Сочинение на тему: «Мой край – Мордовия моя»

Сочинение

на тему: « Мой край - Мордовия моя»

Шумбратадо!

Паряк, ламотне тынк эйстэ эзизь маря те мазый аволь покшке ошонть, конась ашти монь вишкине Чачома Масторокс. Эрьва ломаненть ули Чачома Масторозо, вейкень - те сонзэ кудозо, омбоценть - те тиринь ошось, кой-китнень - те цела странась. Апак вано покшолманть кисэ, сонзэ аштемазо, пертьпельксэнь невтема ёнкстнэнь лангс, те истямо тарка, косо сон вечки ютавтомо седе ламо шка, косо сонензэ шожда ды сэтьме оймесэ, паро седеентень, конась сонензэ пек питней.

Мордовиясь, Россиянь остаткатнень регионтнэнь коряс, аволь покш, ансяк, мон арсян, а кадови удалов мазычинзэ марто. Мон чачинь ды эрян тесэ. Те модась монь тетятнень-аватнень, покштятнень ды сыре покштятнень. Кода жо ульнесь теезь ошось? Мекс истя лемдизь? Кие икеле эрясь те модасонть ды теизе сонзэ содавиксэкс. Те кевкстематненень мон пек явинь мель ды ламо карминь содамо!

Эрьва ломаненть ули фамилиязо, лемезэ ды тетялемезэ. Мезе жо карми улеме фамилиякс, лемекс ды тетялемекс ошонть? Нама те гимн, флаг, герб. Минек гимнэсь сёрмадозь колмо кельсэ: мокшонь, эрзянь ды рузонь.Флагсонть колмо юткот: чопода-якстере, ашо ды чопода-сэнь.Гербсэнть истят жо тюсст. Якстересь невти эрямонть, ашось - ваньксчи, чопода-сэнь - раштыця мода. Истямо тюстнэсэ мазылгавтозь минек авань ды цёрань оршамопельтне. Сынь пек сюпавт, невтить ломанень сехте вадря ёнкст.

Эряви меремс, ошонть лемезэ саезь Саранка лейстэ, конась невти летьке тарка ламо чудикерькс марто. Саранск ошось ульнесь теезь Саранка леенть керш чиресэ, конась туи мейле Инсарс. Седикеле ошонть куншкакуросо аштесь ниле ужонь чавозь чочкосто Кремлясь. Стака кемемс, но ней те тарканть саи Советской площадесь. А кодамо сон мазый покшчистэ! Зярдо сы панжиков маней читнень марто, весе чувтнэ кармить нолдамо пургондавкстнэнь ды пертьпельксэсь вельтяви пиже сувсо. А кодамо коштось те шкастонть, пряськак вели!

Зярдо ванат ташто фотографият, тиринь таркатне ве вановкссо а содавить, весе истя полавтовсь, паролгадсь, одкстомсь. А зяро од зданият стявтозь, эрьва иесэ мезе-бути лиякстоми ды лиякстоми вадря ёнксонтень. Ансяк саемс хоть седикелень шканть ды неень, прявтокс сюпавчись - те ломатне, конатне эрить Саранск ошсо!

А теян ильведевкс, бути мерян, што весе сынь инжень вечкицят, тевень а пелицят ды превейть. Те сынстважодемаст ашти эйкакштнэнь тонавтнемасо, лецямосо, паро китнесэ, наукасо, эсь таркасо аштемасо, оштнэнь ды велетнень ваньксчисэ. Сынь вечкитьЧачома Масторонть ды теить седее ламо, штобу сон касоволь.

А зяро пародояк паро ломанть! Школасо тонавтыцятне тонавтыть минек вечкемс эсь масторонть, важодемс сонзэ туртов, кемемс эсь виес, секс мекс атят-покштят содасть, што минек модась сехте вадря Россиянь пелькске, ды тейсть весе паро эрямонтень.

Модась, косо ломанесь чачсь да кассь, кадови сонзэ седейс пингеньперть. Мон чачинь Мордовиясо, пек шнан минек моданть, сонзэ превей ды чевте седей марто ломатнень.Те модась - сехте вечкевикс таркам, косо паро, лембе ды сэтьме.

Арсян, кадык минек эйкакштнэ кортыть аволь вейке кельсэ, сынст аволь вейке тюссо кедесь ды аволь вейкеть сельмест, ансяк сынст вейсэнди вечкемась ды сюкпрянь ёвтамось Тиринь Модантень. Бути ломаненть улить превть, маштомачи ды мель, сон нолдасы сынст Тиринь Масторонтень.

Мон пек вечкан эсь Мордовиянть!