- Преподавателю
- Другое
- Прэзентацыя вопыту дзейнасці МА
Прэзентацыя вопыту дзейнасці МА
Раздел | Другое |
Класс | - |
Тип | Другие методич. материалы |
Автор | Прохарава А.Н. |
Дата | 28.10.2015 |
Формат | docx |
Изображения | Нет |
Прэзентацыя вопыту дзейнасці метадычнага аб'яднання
Прохарава А.Н.
Настаўнік − прафесія ад Бога, а ўсе астатнія прафесіі - ад настаўніка…
Мы ведаем пра гэта. І таму ўся наша праца ды і ўсё наша жыццё празмерна адказныя перад Богам і перад людзьмі.
Яшчэ старажытныя грэкі казалі: "Калі кравец дрэнны - то людзі будуць проста дрэнна апранутыя, але калі ў грамадстве будзе дрэнны настаўнік - то вырастуць пакаленні неадукаваных і нявыхаваных людзей".
Не мы выбралі сваю прафесію - прафесія абрала нас… І таму мы стараемся паспяваць усюды: нашаму метадычнаму аб'яднанню належыць вялікая колькасць дыпломаў гарадскога ўзроўню першай і другой ступені ў даследчай дзейнасці, нашы вучні - шматразовыя пераможцы Рэспубліканскага фестывалю школьнікаў і навучэнскай моладзі "Дзень Зямлі", гарадскога літаратурнага конкурсу "Зорачкі Прыдзвіння", неаднаразовыя пераможцы гарадскога і абласнога этапаў конкурсу "Выратавальнікі вачамі дзяцей", пераможцы гарадскога і абласнога этапу рэспубліканскага конкурсу "Моладзь за здаровы лад жыцця". Вучні адзначаны дыпломамі гарадскога этапу алімпіяды па беларускай мове і літаратуры, узнагароджаны прызамі пераможцаў рэспубліканскай гульні-конкурсу "Буслік", з'яўляюцца пераможцамі конкурсу сацыяльных праектаў "Мая сям'я". Шматлікія творчыя працы друкаваліся ў гарадскіх перыядычных выданнях.
Ніводзін конкурс літаратурнай творчасці не абыходзіцца без нашага ўдзелу. І як вынік гэтага - выданне ў нашай школе альманаха дзіцячай і настаўніцкай творчасці "Кропля".
Настаўнікі нашага аб'яднання друкуюцца не толькі ў навукова-метадычным часопісе "Беларуская мова і літаратура", але і ў часопісе "Здаровы лад жыцця".
Настаўнік - гэта вучань, навечна выкліканы да дошкі, бо нам жыццё падаравала такую прафесію, якая прымушае мысліць творча і нестандартна.
Таму настаўнікі нашага метадычнага аб'яднання самі пішуць вершы, з'яўляюцца ўдзельнікамі педагагічных чытанняў, семінараў, творчых конкурсаў, канферэнцый, паседжанняў. Ніводнае значнае мерапрыемства не абыходзіцца без нашага ўдзелу. Мы можам быць у складзе творчай групы і да юбілею школы, і гарадскога конкурсу "Дзеці - гэта наша ўсё", можам напісаць сцэнар для ІТ-візітоўкі і паўдзельнічаць у шматлікіх іншых праектах, бо мы памятаем, што выхоўваць можна і ўласным прыкладам, у тым ліку і сваёй любоўю да беларускай мовы, літаратуры і культуры ўвогуле.
А яшчэ мы ўмеем сябраваць. Упэўнены, што гэта таксама дар, які ад нас могуць пераняць нашы вучні.
Наша задача заключаецца не ў тым, каб нашпігаваць сваіх выхаванцаў інфармацыяй, а ў тым, каб падрыхтаваць іх да жыцця, максімальна садзейнічаць самавыражэнню асобы, спрыяць сацыяльнай мабільнасці.
Раней заўсёды здымалі капялюш перад настаўнікам, святаром і ўрачом. Хочацца верыць, што гэта добрая традыцыя будзе адноўлена.
Кастрычнік у нашай школе - гэта час дэкады беларускай мовы і літаратуры. Сапраўды, ён быў насычаны на падзеі і мерапрыемствы: праца тэматычных відэасалонаў, конкурсаў і выстаў, цікавых сустрэч і падарожжаў.
Фінальным акордам стала, канечне ж, мерапрыемства "Маці, матуля, матулечка…". Напярэдадні імпрэзы мы бралі інтэрв'ю ў насельнікаў школы, разважалі пра сям'ю і шчасце.
Сярод іншых было і невялічкае інтэрв'ю нашай вучаніцы-выпускніцы, Калінінай Дар'і… Мне хацелася б з вамі падзяліцца…
Калініна Дар'я (вучаніца 11 "А" класа):
-
Я шчаслівая… У мяне цудоўная сям'я… Я люблю - любяць мяне…
Але зразумець гэта спаўна я змагла не адразу. Любіць і берагчы, цаніць і паважаць, быць памятлівай і ўдзячнай мяне вучылі доўгія гады… І не толькі бацькі… Я ведаю, чым сапраўды варта ў жыцці даражыць…
Прохарава А.Н.
-
А я веру, што мы вучым сваіх дзяцей самаму важнаму…
(выходзіць Прохараў Максім, чытае верш)
Сынок і маці
Пакуль яшчэ зялёная зямля
Трымае нас па міласці закона,
Сынок і Маці - зерне і ралля.
Сынок і Маці - мудрая ікона.
I спеюць хай удзячныя гады,
Бяжыць удаль дарога палявая.
Ён для яе маленькі назаўжды,
Нявопытны, пакуль яна жывая.
Крывавы час, адкінь свой грозны меч,
Прыслухайся да сцішанага слова.
З кароткіх, як само жыццё, сустрэч
Саткана іх нявечная размова.
Яўгенія Янішчыц
(выходзіць Прохарава А.Н., чытае верш-адказ, міні-сценіраванне)
На ўсякі выпадак...
Сын, як заўсёды,
Акуратна рабі урокі:
Дысцыпліна - харошая якасць
Не толькі поспеху ў школе.
Сынок, як і ўчора,
Паслужы няўцешным суседзям,
Адзіны сын у каторых
Нечакана загінуў ад кулі
На суровым полі заслоны!
Сыночак, чэсна, бы ўчора,
Прынось грашовую здачу
З прадуктовага магазіна.
Ды, на ўсякі выпадак,
Умей даць здачы подласці і няпраўдзе!
I яшчэ: будзь прывязан,
Як можаш, да верных сяброў па сэрцу
(Не дай табе божа мяняць іх на новых!),
Бо можа так здарыцца,
Што заўтра - не выйду табе насустрэчу.
Мама.
Яўгенія Янішчыц
Лядзінская Г.Б.
Сям'я… Як гэта важна для кожнага чалавека. Спагада, дабрыня, чулась - усе гэтыя якасці нараджаюцца ў нас менавіта там, у сям'і. Я ўдзячна сваім бацькам, што жыву на гэтым свеце, што атрымала ад іх любоў і цеплыню. Іншы раз думаю, а што было б, каб я не нарадзілася. І на гэта ў мяне ёсць свае падставы…
У 1943 годзе мая бабуля была цяжарная, чакала сына, майго бацьку. Карнікі спалілі вёску, яе выгналі на мароз босаю… Але цудам яна засталася жыць.
-
Волечка, міленькая, як бы ні было табе цяжка, захавай жыццё нашаму сыночку. Зрабі ўсё магчымае і немагчымае, каб ён жыў! А я свайго жыцця не пашкадую, каб знішчыць гэтых вылюдкаў, - прасіў мой дзядуля, адыходзячы ў партызаны.
Шаўня Антон (вучань 9 "А" класа):
-
А я ўжо чуў гэту гісторыю. Галіна Баляслаўна неаднаразова на ўроках беларускай літаратуры, калі мы гаварылі пра дзікунствы вайны, расказвала пра сваіх родных. І сям'я маёй настаўніцы стала мне блізкай. Я вырашыў, што такую гісторыю абмінуць нельга. Так і з'явілася наша даследчая праца - "Я з вогненнай вёскі".
(вучань зачытвае ўрывак з даследчай працы)
"Аднойчы карнікі акружылі дом Лаўрыновічаў. Бацька Вікенція, Ігнат, не паспеў нават добра апрануцца.
-
Дзе твой сын? Калі ён прыходзіць дадому? Дзе партызаны? - крычаў паліцай.
Але маўчаў Лаўрыновіч-старэйшы. Збітага, у драўляных чаравіках ганялі яго па марозе, а потым прывязалі да каня і пацягнулі. Па снезе за ім цягнуўся крывавы след. Такім бачылі аднавяскоўцы Ігната Лаўрыновіча ў апошні раз. Мужны патрыёт загінуў ад рук нямецкіх катаў".
Прохарава А.Н.
Колькі песень недапелі нашы матулі… А колькі намі не сказана ім самых цёплых і шчырых слоў.
І мы павінны як настаўнікі зрабіць так, каб нашы дзеці, нашы вучні сказалі гэтыя словы не заўтра, не потым, а сёння, цяпер…
(выконваецца песня "Мамін голас" без інтрументальнага суправаджэння)
Птушкамі мы пакідаем свой дом.
Шчасце шукаем, надзеяй жывём.
На чужыне сумныя дні,
Мама, без тваёй цеплыні...
Прыпеў:
Мамін голас, мамін голас -
Жменька ласкавых слоў.
Мамін голас, мамін голас
Кліча з дальніх шляхоў
Нас, дачок і сыноў,
Мамін голас кліча вечна дамоў.
Рукі твае я ў сваіх саграю.
Помню спагаду і ласку тваю,
Песню долі благаславі…
Мамін голас - голас любві.
Прыпеў:
3