«Айтăр вăййа тухар-и?» йăпану

«Айтăр вăййа тухар-и?» йăпану.

Тĕллевĕсем:

1. Ачасене тăван чĕлхене юратма, унăн культурине, йăли-йĕркине хисеплеме вĕрентесси.

2. Чăваш ачисен вăййисемпе кăсăклантарасси, вĕсене кулленхи пурнăçра усă курасси.

3. Тăван чĕлхепе янăракан юрă-кĕвĕ илемне туйма вĕрентесси.

4. Ачасене юрăра, ташăра, вăйăра хăйсен пултарулăхне кăтартма, ушкăнпа пĕрле савăнма хавхалантарасси.

Усă курмалли материалсем: сурпан, вăйă атрибучĕсем, тĕслĕ хăюсем.

Йăпану ирттермелли йĕрке:

Асанне: Паян мăнуксем килетпĕр терĕç-ха. Кукăль пĕçертĕм-ха,сĕтпе кукăль тутлă пулаканчĕ. Канфет-пĕремĕк те юратаççĕ вĕсем. Кăçал пан улми те ăнса пулнă. Ăна та хатĕрлесе хурам-ха.

Акă мăнуксем те çитрĕç. Мĕнле пурăнатăр-ха? Пысăкланса кайнă эсир.Килĕр сĕтел хушшине ларăр.

Инна: Асанне, ку хитре япала мĕн-ши?

Асанне: Кăна сурпан теççĕ. (Сурпан çинчен каласа памалла). Ăна чăваш хĕрарăмĕсем пуçа çыхнă.Сурпан тĕрленĕ чухне мĕнле çипсемпе усă курнă? Каçхине, ĕç хыççăн пуçтарăннă та тĕрлĕрен алă ĕçĕ тунă. Тĕрленĕ хушăра юрăсем юрланă.

Юрă «Илемлĕ, илемлĕ…»

Даша: Асанне, пирĕн урама тухас килет.

Асанне: Паян кунĕ сÿрĕк-ха, хĕвелĕ таçта курăнмасть.Эпир сирĕн пек пĕчĕк чухне: «Хĕвел тух, хĕвел тух!» тесе кăшкăраттăмăр.

Лена: Эпир те ун пек сăвă пĕлетпĕр.

Сăвă «Хĕвел тух».

Хĕвел тух, хĕвел, тух-

Вăйă карти пухатпăр.

Хĕвел, тух, хĕвел, тух-

Çĕнĕ сăвă калатпăр.

Хĕвел, тух, хĕвел, тух-

Вăйăç умне тăратпăр.

Хĕвел, тух, хĕвел, тух-

Тапăртатса ташлатпăр.

Хĕвел, тух, хĕвел, тух-

Саламласа юрлатпăр.

Хĕвел, тух, хĕвел, тух-

Савса ырлăх сунатпăр.

Асанне: Акă хĕвелĕ те тухрĕ. Урама тухар апла.

(Ачасем урама тухаççĕ.)

Ачапча чухне вăйă выляма çерем çине пуçтарăнаттăмăр.Чăвашсен юратнă йывăççи хурăн пулнă. Ачасем хурăна хитре хăюсемпе илемлетнĕ. Эпир те илемлетер-ха.

(Ачасем йывăç илемлетеççĕ.)

Даша сăвă вулать.

Йăрăс хурăн, шурă хурăн,

Пирĕн кантăк умĕнче.

Нумай çул хушши эс пурăн,

Шурă хурăн, çĕр çинче.

Асанне: Çак хурăн тавра вĕсем юрăсем юрланă.

Юрă «Шурă хурăн».

Пĕренесем çине лараттăмăр та тĕрлĕрен вăйăсем выляттăмăр.Сирĕн мĕнле вăйă выляс килет-ха?

Вăйăсем: «Сăмаварла»,

«Çĕрĕ пытармалла»

«Çĕлĕк тăхăнтартмалла».

Асанне: Çакăн пек интереслĕ вăйăсем выляттăмăр.

Инна сăвă вулать.

Вăрманти уçланкăра

Хитре шурă лĕпĕшсем.

Çÿлти касри вăйăра

Ытарайми сар хĕрсем.

Кристина сăвă вулать.

Эпир кам, эпир кам?

Асанне мăнукĕсем!

Эпир кам, эпир кам?

Юрă ташă ăстисем!

Юрă «Улми лайăх-и?».

Лена: Асанне, эпир киле каяр пуль?

Асанне: Каç пуличчен каятăр пуль. Сире кучченеç парса ярам-ха.

(Асанне ачасене кучченеç парса ярать). Татах килĕр.

Литература:

1.Примерная основная общеобразовательная программа дошкольного образования «От рождения до школы» под редакцией Н.Е Вераксы, Т.С.Комаровой, М.А.Васильевой. 2011г. Москва. Мозаика-Синтез.

2.Чувашские детские игры. Л. Г. Ягодова, И. В. Махалова. 2005г.

г. Чебоксары. «Новое время».

3. «Праздники на земле Улыпа». Методическое пособие для дошкольных образовательных учреждений. г. Чебоксары. 2006г.