Классный час Торскэн харсачнр

Классный час

Кʏʏндврин тɵр «Тɵрскән харсачнр»

Кʏсл: Тɵрскән харсгч Алдр дәәнд орлцсин Героймудын тускар цәәлhж ɵгх,

эврә hазрин туужан соньмслhн, тɵрскнч седкл сурһульчнрт ɵглһн.

Кʏʏндврин давлhн

Багшин ʏг: Мендʏт кʏʏндтә мана сурhульчнр, багншнр, ирсн гиичнр!

Эндрк мана кʏʏндвр «Тɵрскән харсачнр» гидг тɵрәр.

Тɵрскән харсгч Алдр дәәнд Хальмг Таңhчин улс баатр зɵрмгән ʏзʏлж орлцсмн. Дән - мана Тɵрскнә тууҗд хамгин кʏчр, әәмшгтә ʏʏлдвр болсн деерән, зɵрмг, баатр йовдларн нерән туурулсн салдсмудин нерд мɵнкрʏлв. Дәәнд шишлинг орлцсн, цусан асхсн, әмнәсн хаhцсн дәәчнрин дундас 21 кʏн Советск Союзин Герой нер зʏʏсмн. Диилвр бәрлhнд тәвцән орулсн негнь - Ока Иванович Городовиков.

1.О.И.Городовиковин тускар 9-гч классин сурhульч Cохра Антонина келҗ ɵгх.

Багш: Теегәр, хальмгуд дунд

Тууж-тууль келгднә,

Кееhәр, хальмгин дуунд

Келмрчс Аaкуг магтна.

Хальмг бичәч Инҗин Лиҗ Ока Городовиковд тәвгдсн бумбин тускар шʏлг бичсмн.

2.О.И.Городовиковин туск шулг 9-гч классин сурhульч Муутла Алена келҗ ɵгх.

Элстихн болн гиичнрнь

Эн бумб hәәхцхәнә,

Элдв баатрин дʏринь

Эдн цугтан энкрлцхәнә.

Арнзл кʏлгнь халурхад

Авад зулхар hәрәдҗәнә.

Амhаhан кемлҗ телʏркәд,

Агсрҗ толhаhан зәәлжәнә.

Омгта командир Ока

Арнзл кʏлгән зокмҗта,

Олн диилврин хаалhнь

Арднь герлтсн бахмҗта.

Багш: 1942 җилин зунар Хальмгин хәәртә ʏрн, онц хальмг мɵртә дивизин сержант Делкә Эрднь ʏлгʏрт уга баатр-зɵрмг ʏʏлдвр кесндән хальмг улсас тʏрʏн болҗ Советск Союзин Герой нер зʏʏсмн.

3.Эрдни Деликовин тускар 10-гч классин сурhульч Манжин Цаhана келҗ ɵгх.

Багш:Советск Союзин Герой нер зʏʏсн баатрмудын дундас мана hазра кʏн Николай Мартынович Санджиров. Мана школд Санджировд нерәдгдсн баскетболар марhан болна. Мана школын сурhульчнр эн марhанд кесг дәкж тʏрʏн орм авсмн.

4. Н.М.Санджировин тускар 10-гч классин сурhульч Монгла Элина келҗ ɵгх.

Багш: Тɵрскән харсгч Алдр дәәнд орн-нутгиннь җирhлин тɵлә, диилврин тɵлә цус-әмән әврлго, Тугтнахн орлцсмн. 200 шаху мана селәнә дәәчнр ик темдгтә бәрлдәнд орлцсмн: Днепр hатлhнд, Курск дугад, Сталинградын дәәнд болн нань чигн. Ик зунь орденар болн медаляр ачлгдсмн. Мана Тугтна шʏлгч Байна Буйнта дәәнә туск шʏлгтән эцкинь ямаран зoвлнг ʏзҗ йовсна тускар бичсмн.

5. Байна Буйнтан бичсн шʏлг 10-гч классин сурhульч Хɵɵчнә Цецн келҗ ɵгх.

Шʏлгин йоснла таарад,

Шултән суусн цаглам

Шаван бәрж эцкм

Шугж сɵɵд сернә.

Мелмзсн хар кɵшгәр

Хаврин асхн бʏркдж

Хәәртә ʏʏрмʏдән дуудҗ

Хәәҗ эцкм сернә.

Оршәңhʏ уга дән

Θцкʏлдʏр болсн болна

Эцкнрин баатр йовдл

Эндр чеежәс hархш.

Багш: Мана школын 5-гч классин сурhульч Нәәмнә Санл аавдан - Мунин Утнасн Джалыковичд эврә шʏлгән нерәдсмн.

6. Шулг «Мини аав -дәәч» умшжахинь Нәәмнә Санл.

Мини аав - дәәч

Тɵрскән харсч йовла

Зɵргтә, зɵрмг аавм

Мини чееҗд бәәнә.

Дɵрвн җилд аав

Орн нутган харсв.

Зɵргтә, зɵрмг аавм

Йоста баатр болв.

Алдр диилвр бәрж

Аавм хәрж ирв

Байр, кишг, җирhл

Аавм авч ирв.

Хәәртә мини аавм

Би чамдан дуртав!

Чи мини - баатр

Чи мини - дурн.

Багш: Немшнр Хальмгин hазрт дәврҗ ирснә дарунь эдн партизанмудын зɵргтә сɵрлцәнлә харhцхав. Тɵрскн hазран фашистнрәс сулдхлhнд хальмгин партизанмудын ик зунь әмән ɵгсмн. Тедн дунд нерән hарhсн дәәчнр - Юрий Клыков, Володя Косиев, Тамара Хахлынова, Илья Гермашев болн нань чигн зɵргтә баатрмуд. Эднә нерд олн-әмтнә зʏркнд оньдин бәәх, баhчудт оньдин ʏлгур болх.

7. Володя Косиевин тускар 10-гч классин сурhульч Мɵнкнә Санчр келҗ ɵгх.

Багш: Алдр Тɵрскән харсгч дән чилв чигн зуг hазр деер энд-тенд дән-цʏʏгән болад бәәнә. 1979 җилд Афган hазрт дән эклв. Мана Әрәсә 20 җилдән эн дәәнд орлцсмн. Цергт мордсн баh наста кɵвʏд эн дәәнд орлцад, әмәрн хаhсмн. Кɵтчнрә районас эн дәәнд 17 салдс орлцсмн. Тедн дундас мана Тугтна hазра улс Мукан Дала Хейчиевич, Очра Николай Иванович, Момолдан Константин Кимович. Эдн цугтан медаляр ачлгдсмн. Афгана дәәнд орлцад, зɵрмг баатр йовдларн, летчик Очра Валерий Николаевич Әрәсән Герой нер зʏʏсмн.

8. Очра В.Н. тускар 9-гч классин сурhульч Санҗин Заяна келж ɵгх.

Багш: 1995 (минhн йисн зун йирн тавдгч) җилд Чеченск дән эклв. Ода кʏртл энд тɵвкнʏн биш. Тер цагла цергт мордсн кɵвʏд аврлт уга дәәнд орлцв. Мана hазра кɵвʏн Соотан Сергей цергт мордад, эн дәәнә орлцач болв.

9.Соотан Сергеин тускар 10-гч классин сурhульч Лиҗин Баира келҗ ɵгх.

Багш: Эндрк мана кʏʏндвр таднд ʏлгʏр болж йовтха. Лу сарин хɵрн hурвнла мана Әрәсәд Тɵрскән харсачнрт нерәдгдсн сән ɵдр. Йɵрәлин ʏг мана школын hардачт Серәтрә Г.Б. ɵгчәнәвидн.

Багш: Мана эндрк кʏʏндвр Авдҗа Григорин бичсн шʏлгин тасрхахар тɵгсәхәр бәәнәвидн.

Андhар ɵгсн Тɵрскән

Араhан зууҗ харслат

Амр хаалh хәәлгон

Алдр диилвр бәрләт!

Әәмшгтә гиҗ сурдлго,

Әнгән харсхар бослат

Әвртә ик ноолданд

Әмән хәәрлго орлат!

Багш: Мана ɵсҗ йовх баһчуд

Ут наста, бат кишгтә болтн.

Сурһулян сәәнәр сурҗ

Эк - эцктән, тɵрсн һазртан

Эңкр болн тоомсрта

ʏрдд болҗ ɵсҗ йовхитн

Амулң деедс бурхдас сурҗанав.