Сценарий на тему «Мәңгілік тағзым»

9 мамыр күні өткізілетін «Мәңгілік тағзым» атты мерекелік шараның сценарийі.

1. Оқушылар сапқа тұрғызылады.

2. Рапорт. Ұланбасы мектеп директорына рапорт береді.

3. Мектеп туы әкелінеді.

4. 9, 10, 11 сыныптың ұлдары саппен сахнаға келеді.

5. Мектеп директорына рапорт береді: Құрметті --------------- мектеп Ұлы Жеңістің 70 жылдық мерекесіне арналған салтанатты шеруге сапқа тұрғызылды.

Мектеп директоры: Сәлеметсіздер ме?

Оқушылар: Саламатсыз ба? Армысыздар ардагерлер!

Мектеп директоры: Ұлы Жеңістің 70 жылдық мерекесі жасасын!

Оқушылар: Ура! Ура! Ура!

Мектеп директоры: Мектеп әнұраны орындалсын!

Команда беріледі: Салтанатты шеруге! Жауынгерлер алға! Қалғаны оңға!

(жоғары сынып оқушылары сапппен әскери әндерін орындайды.)

1ж: Жеңіс деген жақсылықтың сыңары,

Жігер менен құштарлықтың құралы.

Күрескердің арманы мен ұраны,

Қуаныш пен мерекенің бұлағы.

2ж: Сағынып жеткен жеңіс елді көптен,

Қуанышты хабармен келді көктем.

Армысыз ардагерлер нар тұлғалы,

Жеңістің қызыл туын желбіреткен деп Ұлы Жеңістің 70 жылдық мерейлі мерекесіне арналған салтанатты жиынымызды бастаймыз!

1. «Соғыстан қайтқан солдаттар» Ән хор

1 ж: Жеңіс! Жеңіс!

Осынау сөзден жарқ етіп,

Көңілі көптің ашылды.

Жауыздың туы жалп етіп,

Кеудесі жаудың басылды.

Қуаныш құшты халқымыз,

Әділдік біздің жеңді деп,

Әйгілі болды даңқымыз,

Жеңіс туы желбіреп!

2ж: Жеңіс... Оны сан миллиондаған адамдар төрт жыл бойы минуттап, сағаттап, сарыла күтті. Ақыры, олардың үміті мен сенімі ақталды. Тілектері орындалды. Бірақ жеңіс оңайлықпен келген жоқ.

1 ж: Ұлы Жеңіс мерекесі қаншы жыл өтсе де, уақытқы мойынсұнбайтын, қайта оралмастай жарқырап айбыны арта беретін қасиетті жеңіс. Сондықтан да бүгінгі ұрпақ сол бір қаһарлы күндерде отанымыздың қарыс сүйем жері үшін жанын пида еткен боздақтардың рухына және сол қанды қырғыннан аман- сау оралып, бейбіт өмірді жалғастырған сіздерге, құрметті ардагерлер иіліп тағзым етеміз! Қашан болса да, қайда болса да бүгінгі жас ұрпақ сіздердің ерлік істеріңізді ешқашан ұмытпауға тиіс!

2ж: Құдайым алған болар шахид қылып

Жанаттың төрлерінен асық қылып

Ешқашан да ұмытылмас есімдерің

Айтамыз мәңгілікке тарих қылып!

1ж: Дәл осынау жадыраңқы жай күні,

Болсадағы қай ғасырдың қай жылы

Ұлы Отаным басын иіп бір минут

Есіне алмақ сол бір апат қайғыны!

2ж: Қан майданнан оралмаған құрбандарды 1 минут үнсіздікпен еске алайық.

1ж: Рахмет!

2. Ән «Солдат сәлемі» хор

1ж: Тверьдің орманы жас, жері кәрі,

Ата қоныс санайды жұрттың бәрі.

Сол жерге Әлияның қаны сіңді.

Соғып тұр мерген қыздың жүрегі әлі.

2ж: Даламыздың даңқысың,

Балауса гүл балщғын қыз.

Жанын қиып, халқы үшін,

Жанып түскен ақ жұлдыз.

3. ән «Әлия»

1ж: Есімде - бес әріп соғыс атты

Ұмытпан ес аманда сол бір шақты

Барым мен бақытымды бала күнгі

Жұлып ап, жалғыз сәтте қан қақсатты.

Есімде бес әріп сөз - жеңіс деген,

У бар ма сол сөз үшін мен ішпеген

Қан бар ма сол сөз үшін төгілмеген,

Жас бар ма сол сөз үшін төгілмеген!

2ж: Мен саған бүгін сөз арнап,

Келді бір кез тіл қатқым

Жылдардың сыры қозғалмақ,

Қозғалмақ сыры ұрпақтың!

1ж: 1945 жылы мамырдың тоғызында неміс-фашист басқыншылары қайта бас көтерместей болып жеңіліс тапты. Міне, сол соғыс өрті өшіп, халық басына бейбітшілік орнаған заманға биыл 70 жыл толды. Ұлы Отан соғысында біздің ата-бабаларымыз Отан сүйгіштік пе ержүректіктің, қаһармандықтың қайталанбас үлгісін көрсетіп, барша адамзатқа жеңіс пе бейбіт өмірді силады.

2ж: Патриоттық сезімі буырқанған, ұлт пен ұлыстың, ата-ана, аға -іні үшін, қара орман мен қалың ел үшін қаншама қиындықты басынан кешірген боздақтардың арқасында, солардың қанымен келген Ұлы Жеңіс осы! Соғыс шежіресін адамнан да, Алладан да жасыра алмаймыз. Ол біздің ащы тарихымыз!

4.Ән «Не стареют душой ветераны» орыс сыныптары

1 ж: Қазақ деген пейілі кең, бай халық,

Толды арманы егеменге айналып.

Бейбітшілік қорғанындай сенімді

Сарбаздары сап түзеді сайланып.

2ж: Мерекелеріңізбен, сарбаздар! Аға ұрпақ алып берген Жеңіс туының тұғыры түспесін.

5.Би «Сарбаздар»

1ж: Біз көкке көтереміз жеңіс туын,

Жерде біз шалқытамыз ырыс гүлін.

Сақтаймыз бейбіт шақты, ел бақытын,

Сақтаймыз бөбектердің тыныштығын.

2ж: Жайна, күн, бейбітшілік әлеміне,

Дәурен бар таң-тамаша кең елімде,

Достарым, жырла бірге шаттық жырын

Жеңістің үндері бар өлеңімде.

6.Ән «Шофер әні» 4 сыныптың ұлдары.

1ж: Ұлы Жеңіс тәуелсіз мемлекеттер достығы елдері үшін ғана емес, сонымен қатар әлем халықтары үшін де үлкен оқиға.

2ж: Соғыс миллиондаған адамдардың өмірін қиып, жүздеген қала мен елді, мекендерді тып-тиыл етті. Сөйтіп соғыс әр үйге, әр отбасының өміріне жазылмас жараның ізін қалдырды.

2ж: Ұлы Отан соғысы - Кеңес одағы халықтарының тарихындағы қасіретті бет қана емес, сонымен қатар ол халықтарымыздың теңдесі жоқ ерлігі мен қажыр-қайратының, бірлігінің дәлелі.

7. Ән « В землянке» Көрініс 7 сыныптар

1ж: Ұлы Жеңіс - сол бір қанды қырғыннан қайтпай қалған қыршын боздақтардың асқақ рухтарының аспандайтын күні.

2ж: Ұлы Жеңіс - әділеттің әділетсіздікті жеңген күні

1ж:Ұлы Жеңіс - бүгінгі ұрпақтың соғыс ардагерлері сыйлаған бейбіт даму жолын одан әрі жалғастырып жатқан күні.

7. ән «Катюша»

1ж: Сүйінші халқым, сүйінші,

Сүйіншіге - сүйінші

Шаттан, ата- анамыз

Шаттан аға баламыз

Кек қайтарып фашистен

Соғыс бітті жеңіспен

2ж: Жеңіс!

Жеңіс!

Жеңіс - біздің нанымыз.

Жеңіс - біздің қасіретіміз, зарымыз.

Жеңіс - біздің әке, ағаларымыз,

Жеңіс - біздің қасиетті қанымыз!

7. Ән «День победы» орындайтын: Олжас 9 сынып ұлдры мен қыздары шармен, гүлмен шығады.

2ж: Құтықтау сөз кезегі мектеп директорына беріледі.

1 ж: Білейік жан қадірін, нан қадірін,

Өсірсін абзал ана ардақты ұлын

Ұрпақтан ұрпақтарға ей, Адамзат!

Жоғалтпас тіршіліктің жалға жібін.

2ж: Айтатын талай нұр таңым бар!

Демейік бұл өмірден құр қалмаңдар.

Жеткізер есіміңді ғасырларға

Ұмытылмас ер мінезді ұрпағың бар.

1ж: Елдіктің ерен үлгісі болған ұлы ерліктің ұлы тойы құтты болсын ардақты ағайын!

10. Ән «Атамекен»

Халық Мұғалімі Құмащ Нұрғалиұлының көпсалалы орта мектебі

Өткізген: Құйқалақова Қ

Боран ауылы, 2006 жыл