеть, пешксеть кеняркссто, кемемадо. Васняяк, те сёрмадовкст тиринь перть пелькстэнть иень эрьва кодамо шкасто.

(СЛАЙД 21) Зяро эрямонь вий вельми, зярдо ловнат тундодо валморонть:

• /Ловны Андрей Вергизов /
  Пью я сосновую брагу,
  Буйными травами пьян;
  Эту шальную отвагу
  Дал мне весенний бурьян…
  («В чаще», 1951).
  
  
  

(СЛАЙД 22) Эсензэ валморотнесэ сёрмадеесь а весть невти вечкеманзо тиринь модантень.

• /Ловны Люба Тарасова/

Ой, ты, родина моя земная!
Тишина и зреющая рожь…
Синева далекая лесная,
Косяками падающий дождь.
Полюбил я радостно и жутко
Свежий шум таких твоих дождей…(1951).

(СЛАЙД 23) Вана истя артсь сёксенть ине сёрмадеесь «Лесная осень» (1923)

• /Ловны Маша Пиянзина/
  Раньше всех в лесу зеленом
  Осень липу полюбила
  И фатою нарядила,
  А сама ушла со звоном…

(СЛАЙД 24) Войнань шкадонть ледстнемакс сёрмадеесь кадсь валморо «В степи» (1949 г.) Сонзэ алтызе Василий ялаксонстэнь, кона чавовсь войнань шкане

(в 1942 г.) козонь-бути степс.

• /Русяев Илья /
  …Сколько здесь погибло наших?!
  Знает только чернозем.
  От того степные пашни
  Как бы тужат обо всем.
  
  Плачет русская здесь память,
  Никнет слезно грусть-трава.
  О погибших каждый камень
  Шепчет добрые слова…

Паряк, киньгак ули мелезэ оштё мезеяк ёвтамс?

(СЛАЙД 25) 2014-це иень ожоковонь 22-чистэ топодсть 120 иеть Я.Я.Кулдуркаевень чачома чистэнзэ. Ламбаське велесэ сонзэ калмонзо лангс пурнавкшность ламо эрзянь ломанть - сёрмадыцят, эрзянь вейксэндявксонь прявт, поэтэнть стихензэ вечкицят. Минь кемтяно - сонзэ мазый поэматне свал кармить эрямо минек оймесэ. Истят сёрмадыцятнеде, кодамо ульнесь Я.Я.Кулдуркаев, кортыть: «Сынь а кулыть... Сынь эрить эсест книгатнесэ».