Урок-презентация Шумбрачи, мазыйка теле

МБОУ «Сурвелень СОШ»

Уроконь конспектэсь

тиринь литературань коряс

8-це классо

Анокстызе:

тиринь келень ды литературань

тонавтыцясь Ракина Л.М.

Темась : « Шумбрачи, мазыйка теле!»

Цельтне: 1)теемс содавиксэкс тонавтницятнень мокшэрзянь писательтнень ды художниктнень произведенияст марто, конатне алтазь телентень;

2)тонавтомс эйкакштнень эсь потмоёжонь панжомо неезенть коряс, совавтомо ды тевс нолдамо эрьва кодат артовксонь средстват эсь мелень ёвтамсто;

3)тонавтомс вечкеме тиринь масторонть,ванстомо сонзэ мазычинзэ.

Тонавтомань приёмтне: кортамо ( кевкстнема,толковамо),кортамонь ёрокчинь кастомась, башка кармавтоматнень лангсо важодемась.

Кедьёнкстнэ: артовкст пертьпельксэнть мазычиде, музыка «Иень шкатне», фотокарточкат, компьютер, мультимедиа.

Уроконь молемась

1.Стихоткорениянь ловномась.

Хоть кежензэ телесь

Якшамосо панды,

Эйкакштне кенярдыть:

Тейсть тенст ловонь пандо

Сон хоть север ёндо

Суволды лекшатнень

Пандо прясто ёндолкс

Кирякстнить пакшатне.

2.Тонавтыцянть кортамозо теледенть.

Эйкакшт ,течинь урокось минек алтазь иень сехте мазый

шкантень- телентень, минь ютавтанок течи аволь классо ловномань

урок,конань лемезэ «Шумбрачи ,мазыйка теле!»

Течинь уроксонть минь карматано кортамо теленть мазычидензэ,

ванносынек мокшэрзянь писательтнень ды художниктнень произведенияст,

артовксост, конат алтазь телентень, сонзэ мазычинь невтемантень.

Теле…Зяро полавтовомат теевить сонзэ самонть марто пертьпельксэнть эйсэ. Сон туи мартонзо од тюст, ламо кеняркст, кода эйкакштненень, истя покштнененьгак. Тельня весе пертьпельксэсь лиякстоми: коштось, виртне, ломантне, ракшатне, нармунтне. Те истэнть телесь кувать бороцясь сёксенть марто ,окойники изнизе. Стинек валске марто, лисинек ошов, теке ёвксонь

масторс понгинек.Масторлангось оршась ашо паля, теке мазый боярава. Мель ульнесь прамс те чевте ацавксонть лангс ды кеверкшнемс сиземазот.

А кодамо коштось теевсь! Ломантнеяк телень самонть марто лиякстомсть.

Ёжосткак седе паролгадсть. Секскак кортыть: «Телесь сась , кеняркст кандсь.»

Ламот полавтовомат теевить пертьпелькссэнтьтелень самонть марто.Сехте пек полавтови виресь, вирень ракшатнень ды нармунтнень эрямост.А ёвтавить зяро сёрмадыцят ды художникть алтызь эсь важодемаст те иень шкантень.Вана ловносынек стихень апокшке пусминетнень,конатнень сёрмадызь мокшэрзянь писательтне.

Тельня вирьсэ вадря,оля, прок кияк ванськавтызе сонзэ.Ловось вирьсэ алкалгавты чувтнэньсэрест.Вирь чиресэнть волнань-волнань кепететсть

лов шушмотне ды нежедсть чувто корентнэнень. Вирьсэ а марявить нармунень морамот, виресь пешкедсь тарадонь синтревемасо,менчевемасо,прок весе виресь пеняцясь вармантень. Ламо ломанть эсь ютко шкаст ютавтыть вирьсэ. Покш паро мельсэ якить лов шушмотнень ланга.Неть ломантне а пелить якшамодонть,сынь пейдить ,налксить ловнесэ.

Телентень, сонзэ мазычинтень ламо мокшэрзянь поэтт алтызь эсь стихотворенияст. Течи минь кой-кона сёрмадыцятнень стихотворенияст кунсолосынек.

3.Мокшэрзянь поэтнэнь стихотворенияст кунсоломаст.

а) Тонавтницясь ёвтнесы А.Моронь биографиянзо.

Ловнови А.Моронь стихотворениязо.

б) Омбоце тонавтницясь ёвтнесы Ф. Атянинэнь биографиянзо.

Ловнови «Пандо прясо» стихотворениясь.

в)Ёвтневи Д.Куляскинэнь бографиязо.

Ловнови «Теле» стихотворениясь.

г) Ёвтневи В.Дёминэнь биографиязо.

Ловнови «Варьгат» стихотворениясь.

4.Ф.В.Сычковонь картинанзо лангсо важодемась.

Эйкакшт,ламо художникть алтасть эсь артовксост телень мазычинтень.Мон арсян весе содасынк минек содавикс художникенть Ф.В.Сычковонь ,конань пек ламо артовксонзо алтазь минек тиринь масторонть мазычинь невтемантень.

1.Тонавтницясь ёвтнесы Ф.В.Сычковонь биографиязо.

2.Ванносынек сонзэ артовксонзо.

Минь ваннынек сонзэ зярыя артовкст. Мезе невти Ф.В.Сычков сынст эйсэ?

(Невти велесэ ломантнень эрямост, пертьпельксэнть мазычинзэ, сехте ламо невтевить велень эйкакштнэ.)

Эйкакшт, парсте ванносынек сонзэ артовксонзо, конань лемезэ «Школасто велявтома».

1.Мезе ланга те сон? Кодамо сонзэ темазо?

(Картинась алтазь телентень, косо невтевить ламо эйкакшт)

2.Кодат полавтомат кандсь телень самось?

(Весе пертьпельксэсь ашолгадсь,коштось ванькс,якшамо)

3.Варштадо кодамо вечкема марто художникесь невтинзе эйкакштнень,

сынст ёжомарямост , мелест, арсемаст?

(Эйкакштне кецясть телень самонтень, художникесь сайсь эрьва кодат мазый тюст сынст ёжомарямост невтемантень.)

4.Мезе минь нейтяно икельце плансонть?

( Минь нейтяно тейтерька,конась арды эй ланга ,чувто лангсо аштить эйкакшт,ваныть книгат.)

5.Кодат мельть-арсемат невтезь эйкакштнень чачосост? Ули ли эйкакштнень

ютксо ояксчи?

(Эйкакштне невтезь кенярдозь ,чамасост невтечи пейдема, чамаумарест якстереть , сынст лангс ванозь мереват, што сынь шумбрат, а пелить якшамодонть , те неяви сынст оршамопельсэяк.Сынст кедьсэ арасть варьгат,

пальтост апак чочне . Эсь ютксост сынст пек кеме ояксчи, те весе неяви сынст лангс ванозь.)

6.Кодат мельть ды ёжомарямот рашты артовксось?

(Ванан те артовксонть лангс ,монень сыть мельть вечкемс теленть,

пертьпельксэнть чачома велем, ломантнень.)

5.Творческой важодема.

Эйкакшт ,кудов ульнесь кармавтома сёрмадомс аволь пек покш сочинения теледе ды арсемс аволь пек покш стихень пусминеть теледе .

(Ловносызь сочиненияст)

Эйкакшт, кие арсесь стихотвореният теледе?

(Ловновить стихень пусминетне.)

«Теле.»

Телесь сась, телесь сась,

Эйкакштненень кеняркс кандсь.

Пандо пряв сынь тусть ардтнеме,

Саласкесэ кирякстнеме.

Цёрынеть налксить хоккейсэ,

Вармакс пансить шайбанть эйсэ.

«Телень вирь.»

Телень виресь сехте мазый,

Тозонь ламо пракшны лов.

Чувтнэ оршасть ашо палят,

Тёкшост токасть менелев.

Ловонть ланга ривезь чийни,

Сон вешни ярсамопель.

Нумол маризе чинензэ

Ды вармакс ношкстась мекев.

Ламо минек мокшэрзянь поэтт сёрмадсть теледе стихотвореният, кой-кона стихотворениятнес путови эрзянь музыкась ды лиси мазый морыне теледе. Д.Куляскинэнь ули стихотворениязо «Ах,тон теле, телине.»

Сонзэ коряс кунсолотано моро. Морасы те моронть минек школань «Цёковне» ансамблясь.

(Кунсолови морось.)

6.Содамоёвкс лангсо важодемась. «Эрьга содыка?»

Эйкакшт, пек ламо улить содамоёвкст , конат алтазь телень шкантень ,

варчасынек содамс сынст.

Кинь ули мелезэ ёвтамс теледе содамоёвкст?

(Эйкакштне варчить содамс содамоёвкст.)

7.Валмеревкс лангсо важодемась.

Эрзянь кельсэ улить сёрмадозь ламо валмеревкст теледе.

Ловносынек минь неть валмеревкстнэнь.

8.Стихень пусминень теемась.

Эйкакшт, тынк икеле ашти стихень пусмине

Валтнэ аштить аволь таркаваст. Ловнынк эсь пачканк ды валтнэнь аравтник таркаваст.

Ашо лов вели-чары,

Масторов валги састо

Раужо моданть вельти.

Те инженть лемесь кода?

Вели- чары ашо лов,

Састо валги масторов,

Вельти раужо моданть.

Те инженть лемесь кода?

9.Стихень пусминень арсемась.

А, ней максозь валтнэнь эйстэ арсемс стихень пусмине.

…велес

…телесь

…пиретне

…килейтне.

Вана тиринь велес

Эль пачкоди телесь.

Удыть сад пиретне,

Мазыйка килейтне.

10.Налксема «Содамс пильге чалгавкстнэнь»

Эйкакшт ,минек вирьсэ эрить ламо ракшат ды нармунть. Зярдо пры ловось сынст пильгень чалгавксост кадовить ловонть лангс. Тынк икеле ашти артовкс , пильге чалгавкстнэ човорязь.Варштадо парсте ды муинк эрьва ракшанть ды нармунтнень пильге чалгавксост.

11.Уроконь итогось.

Эйкакшт, течинь урокось ульнесь алтазь иень сехте мазый шкантень-телентень. Минь налксинек, важодинек артовкс лангсо, ёвтнинек стихотворе-ният, кунсолынек музыка, морот. Мон арсян те уроктонть мейле кадовсь

тынк седейс хоть зярыя вечкема те мазычинтень, кона ашти минек пертьпельга .Покш сюкпря весенень кие лездась моненень те уроксонть.

12.Кудонь тевть.

Теемс кудосо артовкс телень шкадонть.